6
Nellanecja engancawe' nelammelhammalhca nengiesecsa
1
Quetlhencap elialheng'a, aquietno la apquellammelhammap apcacjaicamoc apiesecsec jam, metengiamo nquec jengiecpelquemo ngiapom metno Jesucristo apnemolhema cacpota enmasquesquesec apquellammelhammap ma'a, coca ntasec ma'a etengiancoc lhema jengiecpelquemo ngiapom Jesucristo apnemolhema la'a apiesecsec quetlhencap jam.
2
Quetlhencap apquellelto nac Jesucristo apquennemolhema etnancoc jata apqueliecpelquemo aplhamacjo enenlhet'awoc alhma nquec jam, apuanca'ac na colhuawe nac eliecpelcoc quetsec la apquellammelhammap apiesecsec anac quetlhencap jam.
3
Angelliecpelcoc jata njan enenlhet neten ma'a, tep anque lhmoc mancomanieme angeliecpelcoc nelammelhammalhca la jenque'e nalhepop anac
4
Mancaimelhcac etengiancoc quetlhencap jengiecpelquemo ngiapom metno Jesucristo apnemolhema cacpota ellanescasecjac apquellammelhammap la jam.
5
Enmancanwom coca aptaiancolha nac ¿Mamma nlho apiesecsec anac quetlhencap lhema engialheng apmopuana la ellanescasecja apquellammelhacpo la'a, je?
6
Mancolatsema nquec apquellammelhammacpo apancawec apiesecsec anac jam, coca tep anquec ma'a ncolatsecama apquelioiacmo mota jengiecpelquemo ngiapom metno Jesucristo apnemolhema cacpota enmasquesquesec ma'a.
7
Mancolatsema nquec apquellammelhammacpo moc apancawec apiesecsec anac quetlhencap jam, ¿ntase nlho eluascapecjo quetlhencap mancoieto la nema allanei'o, je?¿ntase nlho njan eluascapecjo cno la almenielhcaso caselha apanco'oc, je?.
8
Quetlhencap coca apqueliaqmoncasacjec actacja la nema allanei'o ncolatsecama, apquellan'ac ncoitemo m'a, apquenmenielhquescasquec na caselha apanco'oc po'oc apiesecec anac jam.
9
10
¡Ellajo ta m'a! enenlhet la'a apqueltemenweiacmo lhma metnanquec Engiapom Neten apquennemolhema', aquellelto la apquellanactema, apqueltacnescasecamoc caselha aquiocja alanemmalhca, apnaqtewascamo apnaqteianca'a, aptaicamoc iama nqueluana'ac, apquenmecja apquenno lheme',
apquenmenielhaicamoc, apquenmasmo caselha apanco'oc, anmen ato'oc, apqueltacnewaicamaja, apquenmopuanca'a eliennenquesec po'oc. Ca lhamacjo nac jenque'e mancotnesquesanquec jata Engiapom Neten apquennemolhema.
11
Aptaianquelha lhta njan quetlhencap lhennenga caselha ncolatsecama nac, colhua coca nnenquec acnalhuatescamo' iemmen, cno njan alpocquencaso Engiapom Neten la apanco'oc, nnenquec na altemesquescamo apquelpeiwomo aniem'o apuesque Jesucristo cacpota njan Espíritu apancoc Engiapom Neten.
Ntasec angellanancoc actacmanma
12
Ca aptaianco mota enenlhet:
—Ewanquec co alanac asmac'acja alanac— ca aptaianco mota m'a.
Jawe quelha ngiapac, coca mancolatsama ta m'a apquelan'o ta apquenmac'acja la ellana, mellanco nquec nconmama anmajaielha la apualho'oc.
13
Ca aptaiancoc na apquetlheianma enenlhet'awoc:
—Nentoma ancoc anquec enwacmo, cacpota njan enwacmo' ancoc anquec nentoma—ca aptaianco mota m'a.
Jawe ngiapac ma'a, coca Engiapom Neten jatoca enaqtewasecjac ma'a janet anac.
Coca nengiocja nac jawe antec ancoc nenmensanweiam alhma', coca nengiocja nac antec ancoc jengasennaicama Apuesque, ncanec apancoc ma'a.
14
Aptemacja lhta Engiapom Neten aptemescasecjo lhta apjalhnancoc apiesecsec apquenmasquenwaiacmo Apuesque, jata nja ncotnec ennenco'o m'a aniem'o apmopuana.
15
Asqueltawec elianwomjoc quetlhencap apqueliocja nac malha njan Cristo apiocja. ¿Ntase nlho ncoipetcac apqueliocja nac, aliocja nqueluana'ac allanactema, je? ¡Ma, mancolatsemaja!
16
ncanec apqueliepeccanwacmo la m'a, malha lhema ntocjac aliocja m'a. Ca ctemo nac na actalhesammalhca waccajac Engiapom Neten apaioma:
«Ca janet anac ntacjec malha lhema aliocja»
17
Coca apquellelto nac apquelpasmecja Apuesque, malha lhema ntocjac na apualho'oc ma'a.
18
Mellanco nquec nconmama m'a apualho'oc nenmajai'o nac anmenso'oc, ncanec acto tep anquec actewascama apqueliocja nac ma'a, mancolhnoc aclhamacja nac ncollatsecama apquellanai'a.
19
Ca apqueliocja nac quetlhencap malha pa'at apnemacja Espiritu Santo apquellaicamo lhta Engiapom Neten, jawe apanco'oc apqueliocja apancawec quetlhencap, coca apto apancoc ma'a Engiapom Neten.
20
Apianmoncasque lhta njan apqueliocja nac quetlhencap, ca ncanec ntasec elpocquenquesec apanco'oc apancawec cacpota ellasennama Engiapom Neten.