¹ Rə̀myɛ́ kwã nɛ́, Yezu byẽ̀ ń kwã-lyì bí shí ǹdə́ bə̀lyè yə́, n pə bɛ ŋwɔ̀nɔ́, mùnì bə jì nə̀cílsi námməlwâlsɛ, sə bə wárh lò mɔ̀bɔ́ gakó címí y kɛ̀bɛ́ è zhe mo mó wẽ́. ² Nyǐ-nə bə̀ yilə né. Nã́yə́ə́ mó, wɔ́ Shəmɔ mɔ̀bɔ́ bə̀ nʼê byẽ̀ bə̀ Pyɛɛrɛ mɔ́, ǹdə́ ń da-byǐ Andərɛ, ǹdə́ Zebede byǎ bɛ́ Zhakɛ ǹdə́ Zhã, ³ e súlí Shilipu ǹdə́ Bətələmyi, Tɔma ǹdə́ Məco mɔ̀bɔ́ ń yà ń nə́ ń zwẽ myǝ̌l-kwândɛ́ mɔ́, e súlí Aləfɛ byǐ Zhakɛ ǹdə́ Tadɛ, ⁴ ǹdə́ yə̀wǎl cìnə́ bé gùlú w lò mə̀dù ń yíl Shəmɔ,* ǹdə́ Zhidə Esəkarəyɔtɛ, mɔ̀bɔ́ ń myìnì Yezu n pə bə zə mɔ́. ⁵ Yezu zɛ̃̀ n twĩ̀ ń tùntúmə́ bé bə̀myɛ́ shí ǹdə́ bə̀lyè yə́, n pə bɛ nyí n wɔ̀: “Á bə̀kʼá vò lyì byɛ̀bɛ́ bə̀ də̀ Zhwifubá sõ yé, sʼá bə̀kʼá vò Samarɛ lyì bí cɛmɛ nɛ́ wẽ́ yé. ⁶ Zhəl-nə Esərayɛl lyì bí bə̀ nyɛ̌ ǹdə pyììsì shɛ̀bɛ́ sə̀ jé ta mɔ́ sõ. ⁷ Á gə la, sʼá nʼá bwə̀l á zhe: ‘Arəzana pyɛ̀lɛ̀ rɛ́ bwəlse.’ ⁸ Wárh-na nə̀bwànà, sʼá bwìrhì cùùrì. Wárh-na nɔr cìnə́ bə jǐrh wárhgáá, sʼá jì nə̀cílsi námməlwâlsɛ. Pa-na nánfò, bə̀ wɔ́ nánfò bə̀ pɔ ámyɛ nɛ. ⁹ Á bə̀kʼá ce sánə́má, ráá wársɛ, ráá tám myɛ cìcì á byẽ́ yé. ¹⁰ Á mə̀dù ga bə̀ká n zə lɔ̀bɔ̀, ráá kàmə̀-zǔrh sə̀lyè, ráá nə̀cìlə̀, ráá də̀-dɔ̀lɔ̀ sɔ́má y kǒ yil yé, bə̀ tùntùnnə̀ mǝ̌ dwã ǹdə́ ń nyí kùjú. ¹¹ “Á gə yú cə-fɔ̀lɔ̀ ráá cə-byǐ wə, sʼá pyà lò mɔ̀bɔ́ ń mà n shɛ̀nɛ́ n zwẽ ába ń sõ mó. Mɛ̃-na ńmyɛ̌ mɔ́ sõ, kɔn mʼe yí dɛ̃ rɛ́ tɛ̀bɛ́ á la gàà zhǐr mó. ¹² Á gə zù kɛ̀lɛ́ wa, sʼá wɔ̀ è lyì bí ni: ‘Yə̀-zùlə́ yál nɛ́ ǹdʼába.’ ¹³ Kɛ̀lɛ́ y èmyɛ́ lyì bí gə zwẽ á zhəəlé, sʼá yə̀-zùlə́ né só bə̀ yó wə. Sə bə̀ gə yə̀ á zhəəlé zwẽ, sʼá yə̀-zùlə́ né kʼa bə̀ á sono. ¹⁴ Sə kɛ̀lɛ́ kɛ̀bɛ́ ráá cɔ kɔ̀bɔ́ ò lyì bí yə̀ shɛ̀nɛ́ bə zwẽ á zhəəlé, ráá bə̀ yə̀ á zɔ̀mà nɛ́ cili, sʼá pwà á nə̀rh gàà. ¹⁵ Zhə̀nà, à nʼâ wə̀l ába: bùrsí kɔ́ dɛ̃ rɛ́ yùwə̀, cɔ w òmyɛ́ zwini rí mʼa dwini Sɔdɔm ǹdə́ Gɔmɔɔrɛ nyǎn rɛ́. ¹⁶ “Nyǐ-nə à nʼâ twĩ̀ ába ǹdə pyììsì ta gɔ kǔlsi wẽ́. Yál-na surhə cìnə́ ǹdə dɔma ta, sʼá yə̀ wu-bɔ̀nɔ̀ cìnə́ ǹdə épwǝ̌nse ta. ¹⁷ Dɛ̃̌-na á cìn ǹdə́ lyì bí. Nyǐ bə̀ mʼa zə ába bə vò bùrsì jàà wà. Bə̀ mʼa zə dànə̀shàárɛ bə mà ába bə̀ dwã-gùúlí jìsí wẽ́. ¹⁸ Bə̀ mʼa zə ába bə vò cɛmɛ yó-cìnə́ ǹdə́ pyâ sono àmyɛ́ yilə, mùnì á yə̀ à zhə̀n-cínnə bə̀myɛ́ ǹdə́ byɛ̀bɛ́ bə̀ də̀ Zhwifubá mó yé né. ¹⁹ “Sə bə̀ gə tú bə zə ába bə̀ la bùrsí jàà wà, sʼá bə̀kʼá zɛ̃̀ á nʼá tɛ́rɛ́ á wẽ́ á mʼá pyà dɛ̀bɛ́ á la zɔ̌m, ráá á gə́ la nɛ́ zɔ̌m nɛ́ yé. Yi mʼa byili ába zɔ̀mà nɛ́ nyɛ̀bɛ́ á la zɔ̌m mɔ́ rə̀myɛ́ yi ní cìcì. ²⁰ È də̀ ámyɛ̌ cìcì á la zɔ̌m yé. Wɔ́ á Da mɔ́ Eshirhə y è mʼa tó á dɛnnɛ e zɔ̀m. ²¹ “Lyì mʼa zə bə̀ da-byǎ bə pə bə gu, dabá mʼa zə bə̀ byǎ bə pə bə gu, sə byǎ myɛ mʼa bú ǹdə́ bə̀ dabá, bə ce bə gu bi. ²² Lyì bí gakó mʼa jí zùùrì ǹdʼába àmyɛ́ yil ré yilə. Sə mɔ̀bɔ́ ǹ pyɛ́nɛ́ ń zhì ǹ nà y yó kẽkẽ, ǹ mʼǎ nə vwârh. ²³ Cɔ kɔ̀bɔ́ bə̀ jì ába ò wẽ́, sʼá dùr á vò ò dõ wə. Zhə̀nà, à nʼâ wə̀l ába: á tʼá la Esərayɛl cɛmɛ nɛ́ gakó wẽ́ tó á zhɛ̀ ǹdə́ Numbyíní Byǐ yə̀ twí yé.” ²⁴ “Lò mɔ̀bɔ́ bə̀ nʼê cèrhè bə ń cə̀rhnə̀ mó du yé. Tùntùnnə̀ bə ń yó-cə́bal du yé. ²⁵ Mɔ̀bɔ́ bə̀ nʼê cèrhè mó gə jǐrh ǹdə ń cə̀rhnə̀ mó ta, kɔn mâ. Tùntùnnə̀ gə jǐrh ǹdə ń yó-cə́bal mɔ́ ta, kɔn mǎ. Bə̀ gə byẽ̀ kɛ̀lɛ́ cə́bal bə̀ Bəzəbul,* sə́ nyǐ bə̀ mʼa byẽ̀ ń kɛ̀lɛ́ y lyì bí ǹdə́ yil tɛ̀bɛ́ rə̀ lwɛlɛ rɛ́ du rə̀myɛ́. ²⁶ “Á bə̀kʼá dùr numbyínsí ywẽ yé. Kɔn tɛ̀nɛ́ rə̀ shèè rə̀ tʼâ la pwẽ̀ nè du yé. Kɔn tɛ̀nɛ́ rə̀ wɔ́ shə kɔna, bə̀ tʼâ la rɛ lwar yé. ²⁷ Kɔn dɛ̀bɛ́ à byili ába cə-byín wə, sʼá du á byili ri pwẽ̀ wə̀. Kɔn dɛ̀bɛ́ à sɔ́sɔ́mɛ́ á zhɛ̃̌ wa, sʼá jì lyarh wa, á bwə̀l rè. ²⁸ “Á bə̀kʼá dùr lyì bí byɛ̀bɛ́ bə̀ nʼê gwi yala nɛ́, bə jʼà wàr ywə́lə́ y bə̀ nʼê gwi mú ywẽ yé. Dǔr-nə mɔ̀bɔ́ ń wɔ̌ ń cɔ̀ yala nɛ́ ǹdə́ ywə́lə́ y ga myǐn-jù w mú ywẽ. ²⁹ Bə̀ gə la kúmsi námpɔ́lsɛ sə̀lyè yǒ, sə̀ wɛ́rɛ́ y də̀ nántwə̂ yé. E jà ǹdə́ rə̀myɛ́ ga, kúmsí sə̀myɛ́ èdù ga tʼâ la tɛ̃́ tu ǹdʼá Da mɔ́ yə̀l yé. ³⁰ È gə wɔ́ ámyɛ̌ yilə, Yi yě á ywésé myɛ cìcì yó. ³¹ Á bə̀kʼá dùr ywẽ yé, bʼâ cɔ̃̀ kúmsí námpɔ́lsɛ́ dɛ̃́dɛ̃́. ³² “Lò mɔ̀bɔ́ gakó ǹ zhì lyì bí yé né ń byili pamparɛ̃ɛ̃ bə̀ ǹ zù àmyɛ́, àmyɛ mʼa zhì à Da mɔ́ ń ŋwɛ́nɛ́ Arəzana w mɔ́ yé né, a byili bə̀ ǹ wɔ́ àmyɛ́ lò. ³³ Sə lò mɔ̀bɔ́ ǹ zhì lyì bí yé né ń wɔ̀ bə̀ ǹ yə̀l à párá, àmyɛ mʼa zhì à Da mɔ́ ń ŋwɛ́nɛ́ Arəzana w mɔ́ yé né, a wɔ̀ bʼà yə̀l ǹ pár yé. ³⁴ “Á bə̀kʼá bù bʼà zə yə̀-zùlə́ a bə̀ cɛ yó yé. È də̀ yə̀-zùlə́ à mʼa bə̀ yé. Wɔ́ búlə́ shù à mʼa bà. ³⁵ Zhə̀nà, à tú ǹdə́ pɔrá. Byǐ ǹdə́ ń da mʼa pɔr dwã nɛ. Bə̀kɔ́ ǹdə́ ń ná mʼa pɔr dwã nɛ. Byì-can ǹdə́ ń nyɛ̀ mʼa pɔr dwã nɛ. ³⁶ Ǹ kɛ̀lɛ́ lyì cìcì mʼa jǐrh ǹ zwə̀. ³⁷ “Lò mɔ̀bɔ́ ǹ só ǹ da ráá ǹ ná du àmyɛ́, ǹ wàr ǹ yàl à kwã-lò yé. Lò mɔ̀bɔ́ ǹ só ǹ byǐ ráá ǹ bə̀kɔ́ du àmyɛ́, ǹ wàr ǹ yàl à kwã-lò yé. ³⁸ Lò mɔ̀bɔ́ ǹ yə̀ ǹ də̀-jɔrhɔ́ kwè ń zhĩ ń mə́ tó à kùrə̀, ǹ wàr ǹ yàl à kwã-lò yé.* ³⁹ Lò mɔ̀bɔ́ ǹ nə́ ǹ shili ǹ myə̂l ré, rə̀ mʼa sá, sə lò mɔ̀bɔ́ ǹ shɛ̀nɛ́ ǹ myə̂l ré sɔ́ àmyɛ́ yilə, ǹ mʼâ ká nə rɛ. ⁴⁰ “Lò mɔ̀bɔ́ ń shɛ̀nɛ́ n zwẽ á zhəəle, wɔ́ àmyɛ́ zhəəle ń zwẽ. Lò mɔ̀bɔ́ ń shɛ̀nɛ́ n zwẽ àmyɛ́ zhəəle, wɔ́ mɔ̀bɔ́ ń twĩ̀ nì mú zhəəle ń zwẽ. ⁴¹ Lò mɔ̀bɔ́ ń shɛ̀nɛ́ n zwẽ Yi nyì-zwennə zhəəle, ń gə́ wɔ́ Yi nyì-zwennə mó yilə, Yi mʼa kwɛ̃̌ rə̀ ná-cí ǹdə rə̀ gə́ nʼê kwɛ̃̌ rə̀ nyì-zwennə né. Lò mɔ̀bɔ́ ń shɛ̀nɛ́ n zwẽ wu-cángá cí zhəəle, ń gə́ wɔ́ wu-cángá cí mú yilə, Yi mʼa kwɛ̃̌ rə̀ ná-cí ǹdə rə̀ gə́ nʼê kwɛ̃̌ wu-cángá cí ní. ⁴² Zhə̀nà, à nʼâ wə̀l ába: lò mɔ̀bɔ́ ń zwẽ à kwã-lyì bí námpɔ́lɛ́ mə̀dù zhəəle, n pɔ̃ nɛ̃̌ tɔ́nɔ́nɔ́nɔ́ zɔ̌-bwɛ̀lɛ́ myɛ cìcì n nyɔ̀, ń gə́ wɔ́ àmyɛ́ kwã-lò mó yilə, rə̀ ná-cí mà n nə kwândɛ zhə̀n zhə̀nà.”