21 ¹ Nelpaiwesalhque lhta ennenco'o Jesucristo apquennemolhema co Efeso m'a, ca nenmeiacjo loma nemmen nelcanantema nelpeiwocjo aquieto natemma Cos. Mo'oc acnem alhta ntac ma'a nellempocjo mocjom netlhengama aquieto natemma Rodas, neliecanwacjo lhta m'a netlhengo mocjom acuacjo natemma Patara. ² Ca neluetanwacjo lhta loma nemmen aquieto acnactetemmalhquelha m'a cacpota ncongiacjac Fenicia, nelcanato njan ma'a. ³ Netlhengo m'a, neluet'o aquieto ensancaluelha aquiaquienweiam lhepop acjalhiencaiam iemmen acuesai'a Chipre, nelieco'o neluacjo iocjalhma Siria, nellentepo njan m'a aquieto acnactetemmalhquelha loma nemmen natemma Tiro, nengacjenwacjo lhta m'a ncanec loma nemmen nne lhta alentepcaso nentoma atsecama m'a. ⁴ Neluetanwacjo lhta apquellelto Jesucristo apquennemolhema m'a, nengacjenwacjo 7 acnem apiesecsec ma'a. Espiritu Santo lhna lhta njan nqueleltennasac apquellaso lhta mellelto lhta emjancoc Pablo m'a aquieto Jerusalen. ⁵ Ca acuacmo lhta 7 acnem ma'a, nenmac'o lhta angetlhong mocjom, nellelto lhta njan netlhelhma'ac aplhamacjo Jesucristo apquennemolhema, apnacteianca'a cacpota njan apquetcac aquieto iocjalhma apquellawacja' nac ma'a necja aluata, nellelteclhenco lhta njan entapno'oc nalhepop ma'a, nellelmalhno lhta Engiapom Neten ma'a. ⁶ Nelpaiwesalhco lhta m'a, nelcananto loma nemmem, apqueltaqjacjo lhta njan enenlhet'awoc ma'a. ⁷ Ca nellempo m'a Tiro nenmeiacjo acuacjo m'a Tolemaida, amaica'a lhta nentancoc lhema cnem Jesucristo apquennemolhema m'a. ⁸ Mo'oc acnem alhta ntac ma'a, netlhengo acuacjo natemma Cesarea, ca nentanco lhta amaica'a apnemacja Felipe, apto lhta evangelista m'a, apto lhta njan lhema apjapac apiesecsec 7 apquetlhelhma'ac, wanlha lhta mota apquelpasmoma apostoles ma'a. ⁹ 4 nqueluana tcoc alhta apquetcac Felipe metca anacteianca'a lhta, alletsecama ania'a lhta njan ma'a. ¹⁰ Ca nengacjenwacjo m'a moclhem'a acnem, apuo'o lhta lhema secama ania'a apqueniem'o Judea, Agabo lhta apuesai'a m'a. ¹¹ Apmanwo'o lhta apiapnama Pablo m'a, apnacteto njan apanque apmeio'oc cacpota njan apmanco'oc, lhta ptac apcano: — Espiritu Santo lhquec jeltennascama ncolhec jata acnacteto enenlhet apto apancoc apiapnama nac aquieto Jerusalen, elhquenwomoc jata njan apquelemjama apmaniaie romanos ma'a —lhta aptac secama ania'a. ¹² Necsa nellengai'a lhta ennenco'o cacpota njan Jesucristo apquennemolhema co Cesarea m'a, nelleltennaso lhta Pablo mengiacjec ma'a aquieto Jerusalen. ¹³ Coca lhta ptac Pablo jengellatemmonca: — Mollaiose nque apualho'oc quetlhencap, meliapqalh anquec najan, angiacja ta co'o Jerusalen niecje astetemmalhca ta m'a, niecje njan asmatnama aniemo coca m'a asqueliejecjo Apuesque Jesus — lhta ptac jengellano. ¹⁴ Ma lhta engiasecjac Pablo nennawescama, lhta nentancoc nellano: —Ntase, ncotnec jata nque apmac'acja etnec Apuesque— ¹⁵ Netamen nellanquesacjo nelletsecama cacpota angetlhong angenmeiacjac Jerusalen ma'a, ¹⁶ netlhelhma'ac alhta njan moclhem'a apquellelto Jesucristo apquennemolhema co Cesarea, jengeliantemacje lhta njan acuacjo apnemacja lhema enenlhet apuesai'a Mnason apqueniem'o lhtoca Chipre m'a, apto lhta njan lhennenga aptema meiasqueiam Jesucristo, apquelto njan angacjenwomoc ma'a apnemacja.

Pablo aptema amaica'a Santiago

¹⁷ Neluacme lhta aquieto Jerusalen ma'a, nquelpaijacje lhta apualho'oc jengenmanco tacja apquellelto Jesucristo apquennemolhema m'a, ¹⁸ ca acto mo'oc acnem neltanco njan amaica'a Santiago, apcacjaianque lhta njan aplhamacjo metno apquetcoc ma'a. ¹⁹ Ca apquelpaiwesanco lhta njan Pablo m'a, apqueltennanca lhamacjo actemacja apasmoma Engiapom Neten necsa apmacmecama apiesecsec metno judios. ²⁰ Nquelpaijacje lhta apualho'oc apquellengo m'a, ca apqueltacnescasenco lhta Engiapom Neten ma'a, lhta aptac apquellano Pablo: — Apuet'ac lheiap jenque'e Pablo mante panquec judios meliasqueiam Jesucristo, apquetlhenque mota ncaimelhquec anlhenquesec mocjom nelliejecjo jenganemacja Moises, ²¹ coca apquellengai'ac na ania'a actemacja apquetlhecmoscama lheiap ma'a judios apancawe' nac apcacjanco m'a mo'oc apquellawacja, aplheianweiacmo lhna lhta lheiap ntasec eliengiecjac jenganemacja Moises anac, ntasec na lhta njan eliengiecjac aptaiancolha nac apqueltemesquesaicamoc circunsicion apquetcac, cacpota njan ntasec na lhta njan eliengiecjac nentaiancolha nac na ennenco'o jenque'e judios. ²² Coca colhuawe nac ellengac jata judios apuactamo nac mocjom lheiap jenque'e Jerusalen, ncotiepoc jatelha njan acmasca. ²³ Nenmac'ac ennenco'o angeltennasama lheiap lhema caselhaja cacpota mancoitec acmasca jenque'e nengiesecsa nac, apcacjanquec na jenque'e 4 enenlhet aimommalhcac elpenacsec aptancolha lhta apquelpacmeiasma etnancoc jata napaqtec Engiapom Neten ma'a. ²⁴ Eliantemecja ta lheiap ma'a enenlhet anac Engiapom Neten apnemacja cacpota elalhnasecjac apualho'oc napaqtec ma'a, lheiap jata njan engialhnasecjac apualhoc ma'a. Elianmonquesques jata njan patacom apancoc lheiap cacpota ncolhec aliesesanco, cacpota eluetac aplhamacjo enenlhet jawe ngiapac aplhenquescama lheiap mocjom jenganemacja enganco'oc anac, cacpota njan etlhenec acmowana ania'a aplhenammap lheiap. ²⁵ Coca metnanco lhta judios apquellelto lhta meliasqueiam Jesucristo, nellapascasque lhta waccajac atcoc nennactalhescama alletlhecmoscama m'a cacpota metawanquec nentoscama apetec apquellaicamoc apqueluanlhecamoc la caselha aquiocja alanemmalhca ancoc, metawanquec na apetec aquieplomo ema ncoc, metawanquec na nentoscama acuaiwecamoc atsepma nac, cacpota njan metnocjec apnacteianca'a manganemmalhquelha nac antejec—lhta aptancoc ma'a. ²⁶ Mo'oc acnem alhta ntac ma'a, apqueliantemacjo lhta Pablo 4 enenlhet ma'a aquieto Engiapom Neten apnemacja, ca apquellempo lhta apquellalhnasecja apualho'oc ma'a cacpota njan Pablo, ca aplheno lhta njan napaqtawec enenlhet'awoc ma'a acmac'acja ta ncotnec nnelha' apquelpenescamo lhta apquelpacmeiasma etnancoc jata napaqtec Engiapom Neten, ellancoc jata njan caselha apquellaicamoc Engiapom Neten. ²⁷ Ncama lhta acuaiam 7 acnem acsaujommalhquelha apquellalhnasecja apualho'oc ma'a, moclhem'a judios apquelleniem'o Asia apqueluet'ac alhta Pablo m'a conne Engiapom Neten apnemacja, ca apquelentepcaso lhta acmasca m'a, apquelquetamenco lhta cacpota elpatjetec ma'a, ²⁸ nquelpaijema lhta njan apatno'oc, lhta aptancoc ma'a: —Enenlhet co Israel, jengeluanenwata' cacpota ampatjetec enenlhet anac, malha apmaianco lhma' apquetlhecmoseianco lhamacjo apquellawacja' apcammelhecjec na nengawacja nac, jenganemacja engancoc najan, cacpota njan Engiapom Neten apnemacja' nac jenque'e, apquellentalhnesca'ac na metno judios griego, mangeltammalhquelha nac antejec, aptewasquec na Engiapom Neten apnemacja nac— lhta ptancoc enenlhet'awoc ma'a. ²⁹ Coca apquetlhenque lhta apanque ncanec apqueluet'a lhta Pablo apiaijenca apualhoc temma, aplhelhma lhta Trofimo co Efeso lhta m'a, apquellanemo lhta m'a eliantamac conne' Engiapom Neten apnemacja'. ³⁰ Ca apquellentepcaso lhta acmasca aquiocjo aiempec ma'a Jerusalen, apqueletcacjo lhta njan apnacja Pablo, apquelpatjetuacjo, apiempeioc apcancawec alhta aptengiancoc apquelentepcaso m'a, ca apquellapacjo njan atong Engiapom Neten apnemacja. ³¹ Quetse' lhta ncaimelhca apquellaqjemacja m'a, nietawe lhta aplengo ania'a apuesque apancoc soldados romanos acteiapma acmasca aquieto Jerusalen. ³² Ca apquellanquesacjo lhta soldados apancoc ma'a cacpota njan po'oc apquelemjama apmaniaie soldados, apqueletcacjo lhta m'a aquieto actepacja acmasca. Ca apqueluet'o lhta enenlhet'awoc apqueluo'o soldados ma'a, apqueluatesanque lhta apqueltecpoicama Pablo m'a. ³³ Ca apuesque apancoc soldados apatjeto lhta Pablo, apquelelto njan ncolhec acnacteto janet cadena, apquelelmalhnenca njan enenlhet'awoc ma'a, lhta aptac: —¿Sec la enenlhet jengca ie, se lha apquelanei'o ie, je?—lhta aptac ma'a. ³⁴ Moclhema alhta nquelpaijema apatno'oc apquetlheno lhema caselha, po'oc alhta njan moc actema apquetlheianma, ma lhta eijoc apuesque m'a actacja apquetlheianma enenlhet'awoc ma'a, ca apquelto lhta ncolhec aquiantemo apcacjaiancolha quempocjacme'. ³⁵ Apquelieplacje lhta enelhet'awoc ma'a, ca apqueluacjo aquietelha atong aquiawai'a apcacjaianquelha quempocjacme, ca apquelteionwacjo nelteianmeiancolha metaimong ca apquelpatmo neten Pablo ncanec awanje lhta nema actecpoicama apiempejec aniemo enenlhet'awoc ma'a, ³⁶ ca alpaijenca lhta njan apatno'oc neptapna'ac soldados, lhta aptancoc: — Ellaqja, ellaqja —lhta aptaiancoc ma'a. ³⁷ Nquetlhencasque lhta ellentalhnecsec conne apcacjaiancolha quempocjacme Pablo m'a, ca apquelmalhnenca lhta apuesque soldados: — Ntase nlho apacmetquesec secje lheiap, je?—lhta aptac Mpelapcasque lhta aplengo apuesque actacja apaioma Pablo Griego, lhta ptac apcano: — Ma nac co aijamoc apacmeteianca griego apaioma lheiap ³⁸ ¿Jawe nlho lheiap Egipcio aptepquescamo nac apquennapommap apcammelhma apuesque co Roma, apcanquesecjo nac na lheiap 4.000 enenlhet'awoc apquenmopuanca'a ennapacpoc aquieto m'a iocjalhma metquelha temma, je?— lhta aptac. ³⁹ Ca apcatemmonca lhta Pablo m'a, lhta aptac: — Jawe co'o m'a enenlhet anac aplheno nac lheiap, judio apanque co'o, ca asteiaianlha m'a natemma Tarso, acto neten anquec aquiaspommalhca m'a aquieto iocjalhma Cilicia. Jeianco no secje atlhenec enenlhet'awoc anac jenque'e —lhta ptac Pablo. ⁴⁰ Ca apcasecjo lhta apuesque m'a, apquenmacjo neten Pablo nelteianmeiancolha metaimong, apquenencasacjo lhta njan neten apmec apqueltemo eluanmac secjec enenlhet'awoc ma'a, ca apacmeto lhta hebreo apaioma, lhta ptac apquellano: