1
Aplhenammap ewac jata Espiritu Santo
1
Teofilo, aspenesque lhta co'o astalhescama lhema waccajac amanie nquec ma'a actemacja lhamacjo caselha apquelanai'a lhnac Jesus cacpota njan apquetlhecmoscamo lhnac ma'a, apquempaiosecja apmacmecama,
2
acuacmo m'a acnem apmeiecjo lhnac neten. Amanie lhnac apmajai'ac engiaqja' neten ma'a apquellaianco lhnac lhema apaioma aniem'o Espiritu Santo apquelleltemo eltacmelquesec lhema caselha apquellelto apqueliquiescama apostoles.
3
Apquetsepmec nac Jesus ma'a coca netamen aptaiecjo lhnac mocjom apjalhnancoc apiesecsec apquenmasquenwaiacmo, 40 cnem nac nwaiacmoc apcaniemjaicama mocjom apiesecsec apostoles ma'a apqueleltennaseianca lhna mota actemacja aptaiecja ta apuesque Engiapom Neten. Ca apquelianwecjo lhna na acto jawe ngiapac anque aptema aptaiecjo mocjom apjalhnancoc apiocjo
panquec ma'a.
4
Ca apqueltennascamo lhnac lhema apaioma, lhna ptemac:
— Melacta panquec Jerusalen acuacmo ta acnem acuai'a lhema caselha aplheianmo lhnac Engiapom Neten, asquelleltennasque lhta njan co'o lha secje lhta m'a caselha nac.
5
Jawe ngiapac anque lhta m'a apquellauquesanco lhta conne iemen enenlhet'awoc Juan ma'a, coca quetsec na ncaimelhca cnem ncoitec na quetlhengcap aclanei'o Espiritu Santo—lhna aptemac apquellanemo Jesus ma'a.
6
Ca apquelelmalhneianca lhnac ma'a, lhna aptaiancoc:
—Apuesque ¿colhua nlho pmac'ac ellancoc apuesque panco'oc apancawec co Israel, je?
—
7
— Ma, mancoietoc eliojoc quetlhengcap ma'a, Apiapom coca nietnac apmopuana cacpota elhenec ma'a.
8
Etlhewancoc jata apquenmopuanca'a quetlhengcap ma'a apuo'o ta Espiritu Santo, enmancoc jata lhma nquec jam, Jerusalen, Judea, Samaria, acuacmo actacja mocjec anquec aujoc lhepop mo'oc apquellawacja. Eleltennasama ta aplhamacjo enenlhet'awoc actemacja apqueluetai'a lhamacjo caselha asquelanai'a lhta —lhna ptemac Jesus ma'a.
9
10
Ca acpelapquescamo lhnac apqueluetai'a apostoles nema aquiantemecja neten Jesus ma'a acuacjo allapacjo iepjopai'a, nquelpelapquescanquec nac na apquelentaipuei'o apcanet enenlhet napactawec ma'a, apquenmopai'a lhnac apquelentalhnema m'a, lhna aptaiancoc enenlhet:
11
—Enenlhet'awoc co Galilea, moltama nquec apualho'oc actacja nac apqueluetai'a lhquec nema aquiantemecja neten Jesus, ncolhojoc jata actacja nac apqueluetai'a apuactamo ta mocjom Jesus jenque'e —lhna aptaiancoc ma'a.
12
13
Pedro lhnac m'a cacpota njan Juan, Santiago, Andres, Felipe, Tomas, Bartolome, Mateo, Santiago Alfeo apquetca, Simon apto lhna mota apcammelhaicama apuesque Roma cacpota njan Judas Santiago apquetca, coca m'a apquellelto lhnac apqueluetaianco m'a aquieto lhienep acjaiam Olivos, netamen apqueltaqjemo lhnac ma'a aquieto Jerusalen, nengaqtec nac Olivos ma'a, ncanec jenganemacja apanco'oc man na ncoltemac etlhong taiepec la'a acnem sabado apcacjaicocjelha lhna sonquec ma'a. Ca apqueluecjo lhnac apcacjaiancolha m'a, apquelcanetuecjo lhnac aquieto neten pa'at ma'a.
14
Aptaiancolha lhna mota apquelpacmetquescama Engiapom Neten ma'a, cacpota njan apcaqnecjo lhnac lhemec na moclhem'a nqueluana'ac, Jesus anquen nac ma'a acuesai'a Maria cacpota njan apquelialheng'a m'a.
15
Lhema cnem nac apquelpaqmetquescamac Pedro m'a apquellelto Jesus apquelieplecama, apcacnecjec nac malha 120 enenlhet'awoc ma'a, lhna ptemac:
16
—Elialheng'a, nietawec anquec acuai'a actemacja actalhesammalhca waccajac jenganemacja lhennenga
aplheianmo lhnac nanec apiau'acja apuesque David aniem'o Espiritu Santo actemacja Judas apquelanai'a, apto lhta aplaqloiam enenlhet cacpota elpatjetec Jesus ma'a.
17
Coca apto lhta niecje netlhelhma'ac Judas ma'a, nenmacmecamo lheme' lhta njan.
18
Coca aptacnonwacje lhta Jesus ma'a, ca apmo lhepop patacom aplhewai'a lhta aquianmoma lhta Jesus apiamasma m'a. Ca apteiaiacmo lhnac na Judas ma'a, acmeientamo lhnac na coneng apqatec, apquetsepmo njan. Mpaclhemawec nac na apqatec ma'a, alenteiapmo lhnac na apjapancoc.
19
Lhamacjo enenlhet Jerusalen alhta apquellengai'a actemacja ania'a m'a, ca apqueltemescaso lhta acuesai'a lhepop anac ma'a Haceldama, nema altema coca iocjalhma aquietnemacja ema.
20
Lhnac na nec ntemac actalhesammalhca waccajac Salmos alientemommalhco aclheianma m'a:
« Etnecjac jata ta metca temma au'alhoc pa'at apancoc, mamma ta enenlhet elhec ma'a»
«Po'oc enenlhet jatoca eiaqmonquesec apmacmeiancolha m'a» lhna ntemac waccajac actalhesammalhca.
21
Apcacjanquec enenlhet jenque'e netlhelhma'ac alhta mota necsa apnema lhta apuesque Jesus jenque'e,
22
ampai'o lhta njan jengelieplecama m'a aplauquescamacja lhta conne iemmen Juan Jesus ma'a, acuacmo njan apmeiacjo neten.
Ntasec angeliequiacsec lhema enenlhet la'a cacpota jengelpasmecjac ennenco'o netlheianma actemacja neluetaianco aptaiecja lhta mocjom apjalhnancoc Jesus apiesecsec apquenmasquenwaiacmo— lhna aptemac Pedro
23
Coca apcanet nac enenlhet apqueliequiesammap ma'a, lhema apuesai'a Jose Barsabas mo'oc nemaltema coca apeiwomo, po'oc noca apuesai'a Matias.
24
Ca apquelpacmetquescamo lhnac na Engiapom Neten ma'a, lhnac aptaiancoc:
—Apuesque, apiecpelquemo lheiap lhamacjo actemacja atlheianma enwalho'oc ennenco'o, nengeltawec jengeluetasquesec lhema pjapac jenque'e enenlhet anac apcanet, sec la enenlhet apqueliequiescama lheiap que,
25
cacpota etnesquesec apostol apiaqmonquescama Judas alhta apiengiecja, apmaianco mo'oc necja aquietemo nquec apquelanai'a aniem'o meijamolhma' m'a —lhna aptaiancoc ma'a.
26
Netamen ma'a apquellanei'o lhnac nennactewascama nemmapseiwe m'a, apiepjonwaiacmec nac Matias, ca apalhacuaiacmo lhnac ma'a 11 apostoles.