¹ Èlǎsɛ̃́, ámyɛ̌ nǝ̀cɛ̀nà bɛ́, Cili-nǝ kɔn dɛ̀bɛ́ à la ába byilu mú: Kúrh-nǝ á wɔ́wɛ́lɛ́ zwini rí tɛ̀bɛ́ rǝ̀ bàn ába zal mɔ́ yilǝ. ² Á nǝ̀cɛ̀ndɛ́ dɛ̀rhɛ̀; cɔ̃́ jú á gàndɛ́. ³ Á sánǝ́má mɔ́ ǹdǝ́ á wársɛ́ jú rǝ shɛ̀l. Sǝ rǝ̀ jú mú b'a yǝ̀ zhǝ̀n-kɔn rǝ̀ n'ê byili b'ǎ yǝ̀ cɛ̀nɛ̀ twĩ̀ yé. Mǝ̀ m'a jí ába ǹdǝ myǐn ta. Lũ w zhɔ̌ bwǝlse, á j'â gwẽ̌ n'á pyà nǝ̀cɛ̀ndɛ á cĩ́ dɛ̃̌. ⁴ Á kwè lyì bǝ jǝ̀r á cɛsɛ́, sǝ á yǝ̀ bɛ kwɛ̃̌ yé. Bǝ̀ n'ê kúrhǝ́, sǝ lũ gakó Cǐnnǝ mó nyɛ̀ɛ̀ bǝ̀ cǝ́lǝ́ né. ⁵ Á pyà wu-nyɔ̃̀ dwí gakó cɛ yó, á jú kùjú á sú, á nù kɔn lyɛ̃ cɛ nɛ, á jǐrh ǹdǝ bǝ̀cǐl-bǝ̀tǎnsɛ bǝ̀ la gu ta. ⁶ Á kɔ́ wu-cángá cìnǝ́ bùrsi á ce bǝ gu bi, bǝ̀ yǝ̀ cẽ yé. ⁷ Da-byǎ, pyɛ́nɛ́-na á cìn á m'á dɛ̃̀ Cinnǝ mó twírí yǝ́. Nyǐ-nǝ vwàlna gǝ́ yà n wɛ̀rhɛ́ nɛ́: ń nǝ́ ń dɛ̃̀ tɛ̀bɛ́ ń dù cɛ y yó byǎ náàcɛ̀nà; ń nǝ́ ń dɛ̃̀ dwà nã́yǝ́ǝ́ y ǹdǝ́ nánkwaá y ga ǹdǝ́ cìn-pyɔ́nɔ́. ⁸ Ámyɛ pyɛ́nɛ́-na á cìnǝ̀, s'á zǝ wu-jɔ̀, bǝ̀ Cǐnnǝ mó twírí y bwǝlse. ⁹ Da-byǎ, á bǝ̀k'á zǝ ŋwɔ́ŋwɔ̌ ǹdǝ́ dwã yé, mùnì Yi bǝ̀k'a kǝ́ á bùrsi rǝ pǝ ába dóó yé. Nyǐ-nǝ bùr-kárna mɔ́ ŋwɛ́nɛ́ bwǝ̀rǝ̀ y nyí ni. ¹⁰ Da-byǎ, kwě-nǝ Yi nyì-zwennǝ bé bǝ̀ zɔ̀m Cǐnnǝ mó yil ré yil mó nà. Bǝ̀ shɛ̀nɛ́ bǝ pyɛ́nɛ́ bǝ̀ cìn bǝ nwɛ̀nɛ̀. ¹¹ Tɛ́rɛ́-na lyì bí byɛ̀bɛ́ bǝ̀ shɛ̀nɛ́ nɔ̀nɔ̀ w mɔ́ yò. Nǝ́myɛ̌ n'é wǝ̀l bǝ̀ nyǐ bǝ̀ wɔ́ wu-põ̀ cinǝ́. Bǝ̀ zɔ̀m Zhakɔɔbɛ wu-jɔ̀ w yò á nyɛ̀ɛ̀. Á yě kɔn rɛ́ dɛ̀bɛ́ Cǐnnǝ mó pɔ mɔ rǝ̀myɛ́ kwã nɛ́ mɔ́. Cǐnnǝ mó wɔ́ wu-bɔ̀nɔ̀ ǹdǝ́ nɔ̀nɔ̀-dǔr cǝ́bal zhǝ̀nà. ¹² Da-byǎ, kɔn du: á bǝ̀k'á bwǝl nyí ǹdǝ́ Yi yil ré, ráá cɛ yá, ráá kɔn dõ yé. Á gǝ mǝ̌ s'á wɔ̀ bǝ̀ ɔ̃̀ɔ̃̂ s'e yǝ̀ ɔ̃̀ɔ̃̂; á gǝ mǝ̌ s'á wɔ̀ bǝ̀ ɔ̃́'ɔ̃ s'e yǝ̀ ɔ̃́'ɔ̃; mùnì ga Yi bǝ̀k'a kǝ́ á bùrsi rǝ pǝ ába dóó yé. ¹³ Ámyɛ̌ mǝ̀dù gǝ nǝ́ ń nwɛ̀nɛ̀, sǝ n lwǝ̀l Yi. Ń mɔ̀ gǝ zhe wu-nyɔ̃̀ sǝ n nún n cèrhé Yi. ¹⁴ Ń mɔ̀ gǝ tú ń bǝ jàn zhe, sǝ n byẽ̀ gùlú w yé né cìnǝ́ bé bǝ b'e lwǝ̀l Yi ń yilǝ, sǝ bǝ zǝ nwǝ̃̌ bǝ tútǔ mu Cǐnnǝ mó yil ré yilǝ. ¹⁵ Bǝ̀ gǝ lwǝ̀l Yi ǹdǝ́ bǝ̀ wun gakó, Yi-co w òmyɛ́ b'a zwẽ nǝ̀bwɛ̃̀ mɔ́. Cǐnnǝ mó mà n vwǎrh mɔ. Ń gǝ wɛ̀rhɛ́ yǝ̀-bǝlwàálɛ myɛ, ń mà n nǝ rǝ̀ sǔbri. ¹⁶ Byili-nǝ á dwǝ́ǝ́ré dwã nɛ, s'á lwǝ̀l Yi dwã yilǝ, mùnì á nǝ bǝsàzùlí. Wu-cángá cí gǝ lwǝ̀l Yi, ń Yi lwǝ̌l mó zhe jàn nánfɔ̀lɔ̀. ¹⁷ Elyi yà ń wɔ́ numbyíní ǹdǝ nǝ́ gakó ta, sǝ ń lwǝ̀l Yi ǹdǝ́ ń wu gakó mùnì ga dwà y bǝ̀k'a nyɔ̀ yé. Sǝ zhɛ̀n ga dwà y wɛ̀rhɛ́ byinǝ nǝ̀tɔ̀ ǹdǝ́ fwã́, ǹdǝ́ è nɛ̃̌ yǝ̀ cɛ y yó twǝrh yé. ¹⁸ N kǝ́ n lwǝ̀l Yi, sǝ è nyɔ̀wà, jíjí lyĩ rǝ ce byǎ. ¹⁹ Da-byǎ, ámyɛ̌ mǝ̀dù gǝ ywǝ̀r zhɛ̀n rɛ́ sɔ́má y yó n jé, sǝ da-byǐ mǝ̀dù ká n zǝ mɔ n bà, ²⁰ lwar-na bǝ̀ lò ǹ ká ń zǝ yǝ̀-bǝlɔ̀lɔ́ cí n kwɛ̃̀ n yẽ̌ lwɛlɛ sɔ́má y ń yà ń ŋwɛ́nɛ́ è yó mó ne, ǹ zwẽ mo cu jɔ̃̀ wa, sǝ ń mà n nǝ ń yǝ̀-bǝlwàálɛ nánzhǝzhɔ̌ sǔbri.