¹ Cinu zɔ̀m ǹdə́ Muyiisi n wɔ̀: ² «Wál Esərayɛl lyì byǎ bɛ́ nɛ: Lò gə wɛ̀rhɛ́ yə̀-bəlɔ̀lɔ́ ǹdə́ ń yə̀l, ń gar Cinu nyə́ né rə̀dù n wɛ̀rhɛ́ kɔn dɛ̀bɛ́ rə̀ súl mú: ³ È gə wɔ́ vwĩ̀-zwə́lnə mó mɔ̀bɔ́ bə̀ tútǔ ǹdə́ nwə̃̌ bə m'e cír mu mú ń wɛ̀rhɛ́ yə̀-bəlɔ̀lɔ́ n já n tó rə̀ dɛnnɛ n cĩ́ yò dwí rí yó wə, ń mà n pə nə̀-bya kɛ̀bɛ́ kaka bə y zhe Cinu ni, yə̀-bəlɔ̀lɔ́ w ń wɛ̀rhɛ́ mɔ́ yilə, yə̀-bəlɔ̀lɔ́ w sǔbri lwə̌l vwĩ̀ rí yilə. ⁴ Ń mà n zə nə̀-bya y n mə n bə̀ dwã-joló kòrhó w nyí rí ni, Cinu yé né; n cĩ́ ń jɛ̃̀ è yó w yó, n zɛ̃̀ n zwə́l y Cinu yé né. ⁵ Vwĩ̀-zwə́lnə mó mɔ̀bɔ́ bə̀ tútǔ ǹdə́ nwə̃̌ bə m'e cír mu mú mà n zə nə̀-bya y jal mɔ́ námpɔ́lɛ́ n mə n bə̀ dwã-joló kòrhó w wə. ⁶ Ń mà n mɔ́rh ń jə̀fɔ́lɛ́ y jal mɔ́ wa, n zhì Cinu yé né n zhɛ́rhɛ́ mɔ gɔ̀nɔ̀ w ò bɔ̀n Yi jì y dwã w mɔ́ yé y kɛ̀bɛ́ bə̀ nə mɔ́ yó twər tàlpyɛ̀. ⁷ Rə̀myɛ́ kwã nɛ́ vwĩ̀-zwə́lnə mó mà n cĩ́ cĩ́ jal mɔ́ vwĩ̀-jùlú w kɔ̀bɔ́ bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ myǐn ò yó, ò ŋwɛ́nɛ́ dwã-joló kòrhó w wə, Cinu yé né mó nyimi ní yó; n zɛ̃̀ n ló nə̀-bya y jal mɔ́ mɔ̀bɔ́ mə̀ dàl mɔ́ vwĩ̀ námpúm cɛ̃́ɛ̃́ rɛ́ jùlú w ò wɔ dwã-joló kòrhó w nyí rí ni mú kùr wə. ⁸ Ń mà n gõ̀ nə̀-bya y bə̀ zwə́l yə̀-bəlɔ̀lɔ́ w sǔbri lwə̌l yil mú nwǐsí: è wu lyur rí nwǐsí ǹd'ê wu w nwǐsí gakó ⁹ e súlí ocə̀-pwala nɛ́ nə̀lyè y ǹdə́ nwǐsí sə̀ dɛ̃ nɛ mɔ́ ǹdə́ sə́púnə́ né nwǐsí, è gə wɔ́ cɛ̃ rɛ́ yilə, ń mà n bɔn rə̀myɛ́ n súlí ocə̀-pwala nɛ́ nɛ. ¹⁰ Ǹdə bə̀ gə́ n'ê gòm wẽ̀ ré rə̀myɛ́ cìcì ní mú, yə̀-zùlə́ vwĩ̀ rí zwə́l nə̀-bya y yó mó né; vwĩ̀-zwə́lnə mó mà n zɛ̃̀ n ce bə ji ri myǐn vwĩ̀ námpúm cɛ̃́ɛ̃́ rɛ́ vwĩ̀-jùlú w yó. ¹¹ N ce bə pwà nə̀-bya y kɔn rɛ́ tɛ̀bɛ́ rə̀ dàl mɔ́ gakó, è tɔ̀nɔ̀ w ǹd'ê nàmá bɛ́ gakó ǹd'ê yó w ǹd'ê nə̀-gwěsé ǹd'ê wu lyur rí ǹd'ê byə̀nə́ né bə m'e du zulə́ jàà y wa, ¹² bə vò jàà y kɛ̀bɛ́ bə̀ cír rə̀myɛ́ mɔ́ yil mú wẽ́, bə̀ gə́ n'ê lwé tɔ̀mdɛ́ ǹdə́ rə̀ nwǐsí mə̀gã̌ mɔ́; ń la zɛ̃̀ n ji ri myǐn. Wɔ́ bə̀ gə́ n'ê lwé tɔ̀mdɛ́ ǹdə́ rə̀ nwǐsí mə̀gã̌ mɔ́ w bə̀ m'a ji ri myǐn ní. ¹³ Esərayɛl lyì byǎ bɛ́ púlə́púlə́ gə dó ǹdə́ bə̀ yə̀l, bə gar Cinu nyə́ né rə̀dù, bə cĩ́ yò bə̀ cìn yó wə, lyì bí gakó zɛ̃̀ bə̀ gwẽ̌ yə̀ yò w nyí ni lwar, ¹⁴ bə̀ gə tú bə̀ lwar dóó w òmyɛ́ dwí rí nyí ni, lyì bí gakó m'a pə nə̀-bya, yə̀-bəlɔ̀lɔ́ w sǔbri lwə̌l yilə, bə zə y bə m'e bə̀ dwã-joló kòrhó w yé y wə; ¹⁵ Esərayɛl lyì byǎ bɛ́ púlə́púlə́ náncɛsɛ́ m'a cĩ́ bə̀ jɛ̀rh nə̀-bya y yó w yó, Cinu yé né, bə zɛ̃̀ bə zwə́l y Cinu yé né. ¹⁶ Vwĩ̀-zwə́lnə mó mɔ̀bɔ́ bə̀ tútǔ ǹdə́ nwə̃̌ bə m'e cír mu mú mà n zə nə̀-bya y jal mɔ́ kə̀kàlà n mə n zù dwã-joló kòrhó w wə; ¹⁷ ń mà n mɔ́rh ń jə̀fɔ́lɛ́ y jal mɔ́ mɔ̀bɔ́ ń zə n mə n bə̀ mɔ́ wẽ́, n zhì Cinu yé né n zhɛ́rhɛ́ mɔ gɔ̀nɔ̀ w ò bɔ̀n Yi jì y dwã w mɔ́ yé y kɛ̀bɛ́ bə̀ nə mɔ́ yó twər tàlpyɛ̀. ¹⁸ Rə̀myɛ́ kwã nɛ́, ń mà n cĩ́ cĩ́ jal mɔ́ mə̀myɛ́ mɔ́ vwĩ̀-jùlú w ò ŋwɛ́nɛ́ Cinu yé né dwã-joló kòrhó w wẽ́ mó nyimi ní yó, n zɛ̃̀ ló jal mɔ́ mə̀ dàl mɔ́ gakó vwĩ̀ námpúm cɛ̃́ɛ̃́ rɛ́ jùlú w ò wɔ dwã-joló kòrhó w nyí rí ni mú kùr wə. ¹⁹ Ń mà n gõ̀ nwǐsí gakó n ji myǐn vwĩ̀-jùlú w yó. ²⁰ Ń mà n wɛ̀rhɛ́ nə̀-bya y èmyɛ́ mɔ́ myɛ ǹdə ń gə́ wɛ̀rhɛ́ kɛ̀bɛ́ ń zwə́l n mə n lwə̀l sǔbri ń cìcì yə̀-bəlɔ̀lɔ́ w yil mú ní. Vwĩ̀-zwə́lnə mó gə twĩ̀ yə̀-bəlɔ̀lɔ́ sǔbri lwə̌l tũ̀twĩ̀ĩ̀ rí lyì bí yó, lyì bí b'a nə bə̀ yə̀-bəlɔ̀lɔ́ w sǔbri. ²¹ Ń mà n zɛ̃̀ n ce bə kwè nə̀-bya y bə m'e du zulə́ jàà y wa, n ji y myǐn ǹdə ń gə́ ju nə̀-bya nã́yə́ə́ y myǐn ní. Wɔ́ Esərayɛl lyì byǎ bɛ́ byɛ̀bɛ́ bə̀ tú dwã yó mó yə̀-bəlɔ̀lɔ́ w sǔbrí lwə̌l vwĩ̀ rí èta. ²² È gə wɔ́ yó-cə́bal ń wɛ̀rhɛ́ yə̀-bəlɔ̀lɔ́, ń gar Cinu ń Yi rí nyə́ né rə̀dù ǹdə́ ń yə̀l, n já n cĩ́ yò ń cìcì yó wə, ²³ bə̀ gə ce n lwar yə̀-bəlɔ̀lɔ́ w kɔ̀bɔ́ ń wɛ̀rhɛ́ mɔ́ párá, ń mà n zə bə̀cìlə́ kɛ̀bɛ́ kaka bə y zhe n bə̀ n pa. ²⁴ Ń mà n cĩ́ ń jɛ̃̀ bə̀cìlə́ y yó w yó, n zɛ̃̀ n zwə́l y jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ rɛ́ nɛ́ mɔ́ wa, Cinu yé né. Vwĩ̀ rí rə̀myɛ́ mɔ́ wɔ́ yə̀-bəlɔ̀lɔ́ sǔbri lwə̌l vwĩ̀ ǹdə́ rɛ. ²⁵ Vwĩ̀-zwə́lnə mó mà n mɔ́rh ń jə̀fɔ́lɛ́ vwǎm mɔ́ bə̀ gu yə̀-bəlɔ̀lɔ́ sǔbri lwə̌l yil mú jal mɔ́ wẽ́, n cĩ́ cĩ́ vwĩ̀ námpúm cɛ̃́ɛ̃́ rɛ́ jùlú w nyimi ní yó; n zɛ̃̀ n ló jal mɔ́ mɔ̀bɔ́ mə̀ dàl mɔ́ vwĩ̀ námpúm cɛ̃́ɛ̃́ rɛ́ jùlú w kùr wə. ²⁶ Ń mà n ji nwǐsí gakó myǐn vwĩ̀-jùlú w yó ǹdə yə̀-zùlə́ vwĩ̀ rí nwǐsí ta. Vwĩ̀-zwə́lnə mó gə tú ń twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí yó-cə́bal mɔ́ yó ń zhɛ̀, yó-cə́bal mɔ́ já n nə ń yə̀-bəlɔ̀lɔ́ w sǔbri. ²⁷ È gə wɔ́ dwí rí lò nánfò ń wɛ̀rhɛ́ yə̀-bəlɔ̀lɔ́ ǹdə́ ń yə̀l, ń gar Cinu nyə́ né rə̀dù, n já n cĩ́ yò ń cìcì yó wə, ²⁸ bə̀ gə ce n lwar ń yə̀-bəlɔ̀lɔ́ w párá, ń mà n zə bɔ̀-nyɔ̃̀ kɔ̀bɔ́ kaka b'o zhe n bə̀ n pa, yə̀-bəlɔ̀lɔ́ w kɔ̀bɔ́ ń wɛ̀rhɛ́ mɔ́ yilə; ²⁹ ń mà n cĩ́ ń jɛ̃̀ bɔ̃̀ w bə̀ la zwə́l yə̀-bəlɔ̀lɔ́ w yil mú yó w yó, n zɛ̃̀ n zwə́l w jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ rɛ́ nɛ́ mɔ́ wa. ³⁰ Vwĩ̀-zwə́lnə mó mà n zɛ̃̀ n mɔ́rh ń jə̀fɔ́lɛ́ vwǎm mɔ́ jal mɔ́ wa, n cĩ́ cĩ́ mu vwĩ̀ námpúm cɛ̃́ɛ̃́ rɛ́ vwĩ̀-jùlú w nyimi ní yó, n zɛ̃̀ n ló jal mɔ́ mə̀ dàl mɔ́ gakó ò kùr wə. ³¹ Lò mó mɔ̀bɔ́ ń tú vwĩ̀ rí zwə́l mó mà n zɛ̃̀ n gõ̀ nwǐsí gakó ǹdə bə̀ gə́ n'ê gòm se yə̀-zùlə́ vwĩ̀ rí zwə́l yi ní mú, vwĩ̀-zwə́lnə mó zɛ̃̀ n ce bə ji si myǐn vwĩ̀-jùlú w yó, sə yə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə. Vwĩ̀-zwə́lnə mó gə tú ń twĩ̀ sǔbri pɔ tũ̀twĩ̀ĩ̀ rí yə̀-bəlɔ̀lɔ́ w cə́bal mɔ́ yó ń zhɛ̀, yə̀-bɔlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri. ³² È gə wɔ́ pyìrhə̀ ń zə n bə̀ ń la pɔ bə m'e zwə́l vwĩ̀ ń yə̀-bəlɔ̀lɔ́ w yilə, è m'a yə̀ pyì-nyɛ̀ kɛ̀bɛ́ kaka bə y zhe. ³³ Ń mà n cĩ́ ń jɛ̃̀ pyìrhə̀ y bə̀ la zwə́l ń yə̀-bəlɔ̀lɔ́ w yil mú yó w yó, n zɛ̃̀ n zwə́l y jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ rɛ́ è wẽ́ mó wə. ³⁴ Vwĩ̀-zwə́lnə mó mà n zɛ̃̀ n mɔ́rh ń jə̀fɔ́lɛ́ vwǎm mɔ́ bə̀ zwə́l mó jal mɔ́ wa, n cĩ́ cĩ́ vwĩ̀ námpúm cɛ̃́ɛ̃́ rɛ́ vwĩ̀-jùlú w nyimi ní yó, n zɛ̃̀ n ló jal mɔ́ mə̀ dàl mɔ́ gakó ò kùr wə. ³⁵ Vwĩ̀-zwə́lnə mó mà n zɛ̃̀ n gõ̀ nwǐsí gakó ǹdə bə̀ gə́ n'ê gòm yə̀-zùlə́ vwĩ̀ pyìrhə̀ y nyɛ̌sɛ́ nɛ́, n zɛ̃̀ n ce bə ji si myǐn vwĩ̀-jùlú w yó n mə n súlí kùjírə́ nyɛ̀bɛ́ nə̀ gakó n'ê jí myǐn Cinu yil mú ni. Vwĩ̀-zwə́lnə mó gə tú ń twĩ̀ yə̀-bəlɔ̀lɔ́ w sǔbri pɔ tũ̀twĩ̀ĩ̀ rí yə̀-bəlɔ̀lɔ́ w cə́bal mɔ́ yó ń zhɛ̀, yə̀-bɔlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri.