koussoube-marc-lee_exo_text

Kǝ̀kàl-fwɛ̀lɛ̀ 3

¹ Muyiisi yà ń nǝ́ ń kál ń cǝ́mbal zhǝtoro vwàmá, Majã vwĩ̀-zwǝ́lnǝ mó; n zǝ vwàmá n mǝ n vò gɔ-elũ èpòlò w kwã nɛ́, n lyɛ̃ n vò Yi pyɔ̀ w Orɛbɛ nɛ́ mɔ́. ² Bǝzhɔzhe màlɛ́ka lyí mu myìn-zhù wẽ́, sɔ̀lɔ̀ cǝcǝl wǝ. Muyiisi nǝ́ ń nyǐ; n pwírí sɔ̀lɔ̀ w zhe myǐn o j'à t'â jí gaga yé. ³ Muyiisi wɔ̀: À m'a k'a pyìrhí a nyǐ nɛrɛ́ nánfɔ̀lɔ̀ kɔ̀bɔ́ wɔ́ bǝ̀kɔ́n dwí nɛrɛ́ ǹdǝ́ kɔ̀bɔ́, a nyǐ wɔ́ bǝ̀kɔ́n è ce sɔ̀lɔ̀ zhe myǐn o j'à t'â jí mú. ⁴ Bǝzhɔzhe gǝ́ nɔ ń nǝ́ pyìrhí ń nyǔ, Yi zhì sɔ̀lɔ̀ w rǝ byẽ̀ rǝ wɔ̀: Muyiisi! Muyiisi! N lyár n wɔ̀: Nyǐ ni! ⁵ Dieu wɔ̀: Ǹ bǝ̀ká yí nyɔ̀nɔ̀ yé, vuér ǹ nǝcìlǝ̀ né, bǝ̀ cɛ y kɛ̀bɛ́ ǹ zhǐ è wẽ́ mó wɔ́ Yi nyǎ. ⁶ Rǝ súlí rǝ zhe: À wɔ́ Ǹ da Yi rí, Abǝham Yi rí, Yǝzakɛ Yi rí ǹdǝ́ Zhakɔbɛ Yi rí. Muyiisi círhí ń yé y né, bǝ̀ ywẽ y'à zhe mo ǹdǝ́ Yi nyǔ. ⁷ Bǝzhɔzhe wɔ̀: À nɔ à dwí rí nɔ̀nɔ̀ w Ezhipti ní mú, à nyɛ̀ bǝ̀ wùrhí y bǝ̀ zwǝ̀ bé bǝ̀ n'ê wǔrh mó, à yě kɔn gǝ́ n'ê yì bi ma mɔ́. ⁸ Sǝ à só tɛ̃́ à la rɛ lwǝ̌r Ezhipti lyì bí jɔ̃̀ wa, a ce bǝ vò tǝnà nánwowòrhó wẽ́, tǝnà kɛ̀bɛ́ yil ǹdǝ́ tùr n'ê dùr tɛ̃́ è wẽ́, jàà kɛ̀bɛ́ Kana lyì ǹdǝ́ Eshɛ̃́ lyì ǹdǝ́ Amɔ̃́ lyì ǹdǝ́ Fǝrɛzhɛ lyì ǹdǝ Evɛ̃ lyì e súlí Zhǝbu lyì jě è wẽ́ mó. ⁹ Nyǐ, Esǝrayɛl lyì byǎ bɛ́ wìísí yú à sono, nɔ̀nɔ̀ w kɔ̀bɔ́ Ezhipti lyì n'ê nwɛ̀nɛ̀ bɛ mɔ́. ¹⁰ Sǝ èlǎsɛ̃́, zhǝl, à la mɔ́ tũ̌ Fwaraɔ̃ sono, ń vùr à dwí rí, Esǝrayɛl lyì byǎ bɛ́ Ezhipti ní. ¹¹ Muyiisi wɔ̀ Yi ni: Àmyɛ́ wɔ́ mɔ̌, à la m'a vò Fwaraɔ̃ sono, a m'a vùr Esǝrayɛl lyì byǎ bɛ́ Ezhipti ní mú? ¹² Dieu wɔ̀ mɔ: À m'a yǝ̀ nɛ́ ǹdǝ́ mɔ́; sǝ rǝ̀myɛ́ b'a yǝ̀ mɔrhɔ kɔn ǹ yilǝ rǝ n'ê byili bǝ̀ wɔ́ àmyɛ́ à twĩ̀ mú: Ǹ gǝ tú ǹ ce dwí rí du Ezhipti ǹ zhɛ̀, s'á zǔl Yi pyɔ̀ w kɔ̀bɔ́ yó. ¹³ Muyiisi wɔè Yi ni: Nyǐ à m'a vò Esǝrayɛl lyì byǎ bɛ́ sono, a wɔ̀ bɛ: Nyǐ wɔ́ á dabá Yi rí rǝ̀ twĩ̀ ni á sono. Sǝ bǝ̀ gǝ zɛ̃̀ bǝ̀ bwǝ̀rh ne ǹ yil ré, à m'a wɔ̀ bɛ bǝ byẽ̀? ¹⁴ Yi wɔ̀ Muyiisi ni: À wɔ́ lò mó mɔ̀bɔ́ ń wɔ́ mɔ́. Rǝ k'e súlí rǝ wɔ́: Wɔ́ èta ǹ m'ǎ yí ń lyár Esǝrayɛl lyì byǎ bɛ́ nɛ́: Wɔ́ mɔ̀bɔ́ ń twĩ̀ ni á sono mó. ¹⁵ Yi k'e wɔ̀ Muyiisi ni kǝ́dò: Ǹ m'a zɔ̀m ǹdǝ́ Esǝrayɛl lyì byǎ bɛ́ ń súlí ń wɔ̀: Bǝzhɔzhe, á dabá Yi rí, Abǝrahm Yi rí, Yǝzakɛ Yi ri rí ǹdǝ́ Zhakɔbɛ Yi rí, twĩ̀ ni á sono. Nyǐ à yil ré byinǝ byinǝ, nyǐ à yil ré byǎ byǎ è m'e la gaga. ¹⁶ Zhǝl, ń byẽ̀ Esǝrayɛl náncɛsɛ́ ń cĩ́ dwã yó, sǝ́ wɔ̀ bɛ: Bǝzhɔzhe mó, á dabá Yí rí, Abǝraham Yi rí, Yǝzakɛ Yi rí ǹdǝ́ Zhakɔbɛ Yi rí lyí ni. ¹⁷ Rǝ̀ wɔ̀ nɛ: À nɔ ába, a nǝ kɔn tɛ̀bɛ́ bǝ̀ wɛ̀rhɛ́ ába Ezhipti ní mú, sǝ à wòwǝ̀: À m'a ce á du Ezhipti ní, á gǝ́ n'á nwɛ̀nɛ̀ mǝ̀gã̌ mɔ́, ce á vò Kana lyì ǹdǝ́ Eshɛ̃́ lyì ǹdǝ́ Amɔ̃́ lyì bí ǹdǝ́ Fǝrɛzhɛ lyì bí ǹdǝ Evɛ̃ lyì bí e súlí Zhǝbu lyì bí tǝnà y wa, yil mó ǹdǝ́ tùr rí gǝ́ n'ê dùr tɛ̃́ mǝ̀gã̌ mɔ́. ¹⁸ Bǝ̀ m'a cili ǹ zɔ̀mà nɛ́, ǹ zǝ Esǝrayɛl náncɛsɛ́ ń mǝ́ vò Ezhipti lyì pyɔ̌ mɔ́ sono, á wɔ̀ mɔ: Nyǐ Bǝzhɔzhe, Ebǝrǝbá Yi rí lyí nǝ́ba. Pǝ nǝ́ba sɔ́má nǝ́ du nǝ́ vò dwã nǝ̀tɔ̀ zhǝl gɔ-elũ èpòlò w wǝ, nǝ́ zwǝ́l vwǝ̃̀ nǝ́ pǝ Bǝzhɔzhe nǝ́ Yi rí ni. ¹⁹ À yě bǝ̀ Ezhipti lyì pyɔ̌ mɔ́ tá ń la ába yõ̌ gaga á vò yé, ǹdǝ́ è gǝ dǝ̀ jɛ̃̀ kɛ̀bɛ́ è jɛ̀ yé. ²⁰ À m'a zhẽ̌ à jɛ̃̀, a mà Ezhipti, à a wɛ̀rhɛ́ màmyaarhɛ tǝnà y wẽ́. Rǝ̀myɛ́ kwã nɛ́ ń mà n yẽ̌ ába á vò. ²¹ À gaga mɔ́ m'a ce Ezhipti lyì bí nyǐ dwí rí tɛ̀bɛ́ ǹdǝ́ sónó, á gǝ tú á gǝ tú á du á la, á t'á du a vò ǹd'á jǝ̀-fwǝ̀r yé. ²² Kɛ̃ gakó mà n lwǝ̀l kàmɔ nǝ̀zhǐrh ǹdǝ́ sánǝ́má nǝ̀zhǐrh ń jǝ̀-dõ mó ǹdǝ́ mɔ̀bɔ́ ń ŋwɛ́nɛ́ ń sõ jù w mú ni, n lwǝ̀l gàndɛ myɛ á pǝ á byǎ bɛ́ ǹdǝ́ á bǝ̀kwá bɛ́ nɛ á zù bi. Èta á m'a kɔkɔlɛ Ezhipti lyì bí wẽ̀ ré.