¹ Ne Poli Krista Yesu ka ceradin Yaa Masa sago baaka ra, ne sɛbɛ ɲin ce Yaa Masa ka mgɔ senumanw ma Efese, wu minnu min Krista Yesu dananbgaw ye. ² An fa Yaa Masa ni Mantgi Yesu Krista la nɛɛma ni dososhɔn ji aa ma. ³ An Mantgi Yesu Krista fa Yaa masa la tando. E Ɲin senuma ka dubaw biɛ daa an kan sankoo jaw ra Krista la. ⁴ Yaa Masa r'an ɲanatɔmɔ Krista ra sani diɲan koni da, yaako an kɛ senumaw ni yaakibiiw je a ɲan kɔɔ. ⁵ Yaa Masa ka kanuya kɔsɔn a flannan ka latgɛ ko an na kɛ a dinw ye Yesu Krista baaka ra ka kanɲan ni jaɲe we, ⁶ yaako a ra ka nɛɛma mi ɲin aan na a ka kanunin na, wo nɔɔrɔ ra tanu . ⁷ An kunmabɔri sɔɔ aye ra a yuu bɔnnin baaka ra, jrumunw yafa kpin, ka kanɲan ni Yaa Masa ka nɛɛma dama dɔnbii we. ⁸ Ee wo nɛɛma shiya an fɛ haari, ni hakritgiya ni dɔnniya shifa biɛ ye. ⁹ A ra sako bunde yira an na ka kanɲan ni a yɛɛ jaɲe we. A ra latgɛ Krista ra, ¹⁰ ko ni waatiw ka dapa sgan mi na, a na sankoo ra fɛnw ni dgukoo kan fɛnw biɛ lajɛn ka kɛ keen ye krista ra, ¹¹ An kɛra ciɛntaraw ye Krista ra fran, bari mi fɛn biɛ kɛ ka kanɲan ni a yɛɛ sako ka kwo latgɛni we, wo flannan ka an kwo latgɛ ka kanɲan ni a sako we, ¹² yaako an ne minnu flannan ka aan dgi da Krista kan, aan kɛ a nɔɔrɔ tanunli sababu we. ¹³ Aa fran, kabini aa shen koma mɛn, aa krishili kibaru juman kpin, aa dgi dara we kan. Aa danin kwɔ wo ra, tgɛmashɛn dara aa kan. Wo mi layidu Ɲi senuma we. ¹⁴ Ɲi senuma mi aan ka cɛn gare fɛn we, k'a yira ko aan na dun wo cɛn na, ni Yaa masa ka a taw biɛ kunmabɔ sgan mi na, yaako a nɔɔrɔ la tanu wo ra. ¹⁵ We ra to, dananya mi ma fɛ Mantgi Yesu ra, ani aa Yaamasa ka mgɔ senumaw biɛ kanun tgo mi na, kabini nee wo kibariya mɛn, ¹⁶ ne ti baaka dari dabla Yaamasa ye aa kɔsɔ. Nee aa tgɔ fwɔ ne ka dareliw la fran, ¹⁷ Ko aan mantgi Yesu Krista ka Yaa masa, nɔɔrɔ fa, wo ra Ɲi senuma ji aa ma, ka aa kɛ hakritgiw ye ka Yaa masa dɔnnuya yira aa ra, yaako aa aye dɔn. ¹⁸ Ne ra a dare ko aa dosokun ɲanw la yɛɛ, yaako Yaa masa laa krii dgi mi na, aa wo dɔn, ani a na cɛn mi ji aa ma a ka mgɔ senunmaw shɛma aa wo nɔɔrɔ fran dɔn, ¹⁹ ka a ka shebgaya damadɔbii fran dɔn aan dananbgaw ka pan fɛ. Wo shebgaya we kanɲan ni a ka fganba baarakɛ tgo we. ²⁰ Ee wo fgan yira Krista krunni we fɛ ka bɔ shuw shɛma ka a sgi a yɛɛ krin fɛ sankoo jaw ra. ²¹ A ra sgi kuntgiyaw ni shebgaya ni fgan ni masayaw biɛ kun naan kwosɛbɛ, ani tgɔw biɛ kun na, diɲan ɲin la tgɔw dama tɛ, hari diɲan nata ra tgɔw fran. ²² Yaa masa fɛn biɛ koo Krita ye k'a ji ka kɛ eglisi kuntgi we kwo biɛ ra. ²³ Eglisi mi a piikoo we . Aye min fɛn biɛ pa, eglisi min wo dapaniya we ye .