¹ Àmyɛ́ Pwǝǝ, bǝ̀ co ne byǝ̀nǝ́-jù w à gǝ́ n'â twĩ̀ Yezu Kristǝ tum rí mú yilǝ. Shǝlamɔ, wɔ́ àmyɛ́ ǹdǝ́ nǝ́ da-byǐ Timote nǝ́ kɛ̃ sɛ́bɛ́ rɛ́ tɛ̀bɛ́ nǝ́ r'é pɛ ǹmyɛ́ mɔ̀bɔ́ nǝ́ só dɛ̃́dɛ̃́ ǹ nǝ́ ǹ tó nǝ́ba ǹ twĩ̀ mú, ² ǹdǝ́ nǝ́ nǝkɔ́ Apya, ǹdǝ́ Arǝcipi mú ń nǝ́ ń tó nǝ́ba ń nwɛ̀nɛ̀ mɔ́, ǹdǝ́ Kristǝ gùlú w lyì bí bǝ̀ n'ê twí bǝ̀ gùlí dwã ǹ sõ kɛ̀lɛ́ w mɔ́ nɛ. ³ Nǝ́ Da Yi ǹdǝ́ nǝ́ Cǐnnǝ Yezu Kristǝ b'a cĩ́ bwǝl á yó, sǝ bǝ pǝ ába yǝ̀-zùlǝ́! ⁴ Shǝlamɔ, à gǝ n'â lwǝ̀l à Yi rí gakó, à t'â swě ǹ yò yé. À n'â ce rǝ̀ nǝ̀bán ǹ yilǝ. ⁵ Ǹ gǝ́ zhí Cǐnnǝ Yezu ni ní mú, ǹdǝ́ ǹ gǝ́ só byɛ̀bɛ́ gakó bǝ̀ wɔ́ Yi lyì bí ní mú, lyì bí zɔ̀m rǝ̀myɛ́ gakó yò à nyɛ̀ɛ̀. ⁶ À n'â lwǝ̀l Yi ni, mùnì ga àmyɛ́ ǹdǝ́ ǹmyɛ́ ga gǝ́ zhí Kristǝ ne nyì-dwìì wẽ́ mó sɛ̃ mɔ́ ń lwar cɛ̀nɛ̀ tɛ̀bɛ́ gakó nǝ́ nɔ Kristǝ jàn yil mó. ⁷ Da-byǐ, ǹ gǝ́ só byɛ̀bɛ́ bǝ̀ wɔ́ Yi lyì bí mú swẽ́ à wu ni, e ce à wu nyɛ̀ dɛ̃́dɛ̃́, bǝ̀ ǹ pɔ bɛ wu-jɔ̀. ⁸ Rǝ̀myɛ́ ce, à yě b'à zhe sɔ́má Kristǝ wẽ́ à m'a byili mú tɛ̀bɛ́ ǹ mǝ̌ sǝ́ wɛ̀rhɛ́ mɔ́, ⁹ sǝ à só s'e yǝ̀ lwǝ́l à n'â lwǝ̀l mó ǹdǝ́ sónó. Zhǝ̀nà, àmyɛ́ Pwǝǝ, à wɔ́ náncɛ, e jà kɔn súlí myɛ, à ŋwɛ́nɛ́ byǝ̀nǝ́-jù w èlǎsɛ̃́ Yezu Kristǝ tum rí à n'â twĩ̀ mú yilǝ. ¹⁰ Wɔ́ Oneshim yil à n'â lwǝ̀l mó, bǝ̀ ń jǐrh à byǐ Yezu Kristǝ wẽ́ byǝ̀nǝ́-jù w nyɔ̀nɔ̀. ¹¹ Ń yà ń tá ń sɛ̃ mɔ́ shãã ga yé, sǝ èlǎsɛ̃́, ń mà n sɛ̃ mɔ́ ǹdǝ ń gǝ́ sɛ̃ àmyɛ nɛ nɛ́. ¹² Ń wɔ́ à wu byǐ, sǝ à ce ń ká ń bàn ǹ sõ. ¹³ À gǝ́ ŋwɛ́nɛ́ byǝ̀nǝ́-jù w yò-ècɔ̀nɔ̀ nyí rí à n'â bwǝ̀l mó yil mó, à y'à n'â yǎl a cǝ̀r mò n sɛ̃ nɛ ǹ yilǝ, ¹⁴ sǝ à bǝ só s'a wɛ̀rhɛ́ èta ǹdǝ́ à yǝ̀ ǹmyɛ́ nyí nɛ yé. À t'â yǎl a nyɛ́ɛ́ mɔ́ ń bǝ́ wɛ̀rhɛ́ cɛ̀nɛ̀ rɛ́ rǝ̀myɛ́ mɔ́ yé. À n'â yǎl bǝ̀ ǹ wɛ̀rhɛ́ rɛ ǹdǝ́ ǹ sǝ̀pwà pùbùlǝ̀. ¹⁵ Dɛ̀ga Oneshim gǝ́ zhǐr ǹ sõ mó wɔ́ dwã màngɛlɛ́ yilǝ, mùnì ga n ká n bǝ̀ n já ń ŋwɛ́nɛ́ ǹ sõ. ¹⁶ Ń kǝ́ ń dǝ̀ yóm dúdú yé. Ń wɔ́ da-byǐ nántwǝ̌ èlǎsɛ̃́. À só mo dɛ̃́dɛ̃́, sǝ ǹmyɛ́ mǝ̌ sǝ́ swéné mo dɛ̃́dɛ̃́ du, bǝ̀ ń wɔ́ numbyíní, n jà ń wɔ́ Kristǝ-lò. ¹⁷ Rǝ̀myɛ́ ce, ǹ gǝ nǝ́ ǹ nyǐ ni ǹdǝ ǹ dɔwa ta, sǝ́ zwẽ mo ǹdǝ wɔ́ àmyɛ́ cìcì ǹ nǝ́ ǹ zwẽ ta. ¹⁸ Ń gǝ dó mó, ráá ń gǝ zhe ǹ jim, sǝ́ cĩ́ rǝ̀myɛ́ gakó àmyɛ́ yó wǝ. ¹⁹ Wɔ́ àmyɛ́ Pwǝǝ cìcì jɛ̃̀ è kɛ̃ zɔ̀mà nɛ́ nyɛ̀bɛ́ à m'â byili mú bǝ̀ nyǐ à b'a kwɛ̃̌ rɛ. Sǝ à t'â yǎl a lyǐrh mó bǝ̀ nyǐ ǹmyɛ zhe àmyɛ́ jim yé, sǝ jim rí rǝ̀myɛ́ mɔ́, wɔ́ ǹ cìcì nándǎ yá. ²⁰ Zhǝ̀nà, da-byǐ, à n'â lwǝ̀l mó, sǝ́ wɛ̀rhɛ́ nɛ cɛ̀nɛ̀ rɛ́ rǝ̀myɛ́ Cǐnnǝ mó yilǝ: zǝ à wu ni Kristǝ wẽ́. ²¹ À yě pamparɛ̃ɛ̃ bǝ̀ ǹ b'ǎ wɛ̀rhɛ́ kɔn rɛ́ dɛ̀bɛ́ à n'â lwǝ̀l mó mó, sǝ à yě bǝ̀ ǹ b'ǎ wɛ̀rhɛ́ rɛ kɔn dwini. Wɔ́ rǝ̀myɛ́ è ce, à kɛ̃ sɛ́bɛ́ rɛ́ tɛ̀bɛ́ à la mɔ́ pɔ. ²² Kɔn súlí myɛ, sǝ́ pyà jàà ń cĩ́ ni, b'à n'â bùl bǝ̀ Yi gǝ zwẽ á lwǝ̌l, à m'a k'a bǝ̀ á sõ. ²³ Epafǝraasɛ mɔ́ ń tó ne ń ŋwɛ́nɛ́ byǝ̀nǝ́-jù w Yezu Kristǝ tum rí yil mó nǝ́ ń ce mó. ²⁴ Markɛ ǹdǝ́ Arǝsǝtarkɛ, ǹdǝ́ Damaasɛ ǹdǝ́ Lwiki mú bǝ̀ n'ê tó ne bǝ̀ twĩ̀ mú myɛ n'ê ce mó. ²⁵ Cǐnnǝ Yezu Kristǝ mà n cĩ́ bwǝl á yó!