¹ Bə-zhɔ-zhe, nyǐ è də̀ nə́myɛ̌ yil yé, nyǐ è də̀ nə́myɛ̌ yil yé, ǹmyɛ́ wírí ń pə ǹ yil zùwə́, nyǐ wɔ́ ǹ wu-bɔ̀nɔ̀ w yilə, nyǐ wɔ́ ǹ zhə̀n rɛ́ yilə ! ² È nə wɔ́ bə̀kɔ́n yilə, tənèsé lyì bí m’a zɛ̃̀ bə la wál : Wɔ́ yẽ̀ myɛ̌ bə̀ Yi rí ŋwɛ́nɛ́ mɔ́ ? ³ Nyǐ nə́myɛ̌ Yi rí ŋwɛ́nɛ́ dɛ̃̌ Arəzana w rə̀ n’ê wɛ̀rhɛ́ ǹdə rə̀ gə́ n’ê yǎl nɛ́ gakó. ⁴ Sə bə̀myɛ́ cèmé né wɔ́ sə̀byì-kùlì ǹdə́ sánnə́má, nə̀ wɔ́ numbyínsí jɛ̃̀ è wɛ̀rhɛ́ nɛ. ⁵ Nə̀ zhe nyí, nə j’à t’â zɔ̀m gaga yé, nə̀ zhe zhã̌ nə j’à bə kaka nyɛ̌ gaga yé, ⁶ nə̀ zhe myə̀lə́, nə j’à bə kaka lwẽ́ nyɛ̌ gaga yé, ⁷ nə̀ zhe jɛ̀rh, nə j’à t’â dwə̀rh kaka yé, nə̀ zhe nèrh, nə j’à t’â zhə̀l gaga yé, cəl t’â shí nə̀ byã kùr rə̀ dwi yé. ⁸ Nə̀ nyɛ̌ ǹdə́ lyì bí byɛ̀bɛ́ bə̀ wɛ̀rhɛ́ nɛ mɔ́ ta, byɛ̀bɛ́ gakó bə̀ zhí ni mú nyɛ̌ ǹdə nə̀ ta. ⁹ Sə Esərayɛl, zhí Bə-zhɔ-zhe ne ! bə̀ ń wɔ́ ǹ kúrhí sanna, ǹdə́ ku kɔ̀bɔ́ ò n’ô cə̀r ǹ yé ne búlə́ jàà wa. ¹⁰ Arɔ̃ kɛ̀lɛ́ lyì, zhí-nə Bə-zhɔ-zhe ne ! bə̀ ń wɔ́ á kúrhí sanna, ǹdə́ ku kɔ̀bɔ́ ò n’ô cə̀r á yé ne búlə́ jàà wa. ¹¹ Ámyɛ̌ byɛ̀bɛ́ á n’á nyàm Bə-zhɔ-zhe mó, zhí-nə Bə-zhɔ-zhe ne ! bə̀ ń wɔ́ á kúrhí sanna, ǹdə́ ku kɔ̀bɔ́ ò n’ô cə̀r á yé ne búlə́ jàà wa. ¹² Bə-zhɔ-zhe nə́ ń lyǐrh nə́ yò : ń mà n cĩ́ bwəl Esərayɛl kɛ̀lɛ́ y yó, Arɔ̃ kɛ̀lɛ́ y yó, lyì bí byɛ̀bɛ́ bə̀ nyàm mɔ mɔ́, ¹³ bə̀sɔ́ná ǹdə́ náncɛrh ga yó ; ¹⁴ Bə̀ Bə-zhɔ-zhe mà n ce á nɛrɛ́ y pù, ámyɛ̌ ǹdə́ á byǎ bɛ́ ga yilə. ¹⁵ Bə̀ Bə-zhɔ-zhe mɔ̀bɔ́ ń wɛ̀rhɛ́ dɛ̃̌ ǹdə́ cɛ y mɔ́ mà n cĩ́ bwəl á yó ! ¹⁶ Dɛ̃̌ yə né wɔ́ Bə-zhɔ-zhe ń cǐ ni, n zɛ̃̀ n kwè cɛ y n pə numbyíní byǎ bɛ́ nɛ. ¹⁷ Nyǐ è də̀ cùù ri rə̀ n’ê zǔl Bə-zhɔ-zhe yé, è k’ê də̀ lyì bí byɛ̀bɛ́ bə̀ zhə̀l tɛ̃́, tənà y kɛ̀bɛ́ lò tá ń zɔ̀m è wẽ́ mó w mó, bə̀ n’ê zǔl Bə̀-zhɔ-zhe yé ; ¹⁸ nyǐ wɔ́ nə́myɛ̌, nə́ m’ǎ zǔl Bə-zhɔ-zhe, èlǎsɛ́ kɔn m’e la gaga yilə. Zǔl-nə Bə-zhɔ-zhe !