17
Aquiennoma lhma natemma Tesalonica
1
Ca apquellempaicocjo lhnac mocjom apquetlhengama Pablo cacpota njan Silas, apqueliecanwecjo natemma Anfipoles cacpota njan Apolonia, apqueluecjo m'a natemma Tesalonica, nietnenquec nac na apcacnecjelha judios ma'a.
2
Ca apmaianco lhnac Pablo m'a aptemacja apanque na mota m'a, janetolhem'a sabado lhna ntemac apquelietsatema waccajac jenganemacja lhennenga Engiapom Neten, cacpota njan apquellatemommacpo enenlhet'awoc ma'a,
3
apquellelpeiwescasecjo njan enenlhet'awoc ma'a aplhenammacpo lhnac nanec engietsepoc Mesias, netamen etnecjac mocjom apjalhnancoc apiesecsec apquenmasquenwaiacmo, lhnac ptemac na Pablo:
—Ca enenlhet anac Mesias, Jesus alhta m'a— lhna aptemac.
4
Moclhem'a lhnac judios meliasqueiacmoc ma'a, apquelpasmecjo njan Pablo cacpota njan Silas ma'a. Meliasqueiacmo njan aplhamacma griegos apquellelto apqueltacnescasecamo mota Engiapom Neten, cacpota njan alemjama amaniaie acto neten anquec aliaspommalhca.
5
Coca napocja judios apqueliasqueiacmec nac ma'a cacpota njan apqueliasepquescama. Apquelleliaianca lhnac moclhem'a enenlhet meliamolhma apquellomacja apanquec la amai cacpota eliasancolhma lhamacjo temma nac. Apqueltengiaianquec nac apiempeioc apquellentalhnenwaiacmo apnemacja lhema enenlhet apuesai'a Jason, apquelleliaianca m'a Pablo cacpota njan Silas cacpota eliantemecjac napaqtawec enenlhet'awoc, cacpota elleltancoc meliamolhma m'a.
6
Coca man nac eluetecjac Pablo cacpota njan Silas ma'a, netamen apquelpatjetmo lhnac Jason cacpota njan apqueltemo lhemec Jesucristo apquennemolhema m'a, ca apqueliantemecjo apqueliengioseicocjo njan napaqtawec apquelemjama apmaniaie, ca apquelueneianca lhnac ma'a, lhna aptaiancoc:
—Ca enenlhet anac apqueltemesquescanquec lhamacjo eiempec anac, apiennenquescama lhma enenlhet'awoc, colhua apquelua'ac jenque'e.
7
Jason coca apto apquenmama tacja. Ca enenlhet'awoc anac melleliejecjoc jenganemacja apancoc apuesque co Roma, apquetlhenquec apnema po'oc apiau'acja apuesque apuesai'a lhna Jesus—lhna aptaiancoc.
8
Ca apquellengai'o lhnac enenlhet'awoc cacpota njan apquelemjama apmaniaie m'a, nqueltaicama lhnac apualho'oc.
9
Coca Jason cacpota njan apqueltemo lhemec apquellaianquec nac pataccom cacpota elpaqnemecjac ma'a, ca apquelpaqnemecjo lhnac ma'a.
Apqueltennaicama Pablo ania'a actacmanma aquieto Berea
10
Ca aptemo lhnac pelhasep ma'a, Jesucristo apquennemolhema apquellapascamo lhnac Pablo cacpota njan Silas enmeiacjac natemma Berea, ca apquelentalhnenwaiacmo lhnac aquieto apcacnecjelha judios ma'a.
11
Apqueltacmelcasemmacpo apancawec nac ma'a judios, jawec lhnac aptanco nac judios co Tesalonica, apquelleltacmelquescamawec nac apquellailhemo apquetlhecmoscama Pablo, ca apquelleliaianca lhnac waccajac jenganemacja lhennenga actalhesammalhca cacpota eluetac jawe ngiapac anquec aptemacja apquetlhecmoscama Pablo.
12
Apentelhec nac enenlhet'awoc meliasqueiacmo m'a cacpota njan enenlhet neten apancawec, nqueluana'a njan alemjama amaniaie co Grecia .
13
Apquellengai'ac nac judios aquieto m'a Tesalonica, apqueltennaicama Pablo ania'a aplhenammap
Engiapom Neten natemma Berea, ca apquenmeiecjo lhnac ma'a, apqueltemesquesquecjo lhnac na mocjom apqueliennenquescama lhma enenlhet'awoc aniem'o apquellammelhma Pablo.
14
Ca apqueluetai'o lhnac apquellelto Jesucristo apquennemolhema m'a, apqueliantemacjo Pablo necja aluata aquiawai'a, coca Silas cacpota njan Timoteo apcacjaicocjec nac ma'a natemma Berea.
15
Ca apmeiecjo lhnac Pablo cacpota njan apquetlhelhma'ac apiau'acja temma Atenas, netamen ma'a apqueltaqjemo lhnac neptapna'ac apquetlhelhma'ac, apqueleltennasquecja ania'a Silas cacpota njan Timoteo, aplheianma Pablo etnancoc pecjai'a apquenmeiecja m'a aquieto na temma Atenas cacpota engiaqnecjoc ma'a.
Apqueltennaicama Pablo ania'a actacmanma aquieto natemma Atenas
16
Apqueleljalhanmec nac Pablo Silas cacpota njan Timoteo aquieto Atenas, ca apcaniemjaianca lhnac apiesecsec temma m'a, apuetanweiacmo lhnac nquescama caselha aquiocja apquellanecamoc, awanjec anquec nac acnatjescama Pablo m'a.
17
Ca apquellatemmommacpo lhnac na m'a judios cacpota njan metno judios apquellelto apquelleltacnescasecamo mota Engiapom Neten aquieto m'a apcacnecjelha, apmeiecjec nac na Pablo aquieto aquietelha apcacnaiancolha la mota enenlhet, apquellatemmommacpo lhnac na enenlhet ma'a.
18
Apquetlhecmoscanquec nac Pablo m'a aptemacja Jesus cacpota njan nentaiecja enjalhnancoc mocjom apiesecsec apquenmasquenwaiacmo, coca apquelammelhmec nac na m'a moclhem'a enenlhet apqueluesai'a epicureos
cacpota njan po'oc apasmecja apqueluesai'a estoicos
, lhna aptaiancoc:
— ¿Selha aplheno jam enenlhet anac aplhamasammap, je?— lhna aptaiancoc Lhnac na aptaiancoc apquetlhelhma'ac:
— Malha nac apquetlhecmoscama apqueltemacja dioses mo'oc apquellawacja—lhna aptaiancoc.
19
20
Ca netamen ma'a apqueliantemecjo lhnac Pablo aquietelha apcacnecjelha apquelemjama apmaniaie apquellawacja nac ma'a acuesai'a Areopago, ca apquelelmalhneianca lhnac ma'a, lhna aptaiancoc:
— Nengelleltawec ennenco'o angeliojoc actemacja lhquec apquetlhecmoscama alhnancoc monwetai'o apsoiam lheiap—
21
Lhna aptaiancoc apquelelmalhneianca enenlhet apquelleniem'o Atenas cacpota njan po'oc enenlhet apquellelto apquellomacja njan ma'a, wanlha lhna mota apqueltemecja apquellelpencamecjo caselha acuai'a la m'a, apqueltengiai'a njan ania'a alhnancoc la'a.
22
23
Ca apquenmecjo lhnac neten Pablo apiesecsec enenlhet'awoc ma'a, lhna ptemac apquellanemo:
— Elailho enenlhet'awoc co Atenas, necsa ascaniemjaicama lhta asuet'o nquescama alietemelha apqueltacnescaseiancolha la dioses apanco'oc, apquelianwescaiacmo njan apquenmajai'a eliojoc dioses quetlhencap, asuet'o njan lhema asota metca caselha aquietnema neten, wanlha iamet acpaijema necja aquieplomo actalhesammalhca:
"Ca nque'e asota nac tacjalhet apto dios mongeluet'o mocjom" lhta ntemac actalhesammalhca. Co'o coca asuetai'ac ma'a, Engiapom Neten apuesai'a,
24
apto njan apquelanai'a nalhepop cacpota njan lhamacjo caselha lhmanquec jam, apto njan Apuesque neten cacpota njan nalhepop, melhnemac ma'a apnemacja nac pa'at apquellanai'a enenlhet apanque.
25
Mancaimommalhcac na enenlhet la apasmoma m'a ncanec apto njan aniem'o apquellaicamoc apquelliennactema, apquellaicamoc na apquelamnoma cacpota njan lhamacjo caselha alaimommalhquelha la enenlhet'awoc.
26
Ampai'acjasecjec anquec nac nanec na apquelanai'a lhema enenlhet, ca apquelleniemai'ac aplhamecjo nac enenlhet'awoc apquelloma nac lhma nquec jam, apto njan jengelliequiesquescama acnem nenteiaianlha la iantelhcapa cacpota njan apquelliequiescama acmac'acja la annemoc.
27
Apqueleltemawec nac nanec na Engiapom Neten ellempo pancawec enenlhet'awoc apquelquetansema, malha apquelpaqnemaicama la'a cacpota eluetecjac quelhaja ncanec apnec nengaqtec ennenco'o Engiapom Neten,
28
jengellanquec apmopuana cacpota angelloca mocjom.
Lhta aptemac na lhema enenlhet apmopuana eltennama iocjalhma nac jenque'e: "Ennenco'o nengellelto Engiapom Neten apquetcac" lhta aptemac
29
Jai', jawe ngiapac anque Engiapom Neten apquetcac ennenco'o, ca ncanec Engiapom Neten jawe aptonac caselha allanemmalhca aquiocja oro, tawapac alienmomo acmopai'a cacpota njan metaimong actacmanma apquellanecamoc anac enenlhet'awoc aniem'o actemacja alietnaicama apaqtec
30
Malha metca apqatco'oc enenlhet'awoc lhennenga, meliecpelquemac na Engiapom Neten, mang coca eliaqmoncasquesecjac aptaiancolha meliamolhma m'a, colhua coca apqueltawec Engiapom Neten lhamacjo enenlhet elietasquesecjoc apualho'oc ma'a.
31
Engiapom Neten alhta apqueliequiescama lhema acnem cacpota eliecpelcoc jata acpeiwomo nquec enenlhet'awoc lhmanquec jam, apqueliequiescamo njan lhema enenlhet cacpota elanac ma'a, apto lhta njan ma'a aptemescasecja mocjom apjalhnancoc apiesecsec apquenmasquenwaiacmo— lhnac ptemac Pablo.
32
Necsa apquellengai'a lhnac enenlhet'awoc actemacja nentaiecja mocjom enjalhnancoc apiesecsec apquenmasquenwaiacmo, apqueliematquesaicama lhnac ma'a, lhnac ptemac po'oc:
— Mo'oc acnem jata angetlhencasecjoc mocjom nellailhemo aplheianma lheiap — lhnac aptaiancoc ma'a.
33
Ca apteiapmo lhnac Pablo m'a.
34
Moclhem'a enenlhet nac meliasqueiacmoc apquetlhecmoscama Pablo ca apquelieplecjo njan ma'a, lhema lhnac apquemjama apmanie apto neten apiaspommap apuesai'a Dionisio apasmecja coca apqueniem'o Areopago, cacpota njan lhema nqueluana acuesai'a Damaris, cacpota njan po'oc aplhamacja m'a.