koussoube-marc-lee_exo_text

Kǝ̀kàl-fwɛ̀lɛ̀ 1

¹ Nyǐ-nə Esərayɛl byǎ bɛ́ bə̀ tó Zhakɔbɛ nɛ bə bə̀ ⁴ Ezhiptiy mú, lò gakó ǹdə́ ń dwí rí mú yilə né, è y'à wɔ́ : ² Orɔbɛnɛ, Shəmənyɔa, Ləvyi, Zhəda, Yəsakarɛ, Zabəlɔ̃,Ɓɛ̃zhamɛ̃, ³ Danɛ, Nəffətəli, Gadɛ ǹdə́ Asɛɛrɛ. ⁵ Zhakɔbə byǎ y'à wɔ́ nunə shə́shàlpyɛ̀ ; rə̀myɛ́ yi ní ǹdə́ Zozhɛfu myɛ̌ y'ǎ ŋwɛ́nɛ́ Ezhipti ní. ⁶ Rə̀myɛ́ yó né Zozhefu ǹdə́ ń da-byǎ ǹdə́ bə̀ lyì bí byɛ̀bɛ́ bə̀ y'à wɔ́ bə̀ shí-dwã bɛ́ rə̀myɛ́ yí ní mú gakó cùwə̀. ⁷ Esərayɛl byǎ bɛ́ j'a zɛ̃̀ bə lù byǎ nánzhəzhɔ bə̀ pù, bə sú tənà yá, Bə̀ jàn rɛ́ j'â n'ê súlí twéé twéé. ⁸ Rə̀myɛ́ yó né pyɔ̌ mə̀dù zɛ̃̀ ń cǐ Ezhipti tənà yá ; Pyɔ̌ mɔ́ ńmyɛ̌ mɔ́ yə̀ Zozhefu pár lwar. ⁹ N zɛ̃̀ n zɔ̀m ǹdə́ ń tənà y lyì bí n wɔ̀ : Nyǐ-nə Esərayɛl byǎ bɛ́ á nyìwé, bə̀ wɔ́ dwí nànzhəzhɔ̌ dɛ̃́dɛ̃́, bə̀ jàn rɛ́ myɛ du nə́ba. ¹⁰ Rə̀myɛ́ ce, bà-nà nə́ wɛ̀rhɛ́ surhə, nə́ ce bə̀ bə̀k'a k'e pù yé, mùnì ga búlə́ gə zɛ̃̀ sə bə̀ bək'a vò bə ce nyí nə́ zwə̀ bé kwã nɛ́ bə bú ǹdə́ nə́ba yé ; mùnì ga bə nə sɔ́má bə du nə́ tənà y w yé. ¹¹ Bǝ zɛ̃̀ bǝ vùr yó-cìnǝ́ bǝ cĩ́ mùnì ga bǝ pǝ tumǝ nyɛ̀bɛ́ nǝ̀ jɛ̀ bǝ̀ n'e᷇ twǐ̀. Wɔ́ rǝ̀myɛ́ yó né bǝ̀ lù cɛmɛ bǝ̀ n'ê byẽ̀ bǝ̀ Pǝtɔm ǹdǝ́ Ramɛsɛ bǝ pǝ Faraɔ̃ nɛ ń wẽ̀ cṹ jààsɛ. ¹² Ǹdǝ́ bǝ̀ n'ê nwɛ̀nɛ̀ bɛ ga bǝ cẽ bǝ̀ n'ê pùl bǝ̀ la. Bǝ zɛ̃̀ bǝ̀ n'ê jí zùù rì ǹdǝ̀ Esǝyɛl lyì byǎ bɛ́. ¹³ Rǝ̀myɛ́ yó né bǝ ce Esǝrayɛl lyì byǎ bɛ́ jǐrh yómǝ́ bǝ̀ n'ê twĩ̀ tũ̀-kùlǝ̀. Bǝ ce bǝ̀ lũ w wẽ́ yál mɔ́ k'e bǝ nyàn zhe yé. ¹⁴ Bǝ ce be yómde tũ̀-kùlǝ̀ wẽ́; bǝ̀ n'ê fwǝ̌rh dɔ bo-kwǎ; bǝ̀ n'e᷇ vwàl bǝ̀ cɛsɛ́ wa. Wɔ́ tũ̀-kùlǝ̀ né nǝ̀myɛ́ èta mɔ́ bǝ̀ y'à ce bǝ̀ n'ê twẽ̀. ¹⁵ Ezhipti pyɔ̌ mɔ́ zɛ̃̀ n zɔ̀m ǹdǝ́ Ebǝrǝbá elwǝrh-kana bɛ́, Sǝshǝra ǹdǝ́ Puwǝ nɛ, ¹⁶ n wɔ̀ bɛ : Á gǝ lwǝrh Ebǝrǝbá kana, è gǝ wɔ́ bal-byǐ s'a gu yǝ; s'e gǝ wɔ́ kɛ̃-byǐ s'a yẽ̌ y á bǝ̀k'a gwi y yé. ¹⁷ Sǝ elwǝrh-kana bɛ́ gǝ́ y'à n'ê nyàm Yi mú ce bǝ̀ yǝ̀ pyɔ̌ nyí rí zwẽ yé, bǝ̀ n'ê yẽ̌ bǝ̀sɔ́ná nɛ bǝ̀ t'â gwi bi yé ¹⁸ Pyɔ̌ mɔ́ tǝ̀ rǝ̀myɛ́ yil n byẽ̀ elwǝrh-kana n wɔ̀ bɛ: Wɔ́ bǝ̀kɔ́n yil á n'á wɛ̀rhɛ́ èta mɔ́, á yẽ̌ bǝ̀sɔ́ná bɛ bǝ̀ ŋwɛ́nɛ́ nɛ́ mɔ́? ¹⁹ Elwǝrh-kana bɛ́ wɔ̀ Faraɔ̃ nɛ: Nyǐ Ebǝrǝbá kana bɛ́ dǝ̀ ǹdǝ Ezhipti lyì kana bɛ́ ta yé; bǝ̀ zhe jàn, ce bǝ̀ y'a mǎ bǝ lù ǹdǝ́ bǝ̀ yǝ̀ elwǝrh-kɛ̃ mɔ́ sõ yí yé. ²⁰ Yi wɛ̀rhɛ́ cɛ̀nɛ̀ ǹdǝ́ elwǝrh-kana bɛ́; rǝ̀myɛ́ ce dwí rí pù rǝ jǐrh nánzhǝzhɔ̌. ²¹ Elwǝrh-kana bɛ́ y'à n'ê dùr Yi ywẽ, ce Yi ce bǝ̀ kǎlsɛ́ lyì bí y'à n'ê súlí. ²² Pyɔ̌ faraɔ̃ zɛ̃̀ n pǝ nyí ń tǝnà y lyì bí gakó ne n wɔ̀: Bǝ̀ gǝ lùl bal-byǐ gakó s'á kwè y a vò á ji bǔ wǝ; sǝ è gǝ wɔ́ wɔ́ kɛ̃-byǐ gakó s'á yẽ̌ y e yǝ̀ nɛ́.