1
Luŋasirik kwe, nan ŋilo jambu ko ta kogwon ta liŋ deden kulya ti saret, adi saret gwon ko riŋit ka ’de i diŋit nagon ko ŋuto nyuŋ gwon jörun.
2
Ko ŋuto nakwan a yema ko lalet, saret adi lepeŋ gwon a na lalet lonyit na gwoŋdi nye jörun nu, ama ko lalet aje twan, a ŋilo saret gwe ’bak riŋit ko lepeŋ.
3
Ama nagon ko nye a si ’da ko lele ŋuto na gwoŋdi lalet lonyit nyuŋ jörun nu, a nye luŋuni a kalupe, ama ko lalet lonyit a twan, a ŋilo saret gwe ’bak riŋit ko lepeŋ, a ko nye a yema ko lele ŋuto a nye gwe ’bayin a kalupe.
4
Köti gwon sona luŋasirik kwe, ta aje morakiŋdya ko Kristo i mugun, a ta iŋge twatwa a gwe ’bayin i kulya ti Saresi, anyen ta böŋö gwon a ti lele ŋuto, kweja adi a ti nye lo toŋiyu i twan lo, anyen yi böŋö raradan ludweki ti Ŋun.
5
Kogwon na gwoŋdi yi a ŋutu ti na kak nu, a ’dekesi kaŋ narok nagon Saresi lo toŋiju kune gwe i kita kayaŋ i mugunya anyen radan ludweki ti twan.
6
Nyena soŋinana kilo Saresi gwe ’bak riŋit kayaŋ, kweja adi yi aje twatwa yi gwe ’bayin i riŋit na ŋo logon köju morga yi go lu; yi soŋinana kitakiŋdye Ŋun i gwiliŋit lo töili ludukötyo ti gwon i saresi ti ’beron lo wurö kulu.
7
A kirut yi de kulyani ada? Yi de kulya adi Saresi ŋona jojo ko toron le? ’Bayin sona kwöŋ. Ama ko ködyo Saresi ’bayin, nan ködyö ti den ko toron a nyo. Kweja adi ko ködyö saret a ko tuggö adi, An do ko be ’ya, nan ködyö ti den ko be ’ya a nyo.
8
A ŋilo saret köju iŋge tiŋdu toron i ryeju na komor na ’but i toŋiju na gweyajin liŋ ti belesi köyö i töili. Kogwon ko Saresi ’bayin, a toron gwe gwoso ŋo nagon a twan.
9
Nan köju gwon jörun, kulya kwe ’bayin i Saresi, ama a nagon saret aje po nu, a toron iŋge ŋaun a nan lo twane.
10
A ŋilo saret logon ködyö jakiŋdya nan ru lo, a kölumbö jakiŋdye nan twan.
11
A ŋilo saret iŋge tiŋdu toron i ryeju na komor na ’but, a iŋge mumuluk nan, a tatuje nan i riŋit na ŋilo saret.
12
Nyena Saresi a loke, jujuwesi kase köti a nake, ko a lo rigwo, ko a lo ’but.
13
Yi ŋona kulya adi kulo ŋo logon a lo ’but jakiŋdya nan twan le? ’Bayin sona kwöŋ.Ŋina a toron na tatuja nan, a kweji mugun adi nye ’diri a toron. Toron a kitari ŋilo ŋo logon a lo ’but lo anyen jakiŋdya nan twan, nyena kogwon ŋilo saret, a toron worani a naron bia parik.
14
Yi deden adi kilo Saresi po ko Ŋun; ama nan a ŋuto kana logon kebbu ŋo nagon mugun nio ’de ’deggi, a toron iŋge gwörörö nan gwoso ’dupiet lonyit.
15
Nan ti kurun ŋo nagon nan kökon kune, kogwon nan ti koŋdya ŋo nagon nan ködyö ’de ’dekan koŋdya kune, kölumbö a nan koŋdi ŋo nagon nan maman kune.
16
A ko nan koŋdya ŋo nagon nan ködyö ti ’dekan koŋdya kune, kweja adi nan a ruk kilo Saresi adi se a lo ’but.
17
Kweja adi soŋinana ’bayin a nan lo koŋdya kine ŋo, ama ŋina a toron na si ’da köyö i mugun na, nye na koŋdya.
18
Kogwon nan a den adi ŋo na ’but ti si ’da köyö i mugun, kogwon ma ’di nagon nan ’de ’dekan koŋdya ŋo na ’but, ama a nan tine bulö koŋdya.
19
Kogwon ŋo na ’but nagon nan ’de ’deggi koŋdya kune a nan tine kon se, kölumbö a nan koŋdi ŋo narok nagon nan ti ’dekan koŋdya kune.
20
A ko nan koŋdya ŋo nagon nan ködyö ti ’dekan koŋdya kune, kweja adi ŋilo soŋinana ’bayin a nan lo koŋdya kine ŋo, ama ŋina a toron na si ’da köyö i mugun na, nye na koŋdya.
21
Nyenagon nan aje kurun adi kulya kwe gwon sona, ko nan yöŋö koŋdya ŋo na ’but, a toron puja gwon i domba na nan.
22
Kogwon köyö i töili lukata nan lyölyöŋön ko Saresi ti Ŋun,
23
ama nan a meddya köyö i mugun adi kulye saresi lepelok kata logon mömörö ko Saresi logon yeyeesi kwe a ruk kulo, a kilo saresi lepelok ’deke mokaddu nan a ’dupiet lo toron nagon si ’da köyö i inugun na.
24
Wöidiö! nan a ŋuto lo lokole! Ŋa mo lo lwöggu nan i na mugun nagon joŋga nan i twan na?
25
Tinate lo Ŋun lo lwökuŋdyö nan ko Matat likaŋ Yesu Kristo i mugun lo!
Nyena kulya kwe gwon sona, nan ko mugun nio kitakiŋdya Ŋun ko yeyeesi kwe ka ’de, ama köyö i mugun na na kak nan kebbu saresi ti toron.