1 1 Co'o Pablo asto jeliequiescama lhta Engiapom Neten cacpota atnec apostol Jesucristo apancoc, alhelhma njan jenque'e eialheng Sostenes. 2 Nquetlhenquec engellualho'oc engellialheng'a apcacjanco jam Corinto, apquellelto nac apquelpoccanma Cristo Jesús cacpota ncowac actaicamoc Engiapom Neten apquennemolhema, apquelpasmecja njan aplhamacjo lhmanquec jam apqueltacnescasecamoc apuesai'a Jesucristo, apto apuesque apanco'oc cacpota njan apuesque engancoc. 3 Asqueltawec Engiapom Neten cacpota njan Apuesque engancoc Jesucristo ewaiwesentac tacjaplhet'oc quetlhencap apquellamelaiam cacpota njan metca altaicama apualho'oc. 4 Astec co mota gracias Engiapom Neten ncanec awanjec anquec apquellamelaiam ma'a, apquellaianco njan ania'a actacmanma aplhenammap Cristo Jesús. 5 6 Ca anantaianco njan apualho'oc anmama ania'a nac, aliennactemo njan, apquelpasmomo njan Cristo cacpota apquelianwesquescaiacmo, apquenmopuanco njan apquelpaiescamo ania'a nac. 7 Jai, apquellanque lhta Engiapom Neten metca aquianmoma lhamacjo caselha altacmelo alaimommalhquelha la'a, colhua coca mamma aimommalhca caselha necsa apquelleljalhanma apteiapuo'o ta apuesque engancoc Jesucristo. 8 Engiapom Neten jata etnesquesancoc alliennactema meliasqueiam acuacmo actacja nnelha cacpota melhenec po'oc meijamolhma napaqtec apuesque engancoc Jesucristo apteiapuo'o ta m'a. 9 Engiapom Neten apto apquellawecama quetlhencap cacpota etnancoc apquelpasmecja apquetca Jesucristo apuesque engancoc, apieplaucasque mota njan atacja la apaioma aplheianma m'a.
Actacmanma antancoc nempasmecja
10 Quetlhencap elialheng'a, asquelelmalhnescasquec aquieplomo apuesai'a apuesque engancoc Jesucristo ntasec etnanco mota acnemo mo'oc apualho'oc apiesecsec anac quetlhencap jam, metca njan apquelhpanquesammap, wanlha etnancoc apquelpasmecja jam. 11 Ca ncanec co'o atnec aspaioma alanac quetlhencap aniem'o lhta aslengai'a, jeleltennascama ania'a apquennemolhema Cloe, apqueliamenammap amota quetlhencap jam. 12 Lhna lhta aptaiancoc moclhem'a jenque'e: —Ennenco'o nelieplaucasac jengetlhecmoscama Pablo —lhna aptaiancoc ma'a. Coca napocja lhna aptaiancoc: —Ennenco'o coca nelieplaucasac jengetlhecmoscama Apolos — lhna aptaiancoc ma'a. Po'oc nac na aptaiancoc: —Ennenco'o coca nelieplaucasac jengetlhecmoscama Cefas— lhna aptaiancoc. Aplhamacja lhnac na aptaiancoc: —Ennenco'o coca nelieplaucasac jengetlhecmoscama Cristo—lhna aptaiancoc. 13 ¡Coca wanlha lhema apjapac Cristo, melhpancasac najan! Co'o Pablo meliaqlhaiancoc emeioc emancoc neten iamet actennescama apqueliaqmoiecja la quetlhencap, mang na enmaicama asuesai'a necsa apquellauquescama po'oc conne iemmen. 14 Gracia stac co'o Engiapom Neten mollauquesaiancoc conne iemmen quetlhencap lhema apjapac la'a, wanlha coca asquellauquesaianco conne iemmen ma'a Crispo cacpota njan Gayo. 15 ¡Metlhenama nquec quetlhencap cnota allauqueso conne iemmen aquieplomo asuesai'a! 16 ¡ia', nlheianwacjec ewalhoc asquellauquesaianco nac na Estefanas atcac, scanec co'o mamma mocjom po'oc enenlhet la'a. 17 Ncanec ma lhta jeiapascama Cristo cacpota allauquesancoc conne iemmen enenlhet'awoc, wanlha coca jeiapascamo apaiacsec ania'a actacmanma metca alhenammalhco ejencoc ejenquec nema asiamojo asqueltennaicamaja cacpota mancowaiwente ania'a apquetsepma lhta Cristo neten iamet actennescama, ncanec acto neten anquec aquiaspommalhca m'a ania'a nac ma'a, mancolhnoc asmopuana nac altennama ania'a. 18 Ca ania'a nac aplhenammap apquetsepma Cristo neten iamet actennescama, apquellanenquec actaicama nquec ania'a apquellelto apquenmaicamo ta aquieto nenmasquenwaianlha, coca ennenco'o nengellelto ta nengelluoncasemmalhca ta tep, negeltemesquescama njan acto acnema acmowana aniem'o Engiapom Neten. 19 Ca ntemac actalhesammalhca waccajac Engiapom Neten apaioma jenque'e: «Anactewasquese ta apquelianweiacmo nac nema nac apquelianweiacmo, amasquescamoc jata njan apqueliamo apanco'oc apancawec nema nac apqueliamo» 1 20 Jai', nne lhta anmasquescaso apquelianweiacmo nema nac apquelianweiacmo, nne lhta njan anmasquescaso apquelianweiacmo apanco'oc jengetlhecmoscama nac, nne lhta njan anmasquescaso apquelianweiacmo apquenmopuanca'a nac elpaqmetec. Nema nengiamo apanco'oc anac ma'a aptemescasacje lhta actaicama nquec atlhenaicama apualho'oc Engiapom Neten ma'a. 21 Mancollapuanquec enenlhet'awoc eliecpelcoc Engiapom Neten aniem'o apanco'oc apáncawe nac apquelianweiacmo, apqueltawe coca eluonquesec tep aniem'o ania'a actacmanma nac apquelleltaianco nac enenlhet'awoc taicama nquec ma'a. 22 Apquellelto nac judios wanlha apquelleltawec eluetac caselha monwetai'o aniem'o neten cacpota meliascamec ma'a, coca apquellelto nac griegos wanlha aptengianquec allianwesquescaiacmo la apquelianweiacmo. 23 Ennenco'o coca nelpaiesquec ania'a Cristo apquetsepma lhta neten iamet actennescama, apqueltacnewacquec coca judios ania'a 2 nac, actaicama nquec coca apquellanemac ania'a nac metno judios 24 Coca nengellelto nac jengellawecama Engiapom Neten nelliawec nema nengiamo ngiapom anque ma'a apenescamo lhta apmac'acja etnec Engiapom Neten, apcapascama Cristo cacpota engietsepoc neten iamet actennascama, ntemenque lhta m'a aniem'o apmopuana m'a. 25 Niecje moclhem'a enenlhet atlhenaicama apualho'oc taicama nquec ania'a nac, coca acto neten anquec nema aquiamo m'a, mamma enenlhet etnec ma'a aptemacja Engiapom Neten apquelanai'a. Niecje moclhema enenlhet atlheianma apualho'oc ncoiennactema apiempec Engiapom Neten, coca jawe m'a, apiennactema apanquec ma'a, mamma enenlhet elhojoc ma'a. 26 ¡Colietnamano apaqto'oc elialheng'a! Apcanetec apquellelto nema apqueliamo apiesecsec anac quetlhencap, apcanetec na apquellelto apquelemjama apmaniaie', apcanetec na apquelleniem'o la apquennemolhema neten apancawec apqueliaspommap, ncaqjoc coca Engiapom neten apqueliequiescanquec quetlhencap. 27 Jai, apqueliequiesquec Engiapom Neten enenlhet apquetlhenammap la metca apqueliamo cacpota etnescasocjac coneng ma'a nema nac apqueliamo. Apqueliequiesquec enenlhet apquetlhenammap la metca apiempeioc cacpota etnescasocjac coneng ma'a enenlhet la aliennactema apiempeioc. 28 Apqueliequiesquec Engiapom Neten enenlhet apqueltacnommap anac, apquetlhenammap anac na metnaicamoc neten, ncacjoc coca apqueliequiesquec capota eltemescasocjac coneng apquellelto nac neten apancawec. 29 Mamma enenlhet etnancoc apquelanmacpo napaqtec Engiapom Neten. 30 Apqueliepetcasacje lhta quetlhencap Engiapom Neten Cristo, apquellaianco njan ma'a acnema apquelianweiacmo quetlhencap, nemo njan altemesquescamo apquelpeiwomo aniem'o Cristo, apquelpoccanmo njan cacpota etnancoc Engiapom Neten apquennemolhema, apqueluonquescamo njan tep necsa anmaicama moniamolhma. 31 Ca ntemac na actalhesammalhca Engiapom Neten apaioma: «Wanlha coca apuanca'a etnancoc alammalhco apualho'oc aniem'o la apquelianweiacmo Engiapom Neten» 3
1Isaias 29:14
2Los judíos pensaban que el que moría crucificado era alguien muy bajo y pecador
3Jeremias 9:23-24