1 ¹ Co'o Pablo, Silvano, cacpota njan Timoteo, nquetlhenquec engellualhoc engelialheng'a apcacjanco jamTesalonica, apquellelto apquelpasmecja Engiapom Neten apto engiapma'ac cacpota njan apuesque Jesucristo. Nengelleltawec na Engiapom Neten ewaiwesentac nengamelaiam, metca actaicama enwalhoc tacjaplhet'oc quetlhencap. ^{2 3} Nelelmalhnescasque mota ennenco'o Engiapom Neten apto engeliapma'ac cacpota elpasmoc quetlhencap ma'a, nentanquec na gracias ma'a. Nquetlheianwecje mota enwalho'oc acnaicamo lhta aliennactema meliasqueiam quetlhencap nqueltemesquescanque lhta aquiawai'a apquenmacmecama, apquellasennaianca lhta njan po'oc aquieplomo apquellamelaiacmo, nnaianque lhta njan alleljalhnecamoc apualho'oc ncowac ma'a apquelpasmoma apuesque engancoc Jesucristo. ⁴ Quetlhencap elialheng'a, apquellamelaiam Engiapom Neten, nelliawec ennenco'o apto njan apqueliequiescama m'a. ⁵ Jawe wanlha mo'oc engatno'oc alhta nentancoc necsa neleltenascama lhta ania'a actacmanma apiesecsec quetlhencap jam, nellan'a lhta njan caselha jempelapquescama aniemo apmopuana Engiapom Neten cacpota njan Apualhoc apanque nac ma'a. Ca altemesquescamo lhta iocjalhmec anque apqueluetai'a caselha aniem'o ania'a actacmanma lhta nelleltennascama quetlhencap ma'a. Jai, apquelliawec quetlhencap wanlha lhta mota nengelleltemo ncoltacmelec apcajaicamoc necsa nengacjenweiam lhta jam. ⁶ Apquetlhenquescanquec quetlhencap jengeluanecamo nentaiancolha ennenco'o cacpota njan aptemacja lhta Apuesque, awanje lhta niecje apquellengaianco aquientalhnema quetlhencap jam, ncacjo lhtoca apquenmaianquec tacja ania'a actacmanma aquieplomo alpaijecja apualho'oc aniem'o Engiapom Neten Apualhoc ma'a. ⁷ Netamen apqueluaneianco lhta njan aptaiancolha quetlhencap aplhamacjo apquellelto nac meliasqueiam ma'a aquieto iocjalhma' Macedonia cacpota njan Acaya. ⁸ Apquelpaiesque lhta njan ania'a actacmanma quetlhencap ma'a aquieto Macedonia canjan Acaya, lhamacjo aiempec nnec aliojo quetlhencap aquietnema meliasqueiam Engiapom Neten, mangcaimelhcac ennenco'o angetlhenama apqueluesai'a quetlhencap ma'a. ⁹ Apquetlheianma apancawec na lhta njan quetlhencap ma'a jengenmaianco tacja actacmanma necsa neluaiam alhta jam, ca apqueliengiejo lhna lhta njan caselha aquiocja la alanemmalhca, apquelietasquesecjo lhna lhta njan apualho'oc Engiapom Neten apto mengietsepma, apto njan jawe ngiapac anque ngiapom ma'a. Ca apquellempaiacja lhna lhta njan apquellasennaicama Engiapom Neten ma'a, ¹⁰ apquelleljalhneianca lhna lhta njan Apquetca Jesus apto lhta njan aplhatecjanweiam apiesecsec apquenmasquenwaiacmo engielhiemoc ma'a neten ewatamoc mocjom jenque'e cacpota jengeluonquesec tep ennenco'o necsa acuai'a ta apiacmoncasecja apqueltemacja ncollatsecama enenlhet'awoc jalhmanquec jam.