Kǝ̀kàl-fwɛ̀lɛ̀ 4
1
Ámyɛ̌ yó-cìnǝ́ bé, zǝ-nǝ á tùntùnnǝ bé ǹdǝ́ wu-cángá, s'á bǝ̀k'á cír jàlà á só , á zɛ̃̀ á ba jàlà só yé. Á yě b'ǎmyɛ zhe yó-cǝ́bal mǝ̀dù ń ŋwɛ́nɛ́ Arǝzana wa.
2
Ce-nǝ jàn nɛ́ ǹdǝ́ Yi-co twéé gakó; zǝ-nǝ á yírhǝ́, s'á ce Yi nǝ̀bán twéé twéé.
3
Lwǝ̌l-nǝ Yi nǝ́myɛ yilǝ, bǝ̀ rǝ̀ pǝ nǝ́ba sɔ́má nǝ́ bwǝ̀l rǝ̀ zɔ̀mɛ̀ rɛ́, sǝ nǝ́ bwǝ̀l kɔn dɛ̀bɛ́ rǝ̀ shèè Kristǝ shò-kwã nɛ́ mɔ́ nǝ́ byili, bǝ̀ wɔ́ zɔ̀mɛ̀ rɛ́ rǝ̀myɛ́ bwǝ̌l mó yil bǝ co ne byǝ̀nǝ́-jù wǝ.
4
Lwǝ̌l-nǝ Yi mùnì ga a ŋwɛ̀nɛ́ a byili rǝ̀ zɔ̀mɛ̀ rɛ́ pamparɛ̃ɛ̃ ǹdǝ à gǝ́ mǝ̌ s'a byili ri ní
5
Zǝ-nǝ á cìn ǹdǝ́ surhǝ nyɛ̀bɛ́ nǝ̀ càn ǹdǝ́ lyì bí byɛ̀bɛ́ bǝ̀ dǝ̀ Kristǝ-lyì mú, s'á wɛ̀rhɛ́ á gǝ́ wɔ̌ nɛ́ á zǝ á cìn náàcɛ̀nɛ́ twéé gakó.
6
Ce-nǝ á zɔ̀mà nɛ́ yǝ̀ zɔ̀mà nyɛ̀bɛ́ nǝ̀ càn twéé twéé, nǝ̀ zhe shil, s'á lwar náàcɛ̀nɛ́ á gǝ́ b'ǎ lyár lò mɔ̀bɔ́ gakó ń la ába zɔ̀mɛ̀ bwǝ̌rh mó né.
7
Nǝ́ da-byǐ nántwǝ̌ Tishiki mà n byili ába kɔn gǝ́ wɔ́ nɛ à sõ. Ń nǝ́ ń tó ne ń twĩ̀ Cǐnnǝ mó tum rí ǹdǝ kɔn gǝ́ mǝ̌ nɛ́.
8
Wɔ́ rǝ̀myɛ́ è ce à n'â twĩ̀ mu á sõ, mùnì ga n byili ába kɔn gǝ́ wɔ́ nɛ́ nǝ́ sõ, sǝ n pǝ ába cícú n súlí.
9
À n'â twĩ̀ ńmyɛ̌ ǹdǝ́ Oneshim. Ńmyɛ wɔ́ nǝ́ da-byǐ nántwǝ̌. Wɔ́ ámyɛ̌ lò ndǝ́ mɔ. Bǝ̀myɛ́ bǝ̀lyè y ga b'a byili ába kɔn gǝ́ wɔ́ nɛ́ nyɔ̀nɔ̀ mɔ́ gakó.
10
Arǝsǝtarkɛ nǝ́ ń ce ába. Ń ne ń ŋwɛ́nɛ́ byǝ̀nǝ́-jù wǝ. Barnabaasɛ nǝkɔ́-byǐ Markɛ myɛ nǝ́ ń ce ába. Nǝ́ y'ǎ zɔ̀m ń yò ǹd'ába. Ń gǝ tú á sõ, s'á zwẽ ń zhǝǝle cɛ̀nɛ̀.
11
Yezu mú mɔ̀bɔ́ bǝ̀ n'ê byẽ̀ bǝ̀ Zhusǝtuusi mú myɛ nǝ́ ń ce ába. Zhwifubá byɛ̀bɛ́ bǝ̀ jǐrh Kristǝ-lyì mú wẽ́, wɔ́ bǝ̀myɛ́ bǝ̀tɔ̀ y bǝ̀ n'ê tó ne bǝ̀ twĩ̀ Yi pyɛ̀lɛ̀ rɛ́ yilǝ, sǝ bǝ̀ pɔ nɛ wu-jɔ̀.
12
Epafǝraasɛ nǝ́ ń ce ába. Ńmyɛ wɔ́ ámyɛ̌ lò. Ń wɔ́ Yezu Kristǝ tùntu;ènnǝ. Ń nǝ́ ń lwǝ̀l Yi á yil twéé gakó, mùnì ga á yǝ̀ rǝ̀ lyì-twǝ̌rh, s'á zhì kẽkẽ á wɛ̀rhɛ́ Yi pùbùlǝ̀ kɔn gakó wẽ́.
13
Ń nǝ́ ń twĩ̀ dɛ̃́dɛ̃́ ámyɛ̌ ǹdǝ́ Laɔdɛɛsɛ Kristǝ-lyì bí ǹdǝ́ Yǝrǝpoli nyǝ̀ná bɛ́ ga yilǝ. Àmyɛ́ cìcì mú wɔ̌ à wǝ̀l rǝ̀myɛ́.
14
Nǝ́ dɔwa Lwiki ń wɔ́ lyìtwǝ́r mó ǹdǝ́ Dɛmaasɛ myɛ n'ê ce ába.
15
Wál-na Laɔdɛɛsɛ Kristǝ-lyì bí ǹdǝ́ Nǝmfa ǹdǝ́ gùlú w lyì bí bǝ̀ n'ê jòm dwã yó ń sõ kɛ̀lɛ́ w mɔ́ nǝ bǝ̀ nyǐ nǝ́ n'é ce be.
16
Á gǝ kàrmɔ sɛ́bɛ́ rɛ́ tɛ̀bɛ́ á zhɛ̀, s'á pǝ rɛ Laɔdɛɛsɛ gùlú w lyì bí myɛ nɛ bǝ kàrmɔ. Sǝ à sɛ́bɛ́ rɛ́ bǝ̀ la pǝ rǝ shí Laɔdɛɛsɛ rǝ bǝ̀ á sõ mó, sǝ ámyɛ kàrmǝ rɛ.
17
Wál-na Arǝcipi ni bǝ̀ ń zǝ tum rí tɛ̀bɛ́ Cǐnnǝ mó pɔ mɔ cɛ̀nɛ̀, sǝ n twĩ̀ ri náàcɛ̀nɛ́.
18
Wɔ́ àmyɛ́ Pwǝǝ à n'â zɔ̀m zɔ̀mà nɛ́ nyɛ̀bɛ́ à m'â ce ába. Wɔ́ àmyɛ́ cìcì jɛ̃̀ è kɛ̃ nɛ. Lyǝ̌rh-nǝ bǝ̀ nyǐ wɔ́ byǝ̀nǝ́-jù w à ŋwɛ́nɛ́. Yi b'a cĩ́ bwǝl á yó.