Kǝ̀kàl-fwɛ̀lɛ̀ 1

1 Kɛ̃, wɔ́ àmyɛ́ gùlú w yé né cǝ́bal mɔ́, à n'â kɛ̃ sɛ́bɛ́ rɛ́ tɛ̀bɛ́ à la ǹmyɛ́ mɔ̀bɔ́ Yi cír mó ǹdǝ́ ǹ byǎ bɛ́ ga nɛ pɔ. À só ába zhǝ̀n zhǝ̀nà. È dǝ̀ àmyɛ́ dúdú à só ába yé; lyì bí byɛ̀bɛ́ bǝ̀ yě zhǝ̀n dɛ́ gǝ́ wɔ́ nɛ́ mɔ́ myɛ só ába. 2 Wɔ́ zhǝ̀n dɛ́ tɛ̀bɛ́ rǝ̀ ŋwɛ́nɛ́ nǝ́ wẽ́ mó rǝ̀ ce nǝ́ só ába, sǝ rǝ̀ b'a j'â ŋwɛ́nɛ́ ǹdǝ́ nǝ́ba twéé twéé. 3 Nǝ́ Da Yi ǹdǝ́ ń Byǐ Yezu Kristǝ b'a cĩ́ bwǝl nǝ́ yó, bǝ pǝ nǝ́ba sǔbri ǹdǝ́ yǝ̀-zùlǝ́ zhǝ̀n ǹdǝ́ sónó wẽ́! 4 A pwírí ǹ byǎ bɛ́ jàlà ŋwɛ́nɛ́ zhǝ̀n sɔ́má yó ǹdǝ nǝ́ Da mɔ́ gǝ́ pɔ nǝ́ba nyí ní. Rǝ̀myɛ́ ce à wu nyɛ̀ dɛ̃́dɛ̃́. 5 Sǝ èlǎsɛ̃́, à n'â lwǝ̀l mó bǝ̀: swénénǝ nǝ́ swéné dwã. Rǝ̀myɛ́ dǝ̀ nyí nándùl à n'â kɛ̃ à la ába pɔ yé. Wɔ́ nyí rí nándwǝ́l lé nǝ́ nɔ kùr-ju yi ní ga mɔ́. 6 Nyí rí tɛ̀bɛ́ á nyɛ̀ɛ̀ kùr-ju yi ní ga mɔ́ n'ê wǝ̀lǝ̀: «Swénénǝ dwã.» E zɛ̃̀ á gǝ só dwã, wɔ́ Yi nyǝ́ né á n'á zwẽ. 7 Lyì sú lũ w wẽ́, bǝ̀ t'â zwẽ nyí bǝ̀ Yezu Kristǝ jǐrh numbyíní zhǝ̀n ga yé, sǝ lyì bí bǝ̀myɛ́ mɔ́ wɔ́ kɔ̀mdɛ̀, bǝ j'à wɔ́ Kristǝ zwǝ̀. 8 Dɛ̃̌-na á cìnǝ̀, á bǝ̀k'á ce nǝ́ tum rí yǝ̀ tùm-fóó yé, mùnì á nǝ á kwǎndɛ́ gakó. 9 Lò mɔ̀bɔ́ ǹ tá ǹ yǎl ń zhì nà èdù yó Kristǝ kàrmɔ́ wẽ́, ń zɛ̃̀ ǹ nǝ́ ǹ súlí kɔn dõ né, Yi tɛ̀nɛ́ ǹ wẽ́ yé. Sǝ lò mɔ̀bɔ́ ǹ zhǐ nà èdù yó Kristǝ kàrmɔ́ wẽ́, Da mɔ́ ǹdǝ́ Byǐ mú ga ŋwɛ́nɛ́ ǹ wẽ́. 10 Lò gǝ bàn á sõ, e j'à dǝ̀ kàrmɔ́ mǝ̀myɛ́ ń mǝ́ ń bànà, s'á bǝ̀k'á zwẽ ń zhǝǝle yé, á bǝ̀k'á ce mo náàcɛ̀nɛ́ myɛ cìcì yé. 11 Lò ǹ gǝ co mo náàcɛ̀nɛ́, ǹ twǝ́r ŋwɛ́nɛ́ ń lwɛlɛ rɛ́ wẽ́. 12 Ywẽ̀ nánzhǝzhɔ̌ gwẽ̌ ŋwɛ́nɛ́ à la ába byilu, sǝ à t'â yǎl a kɛ̃ nɛ sɛ́bɛ́ wẽ́ a pǝ ába yé. À n'â bùl b'à m'a bǝ̀ á sõ, nǝ́ jòm tɛ̃́ nǝ́ zɔ̀m, mùnì ga nǝ́ wun yǝ̀ nyɛ̀n námpúm. 13 Ǹ ná-bǝ̀kɔ́ mɔ́ Yi cír mó byǎ bɛ́ n'ê ce mó.