15 ¹ Quetlhencap elialheng'a asqueltawec co atlhenquescacjoc apualho'oc actemacja lhta asqueltennaicama ania'a actacmanma apiesecsec quetlhencap jam, apquenmaianque lhta tacja, ncoijec na aptaicamoc meliasqueiam acuacmo nenwanlha nac. ² Eluoncasacpoc jata tep meluatesanco la aptaicamoc meliasqueiam ania'a actacmanma nac, coca apqueluatesanco la m'a, acjemo ta ncotnec meliasqueiam alhta. ³ Asquetlhecmosque lhta co'o quetlhencap ania'a nac acnemo lhta njan jetlhecmoscamo co'o, actemacja nac apquetsepma lhta Cristo aniem'o mangeliamolhma, ca ntemac nac aclheianma waccajac Engiapom Neten apaioma m'a. ⁴ Nnenquec nac aclhenquescaiacmo njan metaimong alhua apjapac ma'a, nemo njan aclhatecjasqueiacmo necsa apquetsepma m'a acuacmo janetolhem'a acnem, ca ctemo nac na aclheianma Engiapom Neten apaioma. ⁵ Netamen apuetasquesammacpo lhnac na Cefas ma'a cacpota njan 12 apqueltamesaicamoc alhta, ⁶ netamen apqueluetasquesammacpo lhnac na mocjom malha tep 500 engelialheng'a m'a necsa apcacnaicama, moclhem'a apquelloca mocjom nenwanlha nac, aplhamacja coca apquelletsepquec ma'a. ⁷ Netamen na apuetasquesacpo Santiago cacpota njan aplhamacjo apostoles. ⁸ Netamen, alhaie nquec jetasquesacpo lhta njan co'o, malha actonac nematca aquiecai'a nac acnem apteiaianlha. ⁹ Jai, co'o njan asto acmase lhte asiaspommalhca apiesecsec anac ma'a apostoles, nwannammalhquec ewalhoc atnec apostol ncanec asmenlhenaicama lhta Engiapom Neten apquennemolhema. ¹⁰ Ncacjoc coca Engiapom Neten jeiaianque lhta apanque astema apostol aniem'o apiamolhma panquec ma'a, jawe acjemo asmacmecama, astengiai'o eiempec alhta njan, aselhtec ma'a apostoles alhta, coca jawe asiennactema ejencoc ejenque', coca aniem'o jeiaicamoc ma'a Engiapom Neten jetnema mota aplhelhma m'a. ¹¹ Acnemo mo'oc coca niecje njan neleltennaicama ania'a actacmanma astemo lhemec apostoles anac cacpota njan co'o, ca ania'a actacmanma nac meliasqueiacmo lhta njan quetlhencap ma'a. ¹² Ennenco'o netlhecmoseianquec actemacja nema aclhatecjasqueiam necsa apquetsepma Cristo ¿Se lha ntemac moclhem'a quetlhencap apquetlheianmo nac menaclhatecjanwomec apqueletsepma nac, je? ¹³ Ca menaclhatecjanwacmo la apqueletsepma nac ma'a, melhatecjangwome lhta njan Cristo m'a. ¹⁴ Lhta melhatecjangwacmo la Cristo, acjemo ncotnec nelleltennaicama ania'a actacmanma, acjemo nja ncotnec meliasqueiam anac quetlhencap. ¹⁵ Malha nja ncotnec ennenco'o quetsecama ania'a la apquenmopuanca ania'a netlheianma Engiapom Neten aplhatecjasqueiam Cristo necsa apquetsepma, ncanec moclhem'a quetlhencap apquetlhenque mota metca apnaclhatecjanweiam enenlhet apquelletsepo la'a. ^{16 17} Acto la iocjalhmec ma'a metca apnaclhatecjanweiam apqueletsepma nac, melhatecjanwome lhta njan Cristo m'a, acjemo lhta nja ncotnec meliasqueiam anac quetlhencap, nconmama njan mocjom maniamolhma nac, ¹⁸ meluomec na tep apquelletsepma nac apquellelto lhta meliasqueiam Cristo. ¹⁹ Ca apto la jawe ngiapac anquec wanlha nquec ncotnec lhema jempasmoma Cristo necsa nenganiemjaicama jenque'e tacjalhet lhepop anac, mamma quelha ncotnec ma'a aquieto mancolha acnem, engiosac'ac jata ncotnec ennenco'o m'a. ²⁰ Aplhatecjanweiacmec coca Cristo m'a, jawe ngiapac anquec ma'a, apmanie panquec aplhatecjanweiam ma'a, malha actonac amanie nquec anammalhca actecteiapma nac. ^{21 22} 21–22 Acuai'o lhnac nanec nengetsepma nac aniem'o lhema enenlhet apuesai'a Adan, acuai'o njan nenlhatecjanweiam anac necsa nengetsepma aniem'o njan lhema enenlhet apuesai'a Cristo. ²³ Apmanie aplhatecjanweiam alhta Cristo ncanec apto neten apanquec ma'a apiaspommap, netamen apuactamo ta mocjom ma'a, enaclhatecjanwomoc jata m'a apquellelto nac apquennemolhema apancawe nac, ²⁴ netamen jata m'a ncowomoc actacja nnelha acnem, coneng jata eltemescasecjac Cristo apqueluescai'e, cacpota njan nema apqueliennactema nac, engianconwacjac jata apientalhnemo m'a Engiapom Neten tacjalhet'oc lhamacjo caselha lhmanquec jam. ²⁵ Jai, etnec jata apuesque Cristo acuacjo apqueltemescasacjo coneng allelto alammelhaicama la m'a, ²⁶ alhaie nquec jatoca emasquescamoc acuesai'a nac nengetsepma. ²⁷ Apcanquec Engiapom Neten Cristo apmopuana cacpota etnec apuesque tacjalhet'oc ma'a lhamacjo caselha lhmanquec jam, coca jawe etnec ma'a apuesque tacjaplhet Engiapom Neten ncanec aniemai'o njan apcaicamoc apmopuana m'a. ²⁸ Jata acuo'o ta acnem Apquetca aptemescasecja coneng alammelhmacja nac lhmanquec jam, netamen etacjesoc jata apmopuana apcaicamoc alhta Engiapom Neten cacpota etnescasecjac apientalhnemo apanquec tacjalhet'oc lhamacjo caselha lhmanquec jam. ²⁹ Jai, jawe ngiapac anquec enaclhatecjanwomoc jata apquelletsepma nac, ca nqueniemai'ac ma'a apquellauquesammacpo na apancawe iemmen moclhem'a quetlhencap apiaqmoiecja la lhema enenlhet apquetsepma. ³⁰ Metco la nenlhatecjanweiam necsa nengetsepma, acjemo ncotnec nellengaianco aquientalhnema necsa neleltennaicama ania'a actacmanma nac. ³¹ ¡Mou, co'o lhta laie, atlhenquescamo mota amatong ma'a, jawe ngiapac anquec astacja nac! Coca malha acpaiescaiam ewalhoc ma'a aniem'o aptaicamoc apuesque Jesucristo apquennemolhema quetlhencap. ³² Asquennapommalhquec enenlhet co Efeso malha caselha neujac la acloma m'a, malha acjemo lhta njan ncotnec metco la nennaclhatecjanweianlha. Acjemo lhta njan ncotnec astengiai'o eiempec ma'a, ntase niecje antancoc apquetlheianmo na mota enenlhet ma'a, "mongacsec antanwancoc nentecamoc, mongacsec na angiennancoc, acjemo neltacmelquescama engiempeioc anac, mongellapuanquec na angenmancoc neletsepma nac" ca aptaiancoc ma'a. ³³ Mellanco nquec eliennenquesec quetlhencap ma'a enenlhet'awoc anac meliamolhma, meltamanquec apquetlhelhma'ac ncanec ellecjoc meliamolhma m'a. ³⁴ Coca quetlhencap colquetamamoc amota apualho'oc ellanancoc caselha altacmelo, eliengiecja coca njan caselha ncolatsecama nac, apcacjaianquec nac na enenlhet'awoc apiesecsec anac quetlhencap meliojo' mocjom Engiapom Neten, coca jengenmancascama apancawec quetlhencap jam.

Nennaclhatecjanweiam jata alhnancoc nengiocja

³⁵ Moclhem'a quelha quetlhencap ncotnec atlhenaicama apualho'oc co la ta ncotnec nennaclhatecjanweiam jata netamen nengetsepma, niejec jatelha njan actemacja nengiocja nac, ³⁶ coca melianweiacmo enenlhet'awoc anac ma'a. Ncotnec jata malha actonac actec anac anammalhca, amanie angatonnec ma'a, ncomaijecjac aiempec lhec, netamen ncotectepoc ma'a. ³⁷ Apactec lhec nengatonnema trigo nlho ca la njan mo'oc actec, ncoiaqmocjac mo'oc actemacja actectepo la'a, ³⁸ netamen Engiapom Neten coca apqueliequiescasecamoc ellancoc malha aliocja alpalhcammalhca coca, metca acnemo mo'oc, moclhem'a actec altecteiapma alpalhcammalhca njan ma'a metca njan acnemo mo'oc. ³⁹ Nnawec na m'a apiocja nac enenlhet, moc actema aquiocja nac na caselha neujac, canja ntac anata nac aquiocja, moc actema m'a, cacpota njan quelasma nac aquiocja ⁴⁰ Nietnec na altacmelo aliocja m'a caselha acnaianco nac neten, nietnec na altacmelo aliocja caselha nac jenque'e nalhepop, coca alpalhcammalhca metca acnemo mo'oc ma'a. ⁴¹ Aponmatema nac acnem jawe aptonac pelten apcaponmatema cacpota njan moc actema apquellaponmatema iau'a, nietnec na apiesecsec anac apquellaponmatema alpalhcammalhca m'a, metca apnemo po'oc. ^{42 43} Jata ncotnec ma'a apiocja enenlhet aplhatecjanwacmo ta necsa apquetsepma, ncoiaqmocjac jata mo'oc apiocja, moc actema ta ncotnecjac ma'a. Ncocpelcalhcac coca apiocja atonnammalhca m'a, coca aplhatecjanwacmo la'a, mancocpelcalhquec metca actemonwaiam annelha. ⁴⁴ Atonnammlhaca nac apiocja enenlhet apanquec ma'a malha actonac actec atonnammalhca la'a, coca aplhatecjanwacmo la alhnancoc apiocja m'a aniem'o njan Engiapom Neten. ⁴⁵ Ca actemo nac actalhesammalhca waccajac Engiapom Neten apaioma: «Nnenquec nac aianco aquiennactema apcanemjaicama apmanie panquec enenlhet apteiapma apuesai'a Adan» Coca malha alhaiec anquec apquemjaiam malha Adan coca apto apuanmoncoma jengaicamoc nengiennactema. ⁴⁶ Apmanie lhnac nanec apteiapmo m'a enenlhet apanquec nenmopuana anwetac apiocja, netamen apuai'o njan enenlhet malha nema acuanmoncoma aniemai'o neten. ⁴⁷ Jai, apmanie lhnac nanec nema alanai'a enenlhet apanque apqueniemai'o m'a nalhepop, netamen na enenlhet apqueniemai'o njan ma'a neten. ⁴⁸ Lhamacjo ennenco'o nellelto nelloma nac mocjom tacjalhet lhepop, nietnec nelliocja malha enenlhet apiocja apquelanemmacpo lhnac nanec apqueniemai'o nalhepop, coca lhamacjo apquellelto apquelloma nac neten, nietnec apquelliocja malha apiocja m'a enenlhet apqueniemai'o m'a neten. ⁴⁹ Ca colhuawe nac nelliocja nac malha apiocja m'a enenlhet apquelanemmacpo lhnac nanec apqueniemai'o nalhepop, coca alhaiec jata m'a mo'oc nelliocja malha enenlhet apqueniemai'o neten. ⁵⁰ Quetlhencap elialheng'a, smac'ac alhenec actemacja nengiocja nac, awanque ncotnec apac, ncolhpocjalhca ncomasquenwomoc najan, ca nqueniemai'ac ma'a mancawanquec ncomjancoc aquieto iocjalhma mancomasquenwaiam anac nengiocja, aptemacja nac na Apuesque Engiapom Neten ma'a. ⁵¹ Colhua smac'ac aleltennacsec na caselha aquielhammalhca nac ncowac jata jenque'e, jata acuo'o ta acnem ma'a moclhem'a ta elloca mocjom apjalhnancoc, aplhamacja ta njan apqueletsepma nac, coca nenlhamacjo ta nempasmecja antancocjac aliaqmoiecja mo'oc nelliocja. ⁵² Pelapquescama ta ncowac acnem anac ma'a, monwetanque ta ncowac ma'a, ncopaioc jata njan trompeta, enaclhatecjanwomoc jata apqueletsepma nac cacpota elloca m'a mancotnenwaiam annelha, canjan ennenco'o neliocja nac ncoiaqmocjac jata mo'oc. ^{53 54} 53–54 Nelliocja nac awanque ncotnec apac ncosaujalhcac najan, ncoiaqmocjac jatoca mo'oc nelliocja m'a metca acmasquenwaiam najan, nelliocja nac nquetsepque mota, ncoaiqmocjac jata mo'oc nelliocja mancomowana ncotsepoc, angeluetac jata aclheianmo lhnac nanec Engiapom Neten apaioma, lhnac nane ntemac: «Aptewasquec nengetsepma nac apto apiepjonweiacmo. ⁵⁵ Ca nengetsepma nac mancawanquec mocjom jentemescasenta coneng, mamma nja ntacjac jewa ancoc cacpota jengelieclha niecje mocjom ma'a» ⁵⁶ Nengetsepma nac jengaqjaie aquieplomo acmaicama malha jewa ncoc acuesai'a maniamolhma, coca jenganemacja nac acto acuetasquescama apquelanai'a la meijamolhma enenlhet. ⁵⁷ Coca gracias Engiapom Neten jengellaianco nenmopuanca'a cacpota angeliepjonwomjoc ennenco'o m'a, aniem'o njan apuesque engancoc Jesucristo. ⁵⁸ Quetlhencap elialheng'a asquellamelaiam, elienna ta metca apqueluatesaicamoc na apquenmacmesaicama Apuesque engancoc anac, jawe aqjemo njan apquenmacmesaicama quetlhencap ma'a.