19
Pablo apmeiecja natemma Efeso
1
Necsa apnema lhnac Apolo m'a aquieto Corinto, Pablo lhnoca apiecai'ac iocjalhma metaimong aujac, apuecjo natemma Efeso, coca m'a apuetanweiacmo lhnac apentalhnema Jesucristo
apquennemolhema,
2
lhnac ptemac Pablo:
—¿Manlho etlhewaianco Espiritu Santo quetlhencap necsa aptaicamoc alhta Jesucristo apquennemolhema, je?—
Ca apquellatemmoianca lhnac enenlhet'awoc ma'a, lhna aptaiancoc:
— Mma' mongellengai'ac ennenco'o aplhenammap Espiritu Santo—lhna aptaiancoc.
3
Lhnac aptemac mocjom Pablo:
—¿Se lha actemo nemo nac allauquescamo conne iemmen quetlhencap que, je? —lhnac ptemac Pablo. Ca apquellatemmoianca lhanc ma'a, lhna aptaiancoc:
— Juan alhta nqueniemai'ac ma'a jengetlhecmoscama nac—lhna aptaiancoc
4
Coca lhna ptemac mocjom Pablo:
—Apquellauquescanque lhta conne iemmen enenlhet'awoc Juan apquelleltemo elietasquesecjoc apualho'oc Engiapom Neten, apqueltemawe lhta njan meliascame enenlhet apmac'o ta ewa', Jesus alhta m'a—lhna aptemac Pablo apquellanemo enenlhet'awoc.
5
Apquenmaianquec nac tacja ania'a apquellengai'o' m'a, acnemo njan allauquescamo conne iemmen ma'a aquieplomo coca apuesai'a Apuesque Jesus,
6
ca apnencanmo lhnac na apmeio'oc apietsecso'oc Pablo m'a, apuai'o njan tacjaplhet'oc Espiritu Santo, ca apquelpacmeteianca ncotnacjo apquelpaqmeiasma ania'a aniem'o Engiapom neten,
7
12 apquelennawa'ac nac ma'a.
8
Janetolhema pelten nac nwaiacmoc apmeiecja mota apcacnecjelha judios Pablo m'a, metca apcai'a lhnac na apquetlhecmoscamo ania'a aptaiecja apuesque Engiapom Neten, apqueliaicama lhnac aptemacja cacpota ncollecuomoc apualho'oc enenlhet'awoc meliascamec najan.
9
Coca moclhem'a judios ncolleijac anquec nac apualho'oc, man na ncomajai'ac etnancoc meliasqueiam ma'a, ca apquellempai'o lhnac apqueliematquesaicama alhnancoc amai
Netamen Pablo apteiacmo lhnac m'a nemacnecjelha, ca aplaqlecjo lhnac na Jesucristo apquennemolhema aquieto escuela apancoc lhema enenlhet apuesai'a Tirano, ca apquetlhecmoscamo mota njan Pablo m'a
10
acuacmo janet iantelhcapa. Lhamacjo enenlhet'awoc apquelloma m'a iocjalhma Asia, apquelleto judios cacpota njan metno judios, apquellengai'ac nac ania'a aplhenammap Apuesque.
11
Apcaianquec nac Engiapom Neten apmopuana Pablo cacpota elanac caselha jempelapquescama napaqtawec enenlhet'awoc ma'a,
12
apquelletsomo njan ietamopai'a napocja'ac cacpota njan apquelentalhnema cacpota emanwomoc Pablo m'a cacpota elletso'oc apnancolha la anmasca apiempeioc, cacpota enmanwomoc ma'a, eltacmaluomoc najan, ncolentepoc na casecapoc au'alhoc apualho'oc ma'a.
13
14
Apquellomaca lhnac na 7 enenlhet judios ma'a, sacerdote lhnoca apqueliapom ma'a, Esceva apuesai'a, apquenmajai'o lhnac na eliengiescasecjac casecapo au'alhoc lhema enenlhet, apquenmajai'o lhnac enmama apmopuana Apuesque Jesus ma'a, lhna aptaiancoc apquellanemo casecapo au'alhoc:
—Nietnec ennenco'o apmopuana aniem'o Jesus aplheianmo lhta nja mota Pablo, colentep jam enenlhet anac —lhna aptaiancoc.
15
Ncatemmoicama lhnac casecapo au'alhoc, lhna ntemac ma'a: — Asiawec co'o Jesus cacpota njan Pablo, quetlhencap coca moliecpelcac—lhna ntemac ma'a.
16
Colhuawec anquec nac apqueltecpoicama enenlhet acmaicama casecapo au'alhoc 7 apquelialheng'a m'a, apnaqtewascamo njan, apiempec anquec na nnac ma'a aniem'o, apquengiaianquec nac apquelialheng'a apquelialhnai'o apqueliocjojo cacpota njan apqueliensema.
17
Aplhaniec nac judios cacpota njan metno judios co Efeso apqueluetai'o m'a, apquellai'ac nac na m'a. Niaweianquec nac actema neten anquec apuesai'a Apuesque Jesus ma'a.
18
Man nantec na enenlhet'awoc aptaicamoc meliasqueiam ma'a, apquetlheianmo njan apquellanecamoc alhta caselha ncolatsecama napaqtawec enenlhet'awoc ma'a.
19
Apqueluatesaianco njan aptaicamoc apqueliolhma meliamolhma, apquelletsecjo njan waccajac apanco'oc apquelleluanlhecjo napaqtawec enenlhet'awoc ma'a, nquescama nquec pataccom aliaquiema waccajac anac ma'a, malha 50.000 anmopai'a aliaquiema.
20
Coca m'a acpaijecjo lhnac ania'a actacmanma aplhenammap Apuesque alhma nquec jam, acuetammalhco lhnac acnema acmowana.
21
Netamen ma'a, apmajai'o etnec amaica'a Pablo iocjalhma Macedonia cacpota njan Acaya, netamen mocjom ma'a Jerusalen, ca tep ma'a apmajai'o emjancoc iocjalhma Roma.
22
Coca mengiactemmacpo lhnac ma'a aquieto Asia, apquellapascamo apquetlhelhma'ac ma'a Timoteo cacpota njan Erasto aquieto Macedonia.
Acuai'a apqueliamenammap aquieto natemma Efeso
23
Nwai'ac nac apqueliamenammap aquieto m'a na temma Efeso apquetlheianma actemacja alhnancoc amai,
24
lhna nqueniemai'ac ma'a apientalhnescama apquelloma lhema enenlhet apuesai'a Demetrio, aniem'o apquellanai'a caselha aquiocja tawa apac alienmomo acmopai'a acuesai'a plata, aquietquesammalhca lhema diosa nqueluana aquiocja acuesai'a Artemisa, awanjec anquec nac apquennacsepma pataccom cacpota njan apquetlhelhma'ac ma'a.
25
Apquelanai'ac nac apcaqnecja Demetrio, apquetlhelhma'ac cacpota njan po'oc enenlhet aptemo lhemec apquenmacmecama, lhna ptemac apquellanemo:
—Apqueliawec quetlhencap jengaicamoc nentoma nenmacmecama nac,
26
nelleng'ac ennenco'o, neluet'ac na enenlhet anac apuesai'a Pablo aplheianwei'o canque'e natemma nac Efeso, cacpota njan lhamacjo iocjalhma Asia, dioses anac nellanecamoc anac ennenco'o mancotno jaweniapac anque, acjemo lhnac. Mante panquec na enenlhet meliasqueiam apquetlhecmoscama Pablo.
27
Malha jennactewascasquec na Pablo nenmacmecama, aptewasquec na pa'at aquiawai'a acnemacja diosa Artemisa, apqueltacnescaseiancolha mota aquieto iocjalhma Asia cacpota njan lhmanquec jam, apmasquesquec na actema neten anquec acuesai'a m'a, eltacnonwacjac jata njan lhamacjo enenlhet'awoc acuesai'a—lhna aptema Demetrio
28
Nquennactescanquec nac apquellengai'o enenlhet'awoc ma'a, ca apquelueneianca lhnac ma'a, lhna aptaiancoc:
—Ntasec anquec Artemisa, co Efesios diosa apanco'oc —lhna aptaiancoc apiapqalheianca m'a.
29
Apiennenquescanquec na lhma enenlhet'awoc annatjescama m'a, ca aptengiaianco lhnac apiempeioc apquelquetameianco apquelpatjetmo Gayo cacpota njan Aristarco apquelleniem'o m'a Macedonia, Pablo lhnac apquetlhelhma'ac ma'a, apquelliengioseicocjo au'alhoc acnaiwommalhquelha.
30
Ca apmajai'o lhnac niecje Pablo eclhec ma'a cacpota elelpacmetquescamoc enenlhet'awoc ma'a, coca Jesucristo apquennemolhema melleltemoc emjancoc ma'a.
31
Moclhema apquelemjama apmaniaie aquieto m'a iocjalhma Asia apquellelto apqueluetaiacja Pablo, apquellapascanquec nac ania'a meleltemo na emjancoc ma'a.
32
Maniamo lhna ntemac ania'a aquiennoma lhma acnaiwommalhquelha m'a, moclhem'a enenlhet man nac eliamoc ma'a aptemacja apqueluetai'a.
33
Ca apquelpeiwescasecjo lhnac judios lhema enenlhet apuesai'a Alejandro actemacja ania'a m'a, apqueliengeianquec nac cacpota elhenec napaqtawec enenlhet'awoc ma'a. Ca apqueliasecjo lhnac neten apmeioc Alejandro apqueltemo eluanmac secje' cacpota eliatac ma'a.
34
Coca apqueliepelquenquec nac enenlhet'awoc Alejandro m'a apto judio apanque', aquiaweianco njan alpaijecama apatno'oc ma'a, malha lhnac 2 hora mocjom ma'a, lhna aptaiancoc:
—Ntasec anquec niecje Artemisa, co Efesios diosa apanco'oc —lhna aptaiancoc apquelueneianca m'a.
35
36
Netamen apto aptalhesaicamoc ma'a apqueluanmesecjo lhnac enenlhet'awoc ma'a, lhna ptemac:
—!Enenlhet co Efeso, elleltacmelcasacpo, colietnama apactec! Mancaimalhcac etnancoc aptancolha nac, apquelliawec aplhamacjo enenlhet'awoc lhmanquec jam nengellelto nellanecama neltacmelquescama pa'at aquiawai'a ancoc anac diosa Artemisa, cacpota njan aquiocja na'at acuaiwentamo neten.
37
Ca enenlhet anac apqueliantemantamo nac quetlhencap jenque'e, mamma apqueltemenwecjo lhma apquellammelhma acuesai'a diosa Artemisa, cacpota njan pa'at acnemacja nque nac.
38
Wanlha Demetrio cacpota njan apquenmacmecamo lheme nac apquellelto apqueltacnoncoma m'a, coca ntase enmeiacjac napaqtawec jengiecpelquemo ngiapom cacpota ellanecja apancawec ma'a.
39
Coca apquenmac'o la etnancoc apcacnecja jenque'e, mancolatsema, mamma jengelliecpelquemo ngiapom jenque'e.
40
Mancolatsema apqueliennencaso lhque lhma quetlhencap jenque'e, mamma caselha aquiau'o ncolasecama apquellanecamoc Gayo cacpota njan Aristarco, ncolhec jatelha njan jengetlheianwacjo napaqtawec apqueluescai'e ennenco'o nengellelto nentepquescama aquiennoma lhma nac, acjemo coca—lhna aptemac.
41
Ca apenescamo lhnac apaioma, apquelleltemo njan elentepoc aplhamacjo enenlhet'awoc, eltaqjecjac ma'a.