10
Apqueltennaicama Pedro ania'a actacmanma apiesecsec metno judios
1
Apnenquec nac lhema enenlhet natemma Cesarea apuesai'a Cornelio, capitan nac ma'a apto njan aplaqlecama quempocjacme apqueluesai'a Italiano.
2
Apiamolhma lhnac ma'a, wanlha
lhna mota aptacnescasecamoc Engiapom Neten acuecjo apnemolhema apquetcac. Apcaianco njan apasmoma nquescama pataccom apancoc ma'a Judios, apquenmalhnoncoma mota njan Engiapom Neten.
3
Lhema cnem nac ntemac malha la 3 ienacteso, acuetai'o lhnac apaqtec lhema Enenlhet Neten apqueniem'o Engiapom Neten aptalhnenwai'o lhnac apnacja m'a, lhna ptemac apcanemo:
—Cornelio —lhna ptemac ma'a
4
Man nac engiescamac apquelanei'o Cornelio Enenlhet Neten, apcai'ac nac ma'a, ca apquenmalhneianca lhnac ma'a, lhna aptemac:
—Se ptengio ie apuesque? —lhna ptemac Cornelio. Coca lhna aptemac mocjom Enenlhet Neten:
— Apcailhawe mota apacmetquescama Engiapom Neten lheiap, apquetsewasawec na apquelpasmomo lheiap enenlhet anac metca apquelletsecama.
5
Ellapes jata enenlhet aquieto natemma Jope, cacpota eliantenwacjac Simon, mo'oc apuesai'a njan Pedro,
6
ca apnac ma'a apnemacja nac apqueluesai'o lheme apuesai'a nac na Simon, apmacmecama nac apqueltacmelquescama caselha aiempeioc cacpota mancotuec ascoc, aquieto necja aluata aquiawai'a —lhnac ptemac Enenlhet Neten ma'a.
7
Ca aptacjemo lhnac Enenlhet Neten ma'a, ca apcaqjetaianca lhnac apquellaweianca Cornelio apcanet apquellennencasecama cacpota njan lhema soldado apancoc apiamolhma apanque,
8
ca apquelleltennascamo lhnac actemacja acuetai'a apaqtec, apquellapascamo njan aquieto na temma Jope.
9
Mo'oc acnem na ntemac apquetlhengamo m'a acuacjo na temma Jope.
Coca Pedro apnemo m'a Jope, apcanantemo lhnac neten pa'at cacpota epacmetquesec Engiapom Neten ma'a, catelho lhnac ntemac ma'a.
10
Mec nac ncaqjemac ma'a, aptoma lhnac apmajai'a niecje. Necsa apjanecja lhnac nentoma po'oc ma'a, acuetai'o lhnac apaqtec
11
acmaijecjo lhnac neten acuaiwantamo nalhepop lhema nengaqlammalhca apiawai'a, nema acnactetema 4 nepua'ac,
12
nquellienactenquec nac lhamacjo actemacja caselha neujac ma'a, alpelhiewaicama nac nalhepop cacpota njan anata.
13
Ca aplengai'o lhnac nema aliatecama, lhna ntemac:
—Pedro, ennap jam, etau jata —lhna ntemac nema aliatecama.
14
Ca apcatemmoianca lhnac Pedro m'a, lhna aptemac:
—Jawe apuesque, motomac co'o caselha neujac ncolatsecama nac malha acpaiseiam
—lhna ptemac apcatemmoianca Pedro.
15
Lhna ntemac mocjom nema alietecama:
—Apquenmopesacjec Engiapom Neten ma'a, meltamonquec alpaiseiam lheiap ma'a—
16
Janetolhem'a actaiecjo lhna ntemac ma'a, netamen acnemo lhnac aquiasecjo neten mocjom nengaqlammalhca m'a.
17
Ntaicama lhnac apualhoc Pedro m'a aniem'o acuetai'a apaqtec, apmajai'o eijoc aquietquesammalhca m'a, ca apqueluecjo lhnac ma'a enenlhet apquellapascama Cornelio, apquelelmalhneianca lhnac enenlhet apquellelto apquellawacja m'a apquenmajai'a eliojoc apnemacja Simon ma'a, netamen ma'a apqueluaiacmo njan apnemacja.
18
Ca apquelueneianca lhnac apto apnemacja m'a apquenmajai'a eliojoc apnema lhema enenlhnet apuesai'a Simon ma'a, mo'oc apuesai'a Pedro.
19
Coca Pedro aplomaca lhnac mocjom mo'oc au'alhoc pa'at neten, njeclhec nac aclheneianca apualhoc actemacja acuetai'a apaqtec ma'a, ca aptemo lhnac apcanemo Espiritu Santo:
—Apcanetolhem'a enenlhet apquelquetamac lheiap,
20
etiep jam, elieplacja ta, motnama nquec apualhoc, co'o asquellapascama m'a —lhnac aptemac.
21
Ca apteiapmo lhnac Pedro conne pa'at mo'oc au'alhoc neten ma'a, lhna aptemac apquellano enenlhet ma'a:
—Co'o Pedro ¿se lha cto jelquetamo nac que, je?—lhna aptemac.
22
Ca apquellatemmoianca lhnac enenlhet, lhna aptaiancoc:
—Capitan Cornelio lhta jengellapascama ennenco'o apqueltemo angeliama lheiap cacpota etlhecmoscacjac ma'a, apto nac enenlhet apeiwomo m'a, apqueliejecjo njan Engiapom Neten, enenlhet'awoc judios awanjec anquec apquellasecjai'o m'a Cornelio. Ca nqueniemai'ac ma'a apacmetquescamo lhna lhta lhema Enenlhet Neten cacpota jengellapacsec ennenco'o jenque'e—lhna aptaiancoc ma'a.
23
Ca apqueltemo lhnac Pedro elentelhec conne pa'at enenlhet nema alapascama cacpota enaqteianwomoc ma'a. Ca atsai'o lhnac ma'a, apqueltaqjemo lhnac cacpota njan Pedro, aplhamacja njan apqueltemo lhemec Jesucristo apquennemolhema apquellawacja m'a Jope.
24
Mo'oc cnem na ntemac apqueluecjo natemma Cesarea m'a, apquellailhenquec noca Cornelio m'a, apcanquesecjec nac na apaiomolhema cacpota njan apqueliecpelquemelha la'a.
25
Necsa apuetai'a lhnac Cornelio aplheiam Pedro m'a, apquetcaianco apquelanielhaianco lhnac ma'a, ca apquelteclheclhemo lhnac aptapno'oc lhepop napaqtec Pedro cacpota etacnescasancoc apuesai'a m'a.
26
Coca Pedro apquenencasecjec nac neten, lhna ptemac apcanemo:
—Metne jam, jawe co'o Engiapom Neten, asnawec co'o lheiap enenlhet co lha— lhna aptemac.
27
Ca apquelpaqmetquesammacpo lhnac necsa apquetlhengama m'a, apquelentalhnenwecjo njan conne pa'at, ca apuetai'o Pedro m'a apentalhnema enenlhet,
28
lhna ptemac apquellanemo:
—Apquelliawec quetlhencap jenganemacja enganco'oc negellelto judios jengascanquec ampalhacuomoc po'oc enenlhet mancotno nempaiomolhema, jangascanquec na antelhec apcacjaiancolha m'a, coca Engiapom Neten alhta jetascasac ma lhta eltac altacnewa
po'oc enenlhet, ca cto nac mancotno nempaiomolhema.
29
Ca ncanec awac co'o jenque'e. Jelleltennes nojo ¿selha ntemac jelquetansemo nac que?—lhna aptemac Pedro.
30
Ca apcatemmoianca lhnac Cornelio m'a, lhna aptemac:
—4 cnem antac aquiecai'a, malha la 3 ienaqteso lhta, necsa aspacmetquescama lhta Engiapom Neten, ca apteiapuo'o lhta lhema enenlhet apquelienmomo lhta aptalhnema,
31
lhta ptac jeiano:
"Cornelio, apneng'a lheiap apquenmalhnoncoma Engiapom Neten, apuet'ac na apquelpasmoma metca nac apquelletsecama.
32
Ellapes jata enenlhet natemma Jope cacpota eliantenwacjac Simon, mo'oc apuesai'a njan Pedro, ca apnac ma'a apnemaja apqueluesai'o lheme nac Simon apmacmecama apqueltacmelquescama caselha aiempeioc cacpota mancotuec ascoc, apnec ma'a aquieto necja aluata aquiawai'a" lhta ptac jeiano m'a.
33
Ca asquellapaso lhta enenlhet cacpota eliantementac lheiap jenque'e, apcasecjawe lhta lheiap aniem'o apiamolhma ca apquelhiacmo jenque'e, coca colhuawe nac ennenco'o nelanelhquec nengacjanco napaqtec Engiapom Neten, nemmac'ac angellailhoc aplheno lhta Engiapom Neten lheiap
—lhna ptemac Cornelio.
34
Ca apquempai'o lhnac apqueltennaicama Pedro m'a, lhna ptemac:
—Coca colhuawe nac asianwacmec nennawec emmo'oc nentemo lhemec enenlhet napaqtec Engiapom Neten,
35
apto njan ma'a apquellamelaiam enenlhet alhma nquec jam apquellelto apquellasecjai'o cacpota njan apquellanai'a nac actacmanma.
36
Apcapasque lhta Jesucristo apuesque cacpota epaiacsec ania'a jengaicamoc metca actaicama enwalhoc apiesecsec Israel.
37
Apquelliawec quetlhencap actacja lhta acuetammalhca iocjalhma Judea, lhta nquempa'ac ma'a Galilea, ca apquetlhecmoscamacja nac Juan aimommalhco ncolhec allauquesanco conne iemmen.
38
Apcanque lhta njan Espiritu Santo Engiapom Neten Jesus co Nazaret ma'a, ca apqueltacmelquescaiacmo lhta apquellelto anmaicama queliacjameioc, apquelanei'o lhta njan actacmanma aniem'o aplhelhma Engiapom Neten.
39
Neluetai'ac ennenco'o m'a actemacja apquelanai'a lhta Jesus aquieto iocjalhma Judea cacpota njan Jerusalen, netamen apmatnamo njan neten iamet actennescama,
40
coca 3 acnem alhta nwacmoc apquetsepma m'a, Engiapom Neten alhta njan aptemesquesacjac mocjom apjalhnancoc apiesecsec apquenmasquenwaiacmo m'a, neluetai'ac na ennenco'o m'a,
41
mang coca eluetai'ac aplhamacjo enenlhet natemma nac ma'a. Engiapom Neten coca njan asonquec jengeliequiescama ennenco'o cacpota angetlhenec lhamacjo actemacja neluetai'a apcaniemjaicama Jesus, nentaweicocjec na cacpota njan nengienaianque lhta njan lhemec ma'a netamen aptaiecjo lhta mocjom apjalhnancoc apiesecsec apquenmasquenwaiacmo.
42
Netamen jengellapascamo ennenco'o angelpaiacsec ania'a Engiapom Neten aptemesquescamo Jesus jengiecpelquemo apquellanecamoc caselha actacmanma ca njan ncollatsecama apquellelto apjalhnanco'oc cacpota njan apquenmasquenwaiacmo.
43
Apquetlheianmec nac nanec na apquetsecama ania'a lhennenga apuesai'a Jesus, Engiapom Neten na lhta enmasquesquesec meliamolhma apquellelto la meliasqueiam Jesus—lhna ptemac apquellanemo Pedro enenlhet'awoc ma'a.
44
Necsa apqueltennaicama lhnac Pedro m'a, acpelapquescamo lhnac apuaiwentamo Espiritu Santo tacjaplhet'oc apquellelto apquellailhemo.
45
Ca alpelapquescamo lhnac judios apancawec apquetlhelhma'ac Pedro m'a, nqueliemascanquec nac apualho'oc ma'a apqueluetai'o apuaiwentamo Espiritu Santo tapjaplhet'oc apquellelto metno judios,
46
apquelpaqmeteianca njan mo'oc apquelpaqmeiasma cacpota njan apqueltacnescaseianco apuesai'a Engiapom Neten.
47
Netamen lhna aptemac Pedro apquellanemo apquetlhelhma'ac:
—Engiapom Neten apcapascama Espiritu Santo tacjaplhet'oc enenlhet anac, nnawec na actacja lhta ennenco'o m'a. Ascanec co'o ntase angellauquesancoc conne iemmen jam —lhnac aptemac Pedro m'a.
48
Ca apqueltemo lhnac Pedro ncolhec allauquesancoc conne iemmen enenlhet'awoc ma'a aquieplomo apuesai'a Jesucristo. Awanjec nac apquelleltemo enenlhet elhnecjac Pedro m'a moc lhem'a cnem mocjom.