¹ Cinu zɔ̀m ǹdə́ Muyiisi n wɔ̀: ² «Wál Esərayɛl lyì byǎ bɛ́ púlə́púlə́ ne: Yál-na àmyɛ́ Yi lyì b'àmyɛ́, Cinu á Yi rí bə dõ zhe yé. ³ Á mə̀dù gakó mà n nyàm ń da ǹdə́ ń ná, sə n súlí n nyàm à shìrhə́ y dwã nɛ́. Wɔ́ àmyɛ́ à wɔ́ Cinu á Yi rí. ⁴ Á t'á la yə nánkɔ̀mdɛ kùr tó yé, á t'á la yə zùrhù á cìn yil yé. Wɔ́ àmyɛ́ à wɔ́ Cinu á Yi rí. ⁵ Á gə la yə̀-zùlə́ vwĩ̀ zwə́l Cinu yilə, sə á zwə́l ré rə tó ǹdə nyə́ né gə́ n'ê byili ní mùnì n zwẽ á vwĩ̀ rí: ⁶ Bə̀ m'a dɔ̃̀ rə̀ nàmá bɛ́ rə̀ zwə́l mó dɛ̃ rɛ́ ǹdə́ rə̀ zɛ̃̀ nəkɔkɔ́lɛ́ yá; rə̀ dwà nə̀tɔ̀ dɛ̃ rɛ́, bə̀ m'a ji nàmá bɛ́ byɛ̀bɛ́ bə̀ dàl mɔ́ myǐn; ⁷ bə̀ gə nyɛ́ɛ́ bə̀ dɔ̀m bɛ dwã nə̀tɔ̀ dɛ̃ rɛ́, bə̀ t'â la rə̀-ná-cí lwə̌l mó zõ yé, bə̀ bə̀ wɔ́ nàmá byɛ̀bɛ́ bə̀ pɔn; ⁸ lò mɔ̀bɔ́ ń cẽ n dɔ̃̀ bɛ mà n zhĩ dóó ń cìn ni ń gə́ fuuli Cinu cəl ré mó yilə; sə bə̀ m'a vùr rə̀-ná-cí ń dwí rí wẽ́. ⁹ Á gə tú á la á cɛsɛ́ jə̌r, ǹ tá ǹ la ǹ cɛ y jə̌r ń mə́ yí è swɛ̃́ rɛ́ nɛ yé, sə ǹ tá ǹ la ǹ kwã nɛ́ kwã̀ɔ̃̀ ń gǔn jíjí ywẽ́ nyɛ̀bɛ́ nə̀ dàl mɔ́ myɛ yé; ¹⁰ ǹ tá ǹ la ǹ də̀vɛ̃́-cèmé né byǎ bɛ́ ga pɔ̌r yé, sə ǹ tá ǹ la byɛ̀bɛ́ bə̀ ló tɛ̃́ mɔ́ myɛ pwǎ yé; ǹ m'ǎ yẽ̌ be ń pə nə̀mɔ̀ mɔ́ ǹdə́ zhə-bal mɔ́ nɛ. Wɔ́ àmyɛ́ à wɔ́ Cinu á Yi rí. ¹¹ Á t'á la numbyíní ŋwɔ́l yé, á t'á la kɔma góm á pə á da-dǒ lò ne yé, á t'á la mɔ myìnù yé. ¹² Á t'á la à yil ré zə á m'á bwəl nyí e jà wɔ́ kɔma yé: ǹ gə wɛ̀rhɛ́ èta ǹ m'ǎ fuuli à yil ré. Wɔ́ àmyɛ́ à wɔ́ Cinu. ¹³ Ǹ tá ǹ la pyǎ ń tó ǹ jè-dõ dɛnnɛ ń zɛ̃̀ yé, sə ǹ tá ǹ la mɔ ŋwɔ́l myɛ yé; tùntùnnə kwǎndɛ́ t'â la ǹ jɔ̃̀ w mãɔ̃ kɔn m'e yí è zɛ̃̀ nəkɔkɔ́lɛ́ yé; ¹⁴ ǹ tá ǹ la sə̀-bɔ̀rhɔ̀ tǔrh yé, sə ǹ tá ǹ la ku kɔ̀bɔ́ ò m'a lyə́lyɛ́rɛ́ lyìlyǒ o ji tɛ̃́ myɛ ò yé né cṹ yé; wɔ́ èta ǹ m'ǎ nyàm ǹ Yi rí ní. Wɔ́ àmyɛ́ à wɔ́ Cinu. ¹⁵ Á t'á la bùrsi kɔ́ námməjóló yé: ǹ tá ǹ la nə̀mɔ̀ mɔ́ nɛ sãɔ̃ yé, ǹ tá ǹ la nyí lyì-fɔ̀lɔ̀ w myɛ kwã nɛ́ co yé, kə́ ǹ da-dǒ lò mó bùrsí ǹdə cángá tũ̀twĩ̀ĩ̀ rí gə́ n'ê yǎl nɛ́; ¹⁶ ǹ tá ǹ la ǹ dwí rí lò yil námməlwɛ̀lɛ́ zɔ̌m yé, sə ǹ tá ǹ la cà kɛ̀bɛ́ è m'a ce bə ló ǹ jè-dõ jal tɛ̃́ mɔ́ lò ne co yé. Wɔ́ àmyɛ́ à wɔ́ Cinu. ¹⁷ Ǹ tá ǹ la ǹ da-byǐ mú súl yé, sə ǹ tá ǹ la tə́tɔ̀ná co ǹdə́ ǹ da-dǒ lò mó bú mùnì ga dóó bə̀k'a jòm ǹ yó ń shò kwã nɛ́ yé; ¹⁸ ǹ tá ǹ la ǹ jim cṹ yé, ǹ tá ǹ la ǹ dwí rí lyì bí lwɛlɛ rɛ́ bə̀ wɛ̀rhɛ́ mɔ́ mɔ́ kǒ ń cĩ́ ǹ wẽ́ yé: rə̀myɛ́ ce ǹ m'ǎ swéné ǹ dõ ǹdə ǹ cìcì mú ta. Wɔ́ àmyɛ́ à wɔ́ Cinu. ¹⁹ Zwẽ-nə à nyə́ né: ǹ tá ǹ la ce ǹ vwàmá dwí kùrə̀ nə̀lyè jìl dwã yé; ǹ tá ǹ la wə̀-dwí kùrə̀ nə̀lyè dú ǹ cɛ y w yé; ǹ tá ǹ la gɔ̀nɔ̀ kɔ̀bɔ́ ò sɔ̃̀ ǹdə́ étɔ̃̀-nyínsi dwí kùrə̀ nə̀lyè zú yé. ²⁰ Bal gə zù ǹdə́ kɛ̃, kɛ̃ mɔ́ zɛ̃̀ ń wɔ́ yə-kɛ̃, bal dõ yà ń la jú, e jà bə̀ gwẽ̌ yə̀ ń ye y wɛ́rɛ́ y kwɛ̃̌ ráá ń gwẽ̌ bə ń cìn cǐ, bə̀ m'a ji bal mɔ́ ń zù ǹdə́ mɔ mɔ́ bwã̌; bə̀ t'â la bɛ gu yé, bə̀ bə̀ y'à gwẽ̌ yə̀ kɛ̃ mɔ́ nɛ yẽ̌ ń cǐ ń cìn yé; ²¹ bal mɔ́ mà n zə pyì-bya n mə n bə̀ dwã-joló kòrhó w nyí rí ni n pə Cinu ni, yò kɔrhɔ vwĩ̀ zwə́l yilə; ²² vwĩ̀-zwə́lnə mó gə zə yò kɔrhɔ pyì-bya y n mə n twĩ̀ yə̀-bəlɔ̀lɔ́ w bal mɔ́ wɛ̀rhɛ́ mɔ́ sǔbri pɔ tũ̀twĩ̀ĩ̀ rí bal mɔ́ yó Cinu yé né ń zhɛ̀ kwã nɛ́, bal mɔ́ já n nə ń yə̀-bəlɔ̀lɔ́ w òmyɛ́ mɔ́ sǔbri. ²³ Á gə tú á zù Kanaã tənà y wa, á zɛ̃̀ á zhele cèmé dwí tɛ̌ tɛ̌ nə̀ n'ê ce byǎ gakó, á m'ǎ nyǐ nə̀ byǎ bɛ́ ǹdə kɔn dɛ̀bɛ́ rə̀ wɔ́ jìmdi kɔn ta; byinə nə̀tɔ̀ wẽ́, nə̀ byǎ bɛ́ m'a j'a yə̀ jìmdi kɔn á yilə, bə̀ t'â la bɛ jú yé; ²⁴ byinə nə̀na nyǎn rɛ́, bə̀ m'a pə nə̀ byǎ bɛ́ gakó Cinu ni, nə̀bán-co címsi wẽ́; ²⁵ sə byinə nə̀nu byin rí, á m'ǎ zɛ̃̀ á jí bi; rə̀myɛ́ mɔ́ m'a ce á wò-jə̀ə́ré m'à j'â n'ê pùl rə̀ la. Wɔ́ àmyɛ́ à wɔ́ Cinu á Yi rí. ²⁶ Á t'á la kaka jú jal yó w yéa, á t'á la jə̀-myaarhɛ tumə tũ̌ yé, á t'á la jə̀pársɛ myɛ párh yé; ²⁷ á t'á la á ywésé nyə́ né góm á kə́kɛ́lɛ́ yé, sə á t'á la á pə̀pésé tama nɛ́ fɔ́n yé; ²⁸ Á t'á la á yala nɛ́ kǎr kǎr cùù yil yé, á t'á la myaarhɛ myɛ cṹ á yala nɛ́ nɛ yé. Wɔ́ àmyɛ́ à wɔ́ Cinu. ²⁹ Ǹ tá ǹ la ǹ bə̀kɔ́ cǐrh ń ce fwə̌l wẽ́ ń mə́ yààlɛ mɔ́ yé, mùnì ga tənà y lyì bí bə̀k'a zɛ̃̀ bə̀ n'ê fwə̀lə́, sə tənà y púlə́púlə́ bə̀k'a sú ǹdə́ pwarha tũ̀twĩ̀ĩ̀ yé; ³⁰ zwẽ-nə à shìrhə́ y dwã nɛ́ nyə́ né, sə á súlí á nyàm à jì yə́. Wɔ́ àmyɛ́ à wɔ́ Cinu. ³¹ Á t'á la ywə́lse byõ̌ yé, bə̀ rə̀myɛ́ mɔ́ m'a ce á jǐrh jìmdi cìnə́. Wɔ́ àmyɛ́ à wɔ́ Cinu á Yi rí. ³² Ǹ m'ǎ zɛ̃̀ ń zhì dɛ̃̌ yə́-pwə̀rh cə́bal yé né, sə́ nyàm náncɛ; rə̀myɛ́ mɔ́ yi ní ǹ m'ǎ nyàm ǹ Yi rí. Wɔ́ àmyɛ́ à wɔ́ Cinu. ³³ Zhə-bal gə tú ń la ǹ sõ jǒm, á tənà y wa, á t'á la pyǎ á tó ń dɛnnɛ á zɛ̃̀ yé; ³⁴ á m'ǎ zə zhə-bal mɔ́ ń tú ń jě á sõ mó ǹdə tənà y cìcì lò ta, ǹdə wɔ́ ámyɛ̌ mə̀dù ta; ǹ m'ǎ swéné mo ǹdə ǹ cìcì mú ta; bə̀ ámyɛ cìcì mú yàl zhələ Ezhibti tənà y wẽ́. Wɔ́ àmyɛ́ à wɔ́ Cinu á Yi rí. ³⁵ Á t'á la tɛ̀bɛ́ rə̀ də̀ cángá wɔ̀rhɔ́ kɔn rɛ́ tɛ̀bɛ́ bə̀ vùr nyə́ rə̀ shò kwã mɔ́ yé: kɔn dwɛ̀lɛ̀ ǹdə́ kɔn dùmì e súlí kɔn yírh mɔrhɔ wẽ̀ ré. ³⁶ Pyǎ-na mɔrhɔ wẽ̀ ré tɛ̀bɛ́ rə̀ càn mɔ́ ǹdə́ dùmì mɔrhɔ shisí shɛ̀bɛ́ sə̀ càn mɔ́ ǹdə́ efá kɛ̀bɛ́ è càn mɔ́ e súlí yɛ̃ kɛ̀bɛ́ è càn mɔ́. Wɔ́ àmyɛ́ à wɔ́ Cinu á Yi rí à ce á shə́r Ezhibti tənà y w mɔ́. ³⁷ Á m'ǎ zwẽ à nyə́ né ǹd'â lùl-e-púrsí gakó, á wɛ̀rhɛ́ ǹdə nə̀ gə́ n'ê byili ní. Wɔ́ àmyɛ́ à wɔ́ Cinu.»