¹ Cinu zɔ̀m ǹdə́ Muyiisi, Aarɔ̃ byǎ bɛ́ bə̀lyè y bə̀ cù bə̀ gə́ y'à tú Cinu yé né yi ní mú, cu mú kwã nɛ́. ² Cinu zɔ̀m ǹdə́ Muyiisi n wɔ̀: «Wál ǹ da-byǐ Aarɔ̃ nɛ bə̀ ń bə̀ Yi jì w zwì n lyɛ̃ n vò gɔ̀nɔ̀ w ò bɔ̀n Yi jì y dwã w mɔ́ kwã nɛ́, Yi dɔbrɛ kùlkṍ w nyí-byǐ rí yé y wə, yi tɛ̌ tɛ̌ yé, èta à gə tú Yi dɔbrɛ kùlkṍ w nyí-byǐ rí yə́-pɛ̀lɛ́ wa, ébɔ̃ w wẽ́ yi ní, ń tá ń la cú yé. ³ Sə Aarɔ̃ gə tú ń la Yi jì y w zú yi ní, nyǐ kɔn dɛ̀bɛ́ ń mà n zə n mə n vò: nə̀-bya yə̀-bəlɔ̀lɔ́ sǔbri lwə̌l vwĩ̀ zwə́l yilə, e súlí pyì-bya vwĩ̀ námpúm cɛ̃́ɛ̃́ zwə́l yilə; ⁴ ń mà n zù vwĩ̀-zwə́lnə kàmə̀zù-pɔ́lɛ́ y è sɔ̃̀ ǹdə́ lɛ̃̌, n ce lɛ̃̌ jar, n lyẽ lɛ̃̌ cã̌-tɔ̀nɔ̀ ń cã̌ nɛ́, n zɛ̃̀ n súlí n kwè lɛ̃̌ yó-bɔrɔ́ w n cĩ́ ń yó wə, rə̀myɛ́ mɔ́ wɔ́ vwĩ̀ rí zwə́l tum rí gàndɛ́; ń mà n shɛ nɛ̃̌ éfòró n zù ri; ⁵ sə Esərayɛl lyì byǎ bɛ́ púlə́púlə́ m'a pɔ̃ bə̀-cǐlsi sə̀lyè yə̀-bəlɔ̀lɔ́ sǔbri lwə̌l vwĩ̀ zwə́l yilə, e súlí pyì-bya vwĩ̀ námpúm cɛ̃́ɛ̃́ zwə́l yilə. ⁶ Aarɔ̃ mà n zwə́l nə̀-bya y ń cìcì yə̀-bəlɔ̀lɔ́ w sǔbri lwə̌l yilə, rə̀myɛ́ kwã ń mà n zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń cìcì mú ǹdə́ ń kɛ̀lɛ́ y lyì bí yilə. ⁷ Ń mà n zwẽ bə̀-cǐlsí sə̀lyè y n cĩ́ Cinu yé né, dwã-joló kòrhó w nyí rí ni. ⁸ Ń mà n zɛ̃̀ n tə́ tántɛ́ɛ́ bə̀-cǐlsí sə̀lyè y shò kwã nɛ́, ń la mə n lwar bə̀cìlə́ kɛ̌ bə̀ m'a pə Cinu ni ǹdə́ kɛ̌ bə̀ m'a pə Azazɛla yil mú párá. ⁹ Aarɔ̃ mà n pə bə̀cìlə́ y kɛ̀bɛ́ tántɛ́ɛ́ y zɔ Cinu yil mú Cinu ni, n zɛ̃̀ n zwə́l y yə̀-bəlɔ̀lɔ́ sǔbri lwə̌l yilə. ¹⁰ È gə wɔ́ bə̀cìlə́ y kɛ̀bɛ́ tántɛ́ɛ́ y zɔ Azazɛl yil mú, bə̀ m'a zə y bə b'e cĩ́ Cinu yé né, nã́nyì bə m'e twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí è yó, bə zɛ̃̀ bə jì y bə ce gɔ-elũ èpòlò w wə, bə pə Azazɛl nɛ. ¹¹ Aarɔ̃ mà n zwə́l nə̀-bya y ń cìcì yə̀-bəlɔ̀lɔ́ w sǔbri lwə̌l yilə, rə̀myɛ́ kwã ń mà n zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń cìcì mú ǹdə́ ń dwí rí yilə. Ń gə tú ń zwə́l nə̀-bya y èmyɛ́ mɔ́ ń cìcì yə̀-bəlɔ̀lɔ́ w sǔbri lwə̌l yil ń zhɛ̀ kwã nɛ́, ¹² ń mà n vùr myìn-cala nə̀ wə̀ə̀se, vwĩ̀-jùlú w yó Cinu yé né n ce nə̀zhĩ̌ y kɛ̀bɛ́ bə̀ m'ê ji wẽ̀ rə̀ lwẽ́ nã́nyə̀nyɛ̀lɛ́ y myǐn mú yírh pyã́ã́m, e súlí wẽ̀ ré rə̀ lwẽ́ nã́nyə̀nyɛ̀lɛ́ y bə̀ n'ê ji myǐn mú mún jə̀-gúlə́ yírhə́ nə̀lyè, n mə n vò gɔ̀nɔ̀ w ò bɔ̀n Yi jì y dwã w mɔ́ èpákɛ̀. ¹³ Ń mà n zɛ̃̀ n ló wẽ̀ ré rə̀ lwẽ́ nã́nyə̀nyɛ̀lɛ́ y myǐn mú w Cinu yé né, sə rə̀ nyɛ̀sɛ́ m'a j'a pyi kùlkṍ w Yi dɔbrɛ́ bwə̀lsé wɔ ò wẽ́ mó nyí-byǐ rí ni. Èta, ń tá ń la cú yé. ¹⁴ Ń mà n wɛ̀rhɛ́ nə̀-bya y jal mɔ́, n zɛ̃̀ ń nə́ ń mɔ́rh ń jə̀fɔ́lɛ́ y mə̀ wẽ́ ń mə́ ń zhɛ́rhɛ́ mɔ kùlkṍ w nyí-byǐ rí sarh rɛ́ rə̀ zǎ yi-púrhí sõ mó yó; n zɛ̃̀ n zhɛ́rhɛ́ mɔ twər tàlpyɛ̀ kùlkṍ w nyí-byǐ rí yé né. ¹⁵ Ń mà n zwə́l bə̀cìlə́ y dwí rí yə̀-bəlɔ̀lɔ́ w sǔbri lwə̌l vwĩ̀ rí yil mú, n zə è jal mɔ́ n mə n vò gɔ̀nɔ̀ w ò bɔ̀n Yi jì y dwã w mɔ́ èpákɛ̀; n zə jal mɔ́ mə̀myɛ́ n mə n wɛ̀rhɛ́ ǹdə ń gə́ zə nə̀-bya y nyǎn mɔ́ n mə n wɛ̀rhɛ́ nɛ́: n zhɛ́rhɛ́ mɔ kùlkṍ w nyí-byǐ rí yó ǹdə́ rə̀ yé né. ¹⁶ Ń mà n twĩ̀ Esərayɛl lyì byǎ bɛ́ pwarha tumə né ǹdə́ bə̀ nyí-ni-cṍ, è n'ê yǎl e wɔ̀ bə̀ yə̀-bəlwàálɛ́ gakó sǔbri pɔ tũ̀twĩ̀ĩ̀ rí Yi dúdú jàà y yó wə; ń mà n wɛ̀rhɛ́ èta, dwã-joló kòrhó w ò ŋwɛ́nɛ́ ǹdə́ bɛ, bə̀ pwarha tumə né cəcəl w mó myɛ yilə. ¹⁷ Aarɔ̃ gə tú ń zù dwã-joló kòrhó w wə, ń la yə̀-bəlɔ̀lɔ́ sǔbri pɔ tũ̀twĩ̀ĩ̀ rí tũ̌ Yi dúdú jàà y wẽ́ yi ní, kɔn b'e yí n kə́ n du pwẽ̀ ne, lò mə̀dù ga myɛ bə mə̌ sə n yə̀ dwã-joló kòrhó w w yé: ń mà n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń cìcì mú ǹdə́ ń dwí rí e súlí Esərayɛl lyì byǎ bɛ́ púlə́púlə́ yilə. ¹⁸ Ń mà n du kòrhó w wə, n vò vwĩ̀-jùlú w ò wɔ Cinu yé né mó yó, n twĩ̀ jìmdi vǔr tũ̀twĩ̀ĩ̀ rí ò yó; ń mà n wɛ̀rhɛ́ nə̀-bya y jal mɔ́ ǹdə́ bə̀cìlə́ y jal mɔ́ n cĩ́ cĩ́ vwĩ̀-jùlú w nyimi ní nə̀ kə́kɛ́lɛ́ w mɔ́ yó. ¹⁹ Ń mà n mɔ́rh ń jə̀fɔ́lɛ́ jal mɔ́ wẽ́ n zhɛ́rhɛ́ mɔ vwĩ̀-jùlú w yó twər tàlpyɛ̀, n mə n vùr Esərayɛl lyì byǎ bɛ́ jìmdí bə̀ m'e byèlè w mó, n ce o jǐrh Yi nyɔ̃̌. ²⁰ Ń gə tú ń twĩ̀ Yi dúdú jàà y ǹdə́ dwã-joló kòrhó w e súlí vwĩ̀-jùlú w jìmdí vǔr tũ̀twĩ̀ĩ̀ rí ń zhɛ̀ kwã nɛ́, ń mà n zə bə̀cìlə́ nã́nyì y n mə n bà. ²¹ Aarɔ̃ mà n cĩ́ ń jɛ̀sɛ́ sə̀lyè y bə̀cìlə́ y nã́nyì y yó w yó: ń mà n tùrhì Esərayɛl lyì byǎ bɛ́ dwə́ə́ré gakó ǹdə́ bə̀ nyí-ni-cõ mó gakó, è n'ê yǎl e wɔ̀ bə̀ bə̀ yə̀-bəlwàálɛ́ gakó n byili, n zɛ̃̀ n kwè zhĩĩ rí n cĩ́ bə̀cìlə́ y yó w yó; rə̀myɛ́ kwã nɛ́, ń mà n ce bal, ń yà ń dámǎ n tɛnɛ n zhɛ̀, jì y n mə n vò gɔ-elũ èpòlò w wə. ²² Bə̀-cìlə́ y m'a j'a zhĩ bə̀ dwə́ə́ré gakó e m'e vò cə-kùlì wẽ́. Ń gə jì bə̀cìlə́ y n ce gɔ-elũ èpòlò w kwã nɛ́, ²³ Aarɔ̃ mà n kwɛ̃̀ n vò n zù dwã-joló kòrhó w wə, n vùr lɛ̃̌ gàndɛ́ ń yà ń zù n mə n zù Yi dúdú jàà y w mɔ́, n zɛ̃̀ n cĩ́ ri gàà mɔ́. ²⁴ Ń mà n shɛ nɛ̃̌ jàà y kɛ̀bɛ́ bə̀ vùr rə̀myɛ́ mɔ́ yil mú wẽ́, n zɛ̃̀ n kə́ n zù ń gàndɛ́ dwã bɛ́; rə̀myɛ́ kwã nɛ́, ń mà n zɛ̃̀ n du, n zwə́l vwĩ̀ námpúm cɛ̃́ɛ̃́ ń cìcì mú yilə, n zwə́l rə̀ dõ dwí rí yilə; ń mà n súlí n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń cìcì mú ǹdə́ dwí rí ga yilə; ²⁵ rə̀myɛ́ kwã, ń mà n zɛ̃̀ n ji vwĩ̀ rí vwàmá nɛ́ nwǐsí myǐn yə̀-bəlɔ̀lɔ́ sǔbri lwə̌l yilə. ²⁶ Lò mó mɔ̀bɔ́ ń jì bə̀cìlə́ y n ‹pə Azazɛl nɛ mɔ́› mà n shɛ̀rh ń gàndɛ́ n súlí n shɛ nɛ̃̌; sə rə̀myɛ́ kwã, ń mà n kə́ n bə̀ n zù zulə́ jàà y wa. ²⁷ Bə̀ m'a zə nə̀-bya y ǹdə́ bə̀cìlə́ y bə̀ zwə́l yə̀-bəlɔ̀lɔ́ sǔbri lwə̌l yil mú, bə zɛ̃̀ bə zə rə̀ jal mɔ́ bə̀ m'e twĩ̀ yə̀-bəlɔ̀lɔ́ sǔbri pɔ Yi dúdú jàà y w mɔ́, bə m'e du zulə́ jàà y wa, sə bə̀ m'a ji rə̀ tàndɛ́ ǹdə́ rə̀ nàmá bɛ́ e súlí rə̀ byə̀nə́ né myǐn. ²⁸ Lò mó mɔ̀bɔ́ ń la rɛ myǐn ju mú mà n shɛ̀rh ń gàndɛ́, n súlí n shɛ nɛ̃̌; sə rə̀myɛ́ kwã, ń mà n ká n ŋwɛ̀nɛ́ n zù zulə́ jàà y wa. ²⁹ Wɔ́ nyí rə̀ m'à j'â ŋwɛ́nɛ́ gaga, á yilə: cànsɛ̀ shàlpyɛ̀ nyǎ y dwã shí yù wə, ámyɛ̌ Esərayɛl lyì byǎ bɛ́ tənà y lò ǹdə́ zhə-bal mɔ̀bɔ́ ń jě á cəcəl w mó, á m'ǎ lyẽ á nyí, á t'á la tum rə̀dù ga myɛ tũ̌ yé. ³⁰ Bə̀ wɔ́ dɛ̃ rɛ́ rə̀myɛ́ bə̀ n'ê twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí rə̀ n'ê ce á jǐrh wárhgáá mɔ́ á yó. Bə̀ m'a vùr á yə̀-bəlwàálɛ́ gakó á jǐrh wárhgáá Cinu yé né. ³¹ Rə̀ m'a yə̀ shìrhə́ dɛ̃ á yilə, tum t'â la tũ̌ dɛ̃ rɛ́ rə̀myɛ́ mɔ́ yù w yé, á m'ǎ lyẽ á nyí rə̀ yù wə. Wɔ́ nyí rə̀ m'à j'â ŋwɛ́nɛ́ gaga, á yilə. ³² Lò mó mɔ̀bɔ́ ń la yə̀-bəlɔ̀lɔ́ sǔbri pɔ tũ̀twĩ̀ĩ̀ rí tũ̌ mú wɔ́ vwĩ̀-zwə́lnə mó mɔ̀bɔ́ bə̀ tútǔ ǹdə́ nwə̃̌ bə súlí bə pɔ̃ tum rí tũ̌ ŋwɔ̀nɔ́ ń da jàà w mɔ́. Ń mà n zù lɛ̃̌ gàndɛ́, vwĩ̀-zwə́lnə gàndɛ́; ³³ ń mà n twĩ̀ jìmdi vǔr tũ̀twĩ̀ĩ̀ rí Yi dúdú jàà y yilə; ń mà n twĩ̀ ri dwã-joló kòrhó w e súlí vwĩ̀-jùlú w yilə; ń mà n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí vwĩ̀-zwə́lnə bé ǹdə́ dwí rí púlə́púlə́ rə̀ tú dwã yó mó yó. ³⁴ Wɔ́ nyí rə̀ m'à j'â ŋwɛ́nɛ́ gaga, á yilə, Esərayɛl lyì byǎ bɛ́ yə̀-bəlwàálɛ́ sǔbri pɔ tũ̀twĩ̀ĩ̀ rí shò kwã nɛ́, twər rə̀dù byin byin gakó.»