¹ Rə̀myɛ́ yó, Yezu kwã-lyì bí zɛ̃̀ bə yí ń nyí ni, bə bwə̀rh mò bə wɔ̀: “Mɔ̌ ń wɔ́ lyì-fɔ̀lɔ̀ du ń dwã bɛ́ Arəzana tənà y wa?” ² N zɛ̃̀ n byẽ̀ bə̀sɔ́bwɛ̀lɛ́ námpɔ́lɛ́ èdù, n ce e zhì bə̀ yé né, ³ n wɔ̀: “Zhə̀nà, à nʼâ wə̀l ába: á gə yə̀ pyìrhí á jǐrh ǹdə bə̀sɔ́ná námpɔ́lsɛ ta, á tʼá la Arəzana tənà y wẽ́ zú yé. ⁴ Lò mɔ̀bɔ́ ń wɔ́ lyì-fɔ̀lɔ̀ du ń dwã bɛ́ Arəzana tənà y wa, wɔ́ mɔ̀bɔ́ ń nə́ ń lwəl ń cìn tɛ̃́ n jǐrh ǹdə bə̀sɔ́bwɛ̀lɛ́ y kɛ̀bɛ́ ta. ⁵ Lò mɔ̀bɔ́ ń zwẽ bə̀sɔ́bwɛ̀lɛ́ y kɛ̀bɛ́ dwí rí zhəəle àmyɛ́ yilə, wɔ́ àmyɛ́ cìcì zhəəle ń zwẽ.” ⁶ Yezu súlí n wɔ̀: “Lò mɔ̀bɔ́ bə̀ gə lyẽ nə́kul-põ nánfɔ̀lɔ̀ ń byã nɛ́ bə cìrh mò bə ji mwə̃́ wə, n vò nɛ̃̌ mɔ́ kùr w cɔ̃̀ ń gə cìrh byɛ̀bɛ́ bə̀ yə̀ yírh swí bə jʼa zhí àmyɛ́ nɛ mɔ́ mə̀dù cìcì ń co lwɛlɛ wa. ⁷ Zwini bʼa zə lũ w kɔ̀bɔ́ lyì bí bə̀ gə́ nʼê cìrh dwã bə̀ ce lwɛlɛ wẽ́ mó yilə. Zhə̀nà, kɔn dɛ̀bɛ́ rə̀ nʼê ce lò lwɛlɛ wẽ́ tʼâ la jó yé. Sə zwini bʼa zə lò mɔ̀bɔ́ ń nə́ ń tó rə̀ dɛnnɛ ń cìrh ń dõ ń ce lwɛlɛ wa! ⁸ “Ǹ jɛ̃̀ ráá ǹ nà gə nʼê ce ǹ wɛ̀rhɛ́ lwɛlɛ, sə́ gõ y ń dwĩ̀ kwã nɛ́. Ǹ gə zù nyǔ mə̀ tʼâ la zhɔ̌ wẽ́ ǹdə́ jɛ̃̀ èdù ráá nà èdù cɔ̃̀ ǹ gə zù myǐn mə̀ tʼâ cì gaga wẽ́ ǹdə́ jɛ̀rh sə̀lyè ráá nə̀rh sə̀lyè. ⁹ Ǹ yírh gə nʼê ce ǹ wɛ̀rhɛ́ lwɛlɛ, sə́ jàrh rɛ̀ ń dwĩ̀ kwã nɛ. Ǹ gə zù nyǔ mə̀ tʼâ la zhɔ̌ wẽ́ ǹdə́ yírh rə̀dù cɔ̃̀ ǹ gə zù myǐn-jù w ǹdə́ yírhə́ nə̀lyè.” ¹⁰ Yezu súlí n wɔ̀: “Dɛ̃̌-na á cìnə̀. Á bə̀kʼá shɛ̀nɛ́ á fulsi byɛ̀bɛ́ èta bə̀ yə̀ yírh swí mú mə̀dù ga yé. À nʼâ wə̀l ába: bə̀ màlɛ́kabá zhǐ à Da mɔ́ ń ŋwɛ́nɛ́ Arəzana w mɔ́ yé né twéé gakó. [ ¹¹ Numbyíní Byǐ tú byɛ̀bɛ́ bə̀ jé mó vwârh yilə.]” ¹² Yezu zɛ̃̀ n ji səswalá n pə ń kwã-lyì bí ni n wɔ̀: “Lò gə zhe pyììsì zɔ̌m, èdù zɛ̃̀ e jé, á nʼá bùl bə̀ ń tá ń la shə́-nə̀bɔ́ ǹdə́ nə̀bɔ́ y nɛ yõ̌ pyɔ̀ w yó n vò n pyà kɛ̀bɛ́ è jé mó? ¹³ À nʼâ wə̀l ába: ń gə nɔ ya, ń wu bʼa yə̀ nyɛ̀n èmyɛ́ yil du shə́-nə̀bɔ́ ǹdə́ nə̀bɔ́ y sə̀ yə̀ jé mó. ¹⁴ Èta myɛ, á Da mɔ́ ń ŋwɛ́nɛ́ Arəzana w mɔ́ tá ń yǎl bə̀ byɛ̀bɛ́ èta bə̀ yə̀ yírh swí mú mə̀dù ga jé yé.” ¹⁵ Yezu kə́ n wɔ̀ ń kwã-lyì bí ni: “Ǹ dõ gə gwar mɔ́, sə́ vò ń sõ, ń byẽ̀ mò kwã nɛ́ ǹmyɛ́ ǹdə́ ńmyɛ̌ dúdú, ń byili mu ń dóó wə́. Ń gə cili ǹ zɔ̀mà nɛ́, sə́ nyǐ ǹ kwɛrhɛ ń yò. ¹⁶ Sə ń gə yə̀ shɛ̀nɛ́ n cili ǹ zɔ̀mà nɛ́, sə́ pyà lò mə̀dù, ráá lyì bə̀lyè, ǹmyɛ́ ǹdə́ bə̀myɛ́ ga tó dwã á vò ń sõ, bə̀ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ yò gə la kɔrhɔ gakó, sʼe yə̀ zhə̀n-cìnə́ bə̀lyè ráá bə̀tɔ̀ yírh wə. ¹⁷ Sə ń gə yə̀ shɛ̀nɛ́ n cili bə̀myɛ zɔ̀mà nɛ́, sə́ byili Yi lyì bí gùlú w ni. Ń gə yə̀ shɛ̀nɛ́ n cili gùlú w lyì bí myɛ zɔ̀mà nɛ́, sə́ nyǐ mu ǹdə lò mɔ̀bɔ́ ń yə̀l Yi rí tɛ̀bɛ́ rə̀ wɔ́ zhə̀n mɔ́ pár ta, ráá ǹdə myǝ̌l-kwândɛ zwennə ta.” ¹⁸ Yezu kə́ n wɔ̀: “Zhə̀nà, à nʼâ wə̀l ába: kɔn dɛ̀bɛ́ gakó á gə lyẽ cɛ yó, bə̀ mʼa lyẽ re Arəzana w myɛ, sə kɔn dɛ̀bɛ́ gakó á gə bwèlé cɛ yó, bə̀ mʼa bwèlé re Arəzana w myɛ. ¹⁹ “Zhə̀nà, à kʼâ nʼâ wə̀l ába: ámyɛ̌ lyì bə̀lyè gə wɛ̀rhɛ́ nyí rə̀dù cɛ yó bə lwə̀l kɔn à Da mɔ́ ń ŋwɛ́nɛ́ Arəzana w mɔ́ nɛ, ń mà n pə bɛ, ²⁰ bə̀ lyì bə̀lyè ráá bə̀tɔ̀ gə gùlí dwã àmyɛ́ yil yilə, àmyɛ́ cìcì ŋwɛ́nɛ́ ǹdə́ bɛ.” ²¹ Pyɛɛrɛ zɛ̃̀ n yí Yezu nyí ni, n bwə̀rh mò n wɔ̀: “Cinnǝ, à dõ gə nə́ ń gwar nɛ, twər màngal à mǝ̌ sʼa pɔ̃ sǔbri? À mǝ̌ sə à nʼâ pɛ mɔ sǔbri twər tàlpyɛ̀?” ²² Yezu wɔ̀ mɔ̀: “À nʼâ wə̀l mó: bə̀ká pɔ̃ sǔbri twər tàlpyɛ̀ yé. Ǹ mǝ̌ sə́ pɔ̃ sǔbri twər tàlpyɛ̀ tàlpyɛ̀ kùrə̀ shə́-shàlpyɛ̀. ²³ Yezu wɔ̀ mɔ̀: “À nʼâ wə̀l mó: bə̀ká pɔ̃ sǔbri twər tàlpyɛ̀ yé. Ǹ mǝ̌ sə́ pɔ̃ sǔbri twər tàlpyɛ̀ tàlpyɛ̀ kùrə̀ shə́-shàlpyɛ̀. ²⁴ Rə̀myɛ́ yilə, à mʼa byili ába kɔn rə̀ nʼê myɛrhɛ Arəzana pyɛ̀lɛ̀ rɛ́. Pyɔ̌ mə̀dù ń ya n byẽ̀ ń kɛ̀lɛ́ tùntùnnə̀ ń la ń nə̀cɛ̀ndɛ̀ yò bwə̂rh. 24 Ń gə́ tú n ji kùr ń nə́ ń bwə̀rh ń nə̀cɛ̀ndɛ́ yò yi ní, bə zə lò mə̀dù bə bà, ń yà ń zhe pyɔ̌ mɔ́ jim wársɛ mɔ̀rh-fwààlɛ̀ nánzhəzhɔ̌. ²⁵ Sə ń yà ń bə kaka zhe ń la mə n ŋwɛ́ɛ́ jim rí yé. Yó-cə́bal mɔ́ zɛ̃̀ n pə nyí bə̀ bə̀ zə ńmyɛ̌ ǹdə́ ń kɛ̃ mɔ́ ǹdə́ ń bə̀sɔ́ná bɛ́ ǹdə́ kɔn dɛ̀bɛ́ gakó ń zhe mó bə yè bə mʼe ŋwɛ́ɛ́ jim rí. ²⁶ Kɛ̀lɛ́ y tùntùnnə̀ mó zɛ̃̀ n tu ń nə̀dwə́nə́ yó n wùlì yó-cə́bal mɔ́ yé né, n lwə̀l mò n wɔ̀: ‘Zhìlì ǹ yala nɛ, bʼà mʼa ŋwɛ́ɛ́ mɔ́ ǹ jim rí gakó.’ ²⁷ Ń nɔ̀nɔ̀ zə yó-cə́bal mɔ́, n yẽ̌ ń jim rí ni n ce bə dwĩ̀ mù n zhǐr. ²⁸ “Ń gə́ tú ń nə́ ń dwi, n nə ń dõ tùntùnnə̀ ń yà ń zhe ń jim. È yʼà wɔ́ dwã zɔ̌m tum wársɛ. N zə mɔ, n shàr ń byã nɛ, n wɔ̀ mɔ̀: ‘ŋwɛ́ɛ́ à jim rí.’ ²⁹ Ń dõ mó tu ń nə̀dwə́nə́ yó n wùlì ń yé né, n lwə̀l mò n wɔ̀: ‘Zhìlì ǹ yala nɛ, bʼà mʼa ŋwɛ́ɛ́ mɔ́ ǹ jim rí.’ ³⁰ Sə ń yə̀ shɛ̀nɛ́ yé. N ce bə zə mɔ bə ce byə̀nə́-jù wə̀, kɔn la mʼe yí ń gə tú ń ŋwɛ́ɛ́ jim rí ń zhɛ̀. ³¹ “Ń dwã bɛ́ gə́ nɔ ń gə́ wɛ̀rhɛ́ nɛ́ mɔ́, bə̀ wun zhìlì dɛ̃́dɛ̃́, bə vò e cĩ́ rə̀ gakó bə̀ yó-cə́bal mɔ́ nɛ. ³² Yó-cə́bal mɔ́ zɛ̃̀ n ce bə zə mɔ bə mʼe bà, n wɔ̀ mɔ̀: ‘Tùntùnnə̀ námməlwɛ̀lɛ́, ǹ lwə̀l nè, a shɛ̀nɛ́ a yẽ̌ ǹ jim rí gakó ne a pɔ̃́. ³³ Ǹmyɛ yà ǹ mǝ̌ sə́ dùr ǹ dõ mó nɔ̀nɔ̀ ǹdə àmyɛ gə́ dùr ǹ nɔ̀nɔ̀ nɛ́.’ ³⁴ Yó-cə́bal mɔ́ lyim yʼà zɛ̃̀ dɛ̃́dɛ̃́, n pə nyí bə̀ bə̀ zhəl bə zə tùntùnnə̀ mó bə ce byə̀nə́-jù wə̀, bə pɔ̃ còrhò-tum, kɔn mʼe yí ń gə ŋwɛ́ɛ́ jim rí gakó n zhɛ̀.” ³⁵ Yezu súlí n wɔ̀: “Ámyɛ̌ mə̀dù mə̀dù gakó gə yə̀ sǔbri ǹ dõ ne pɛ ǹdə́ ǹ wu gakó, wɔ́ èta à Da mɔ́ ń ŋwɛ́nɛ́ Arəzana w mɔ́ mà n wɛ̀rhɛ́ ǹmyɛ nɛ.”