2 ^{1 2} Motnaienta co'o amaica jam ncanec mancomajai'ac allaiosesquesec apualho'oc aniem'o asquelelpalhencasecama quetlhencap jam, melpaisecjec quelha njan ewalhoc quetlhencap asuactamo la jam. ³ Ca nqueniemai'ac ascapascamo lhta waccajac jam astalhescama ncanec mancomajai'ac alelpalhencasama napaqtawec quetlhencap, mancomajai'ac na aluetac anmaiosac'ac apualho'oc quetlhencap jam, wanlha coca asqueltemo ncolpaijecjoc lhemec ewalhoc co'o quetlhencap. ⁴ Nesca astalhescama lhta waccajac alhta awanje lhta actaicama ewalhoc acuacmo asueno njan ncanec ma lhta ncomac'ac allaiosesquesec apualho'oc quetlhencap aniem'o asqueliennai'o aspaioma astalhescama waccajac, wanlha coca asqueltemo allelpeiwescasecjac cacpota ellapuanac etnancoc apquelpeiwomo aniem'o njan co'o asquellamelaiam quetlhencap. ⁵ Ca enenlhet alhta apcaiosesquescamo nac ewalhoc, malha lhta nja ntac apquellaiosesquescama apualho'oc na quetlhencap ma'a, ⁶ apqueliaqmoncasquesecjec coca quetlhencap aptemacja m'a enenlhet, metca toca mocjom ma'a, ⁷ colhua coca ntasec enmecjoc mocjom tacja m'a, elpaiesquescamoc na apualhoc cacpota ncomascoc aquiawecamoc aquiaqjapma acmaiose apualhoc ma'a. ⁸ Jai, eltacmelquesques jata njan apcaniemjaicama m'a cacpota eijanwomjoc mocjom apquellamelaiam quetlhencap ma'a. ⁹ Ca waccajac alhta astalhesquescama asmajai'a aijoc quetlhencap apquellelijecjawec quelhaja. ¹⁰ Coca apquenmacjo ta tacja mocjom enenlhet anac, co'o ta njan amecjoc tacja enenlhet anac jam malha napaqtec na Cristo, ncowac actacmanma apquellaniemjaicama aplhamacjo pancawec quetlhencap ma'a. ¹¹ Coca mangenmacjo la tacja enenlhet anac ma'a, ncolhec jata jengelhpanqueso m'a aniem'o satanás, ntengiama mota ncolanac caselha ncolatsecama m'a. ¹² Smac'ac aleltennasama quetlhencap asmeiacjo lhta aquieto natemma Troade cacpota altennama ania'a actacmanma aplhenammap Cristo apto Apuesque, apquelpenesawe lhtoca apquenmajai'a ellailhoc asqueltennaicama m'a, ¹³ coca ntama lhta ewalhoc co'o m'a ncanec ma lhta atac stema eialheng Tito, ca asquelpaiwesanco lhta m'a, asmeiacjo lhta Macedonia. ^{14 15} Jai, gracia stac co Engiapom Neten ncanec jengeltemesquescama jengeliepjonwescaiacmo mota aniem'o njan nelpasmecja Cristo, jengenmaianca njan cacpota angelpaiacsec ania'a actacmanma aplhenammap Cristo lhmanquec jam. Ennenco'o nengellelto napaqtec Engiapom Neten malha actonac acmases aimes la nentecjanma, acpaijecja lhmanquec jam apiesecsec apquellelto ta apqueluoncasemmap tep, apiesecsec na apquellelto meluoncasemmap jata tep, ¹⁶ coca m'a ntacjec ncomases aimes nquennapquec najan apiesecsec ma'a apquellelto nac meluoncasemmap jata tep, coca m'a ntacjec acmases aimes jengaicamoc na aquiennactema ennengiec apiesecces apquellelto nac apqueluoncasemmap jata tep. !Nientelhec anquec nenmacmecama jengelpecquencasecjo Engiapom Neten ennenco'o! ¿Se lha enenlhet engiapuanac ma ie, je? ¹⁷ Moclhem'a enenlhet apquelleltennama ania'a actacmanma apquelleltema ncoltacmelquesquesec apquellaniemjaicama apanco'oc apancawec, ennenco'o coca mantancoc ma'a, Engiapom Neten jengellapascama, apiawec najan metca nentengiaicamoc enganco'oc engancawec caselha altacmelquescama la nellaniemjaicama, enwanca'ac coca angellanancoc aniem'o njan nelpasmecja mota Cristo.