¹ A Yesu ko tutuŋge jambu kilo kulyaesi liŋ, a nye kulyani ko ŋutu kanyit kajujumuk kulo adi, ² Ta a den adi i mukök na perok murek ŋesaka mo gwon kata, a nan ŋuro lo ŋuto mo pakine ko merok i konisi anyen ’bikiki i ködini na görö.'' ³ A i ŋinu diŋit a koanejin temejik se ko temejik ti jur momoruŋdye ko koane duma i ’baŋ. logon a Kayapa. ⁴ A se ga ’yi kiko logon se morgi Yesu a lwön anyen tatuja lepeŋ. ⁵ Kogwon se a kulya adi, Ti yi gwe ti mok lepeŋ i diŋit na rorwe, an ŋutu pikin i woŋon. ⁶ Nyena na gwoŋdi Yesu Betania i kadi na Simona logon a moka rimajin lo, ⁷ a nene ŋuto poŋdi ko lepeŋ. ni joŋdya lupunit logon a ŋurupit lo lupu a alabasata. ŋilo lupunit a jore ko welet na mon ’bura nagon gwörö go. A ŋina ŋuto ’bukökiŋdye ŋina welet ko Yesu i kwe, na gwoŋdi nye i nyesu nu. ⁸ Ama a na meddi ŋutu kajujumuk kine kulya nu, a se wore woran, a se pije adi, Nyo ŋina welet körö sona? ⁹ Kogwon ŋina welet ködyö gwöröji ko gurut jore, a kine gurut ködyö kokorakine lomerika. ¹⁰ 10a Yesu iŋge den kine kulya, a pije se adi, Nyo ta yöyöŋgu na ŋuto? Nye aje konakin nan ŋo na ’but parik. ¹¹ Kogwon ta ŋupi si ’da ko ŋutu lomerika, ama nan mo ti si ’da ko ta ŋupi. ¹² Kogwon na ’bukökiŋdye nye na welet köyö i mugun na, nye koŋdya sona anyen tetenakiŋdya mugun nio i nuka. ¹³ ’Diri nan takiŋdya ta adi, i piritön liŋ ti kak ’bukuluŋ nagon lo Loŋe Lo ’but a tokuöji kata kunu, po nagon ŋina ŋuto aje kon na mo jajama, anyen yeyeori lepeŋ. ¹⁴ A kirut lele lo ŋutu kajujumuk puök wot murek lo lupu a Yuda Isikariota lo iti ko kiŋanejin temejik yu, ¹⁵ a pije adi, Ta de tiŋdu nan nyo ko nan a tikin Yesu kasu i könisi? A se temakiŋdye lepeŋ. pödöjin merya musala. ¹⁶ Suluja i ŋinu diŋit a nye ga ’yi diŋit na ’but nagon wukiŋdye Yesu i tatua. ¹⁷ A i lor suluet lo rorwe lo Ambata nagon ’bak Kape, a ŋutu kajujumuk kulo poŋdi ko Yesu ni, a pije adi, Do ’dek yi tetenakiŋdya do po liŋ ajo ya anyen do böŋö nyesu rorwe lo Pasaka? ¹⁸ a nye waddi se adi, Iti ta köji i lele ŋuto, ko taki ta lepeŋ. adi, Katodinönit lo kulya adi, Diŋit nio gwe nyona. Nan se ko ŋutu kwe kajujumuk de nyesu rorwe lo Pasaka konut kadi. ¹⁹ a ŋutu kajujumuk kulo iŋge koŋdya gwoso na takiŋdye Yesu se nu, a se teteŋdi kinyo lo Pasaka. ²⁰ A nagon kak gwe a sömukö nu, a nye si ’dakine i nyesu ko ŋutu kanyit kajujumuk puök wot murek kulo i pirit na geleŋ. ²¹ a na gwoŋdi se i nyesu nu, a nye kulyani adi, ’Diri nan takiŋdya ta adi, lele losu mo titikin nan i tatua. ²² A se delyani delya parik, a se liŋ geleŋ geleŋ suluje pipija lepeŋ adi, matat, ŋona a nan lo tiŋdu do i tatua le? ²³ A nye waddi adi, ŋuto lo nye ’ya ko nan i kalaba lo, nye mo lo tiŋdu nan i tatua. ²⁴ lye, nan ŋuro lo ŋuto tutu i na kak gwoso na wuröri kulya kwe nu, ama gwon a delya i ŋuto logon a tiŋdu nan ŋuro lo ŋuto i tatua lo! Ködyö a na ’but ko ŋilo ŋuto köju a ko yuŋwe. ²⁵ A Yuda lo tiŋdu lepeŋ i tatua lo pije lepeŋ adi, Katodinönit, ŋona a nan lo tiŋdu do i tatua le? A Yesu waddi adi, Do aje tuk. ²⁶ A nagon se nyenyesu nu, a Yesu ’dumuŋdye ambata, a ’boroji ’boroja a pipiŋdye pipiŋdya, a tiŋdi ŋutu kanyit kajujumuk, a kulyani adi, Wuji ta, nyesi ta; ŋina a mugun nio. ²⁷ a nye ’dumuŋdye koŋo, a nagon nye aje tiŋdu ŋun tinate nu, a nye tikiŋdye lepeŋat, a kulyani adi, Moji ta kine, ta liŋ; ²⁸ kogwon kine a rima kwe ti tomoret nagon tomor a ŋun ko ŋutu kanyit, nagon mo ’bukwe kaŋo kogwon kulya ti ŋutu jore i lalaju na toronjin. ²⁹ Nan takiŋdya ta adi, nan koti mo ti möju kine pioŋ ti ludweki ti binyo tojo ko ŋilu lor logon nan, mo möji binyo ludukö ko ta i pirit na geleŋ ko Baba i Tumatyan lu. ³⁰ A se yo ’yi koli, a kirut a se lupuŋdye kaŋo, a iti i Mere lo Jeitun. ³¹ A kirut Yesu kulyani ko lepeŋat adi, I lo tukwaje ta liŋ mo kukutörö bot kogwon kulya kwe; kogwon a wurö adi, ŋun mo gwutökin kayukunit kak, a teŋ na yidin mo reki rekin. ³² Nyena i mukök nagon nan aje toŋiyu i twan nu, a nan mo iti Galilaya kasu ŋerot, a kokwe nagon ta a ko nyuŋ tu nyu. ³³ A Petero waddi lepeŋ adi, Ma ’di kodyö lepeŋat liŋ kukutörö bot kogwon kulya kunök, ama nan mo ti kukutörö bot kwöŋ. ³⁴ A Yesu kulyani ko lepeŋ adi, ’Diri nan takiŋdya do adi, i lo tukwaje, i ŋerot nagon sukuri a ko nyuŋ sira nu, do de rerenya nan daŋin musala adi do a ko den nan. ³⁵ a Petero kulyani ko lepeŋ adi, Ma ’di ködyö ko nan tatua ko do i pirit na geleŋ, nan mo ti renya do kwöŋ. A ŋutu kajujumuk liŋ kulyani jojo. ³⁶ Nyena a Yesu iti ko ŋutu kanyit kajujumuk kulo i pirit na luŋu a Getesemane, a nye kulyani ko se adi, Mönuŋdye ta ni leru, ama nan lu tu yu i kwakwaddu. ³⁷ A nye joŋgi Petero se ko ŋwajik ti Jebedayo murek, a nye suluje delya ko dudurwe. ³⁸ a nye kulyani ko se adi, Töili liŋ ’be ’beleŋo ko delya, gwe nyona ko tatuja na nan. Mönuŋdye ta ni, ko ti konyen kasu gwe ŋa ko nan i pirit na geleŋ. ³⁹ A nye iti ŋerot madaŋ, a nye gubakiŋdye mugun kak rupu, a kwakwaddi adi, A, pon Baba, ko bubulö ti ŋilo kopo lo ŋoŋga wusajine kaŋo köyö; ama ti gwe ti gwon gwoso ’deket nio, ama ti gwe gwoso na ’deggi do na. ⁴⁰ a nye yitwene ko ŋutu kanyit kajujumuk kulo ni, a ryeji se i doto, a nye pije Petero adi, Ada lolor nagon ta ti bulo möŋdu ko konyen ŋa ko nan i pirit na geleŋ ko saa geleŋ ka ’de? ⁴¹ Gwe ta ko konyen ŋa, ko kwakwaddi ta kwakwaddu, anyen möriesi böŋö gwon ti pokin kasu ki; töilyet ti ŋutu ’diri ’de ’dikan kwakwaddu ama mugunya a namunyak. ⁴² Köti a nye yitöni i kwakwaddu daŋ tomurek, adi. A pon Baba, ko ŋina ŋoŋga böŋö ti wusaji kaŋo ake ko nan a ŋoŋga, a ti gwe gwoso na ’deggi do na. ⁴³ nye koti yitwene yitwe, a ryeji lepeŋat i doto, kogwon konyen kase lulur. ⁴⁴ a nye köti kö ’yi lepeŋat, a iti i kwakwaddu daŋ tomusala, a nye jambi kulyaesi lo geleŋ kilo. ⁴⁵ a kirut nye yitwene ko ŋutu kanyit kajujumuk ni, a pije se adi, Ta nyuŋ dodoto ko yuyukan? Mete ta, diŋit gwe nyona ko ’dur, nagon nan Ŋuro lo ŋuto papaki ko ŋutu katoronyak i könisi. ⁴⁶ ŋine ta ki, ti yi iti ta; meddi ta, ŋuto lo tiŋdu nan i tatua lo gwe nyona ko ’dur. ⁴⁷ A nagon Yesu nyuŋ kukulya nu, a Yuda lo ’dure logon a lele lo ŋutu kanyit kajujumuk puök wot murek kulo. A lodir lo ŋutu jore parik lo gwon ko baŋdujin se ko turya lobot kulo moruŋdye ko lepeŋ i pirit na geleŋ; kiŋanejin temejik se ko ŋutu temejik ti jur lo sunyuŋdyö lepeŋat. ⁴⁸ Nyena a ŋuto logon tiŋdu lepeŋ i tatua lo aje tiŋdu lepeŋat kweyet adi, ŋuto logon nan de roman ko lepeŋ ko ’bi ’biyet lo nye ŋilo ŋuto ŋilo; moke ta lepeŋ. ⁴⁹ a Yuda iti ko Yesu yu ’de ’de, a rome adi, Madaŋ koi Katodinönit! a ’biyuŋdye lepeŋ. ⁵⁰ a Yesu waddi lepeŋ adi, Ju liŋ, koŋdi ŋo nagon do a po ni i koŋdya na. A kirut kilo ŋutu poŋdi i morga na Yesu, a joŋgi lepeŋ. ⁵¹ A i ŋina, a lele lo ŋutu lo gwon ko Yesu i pirit na geleŋ kulo, morgi baŋdu lonyit a ’dutuŋdye kaŋo, a tukuŋdye kaŋo swöt lo ’dupiet lo kijane duma. ⁵² a kirut Yesu kulyani ko lepeŋ adi, Suki baŋdu ilot kanyit i pirit, kogwon ŋutu liŋ logon a ’dumundya baŋdujin kulo mo tatua ko baŋdujin. ⁵³ Do yeyeju adi nan ti bulö mo ’yu Baba, a ’de ’de nye de sunyukiŋdye nan teŋon ti malaikajin lwölwöŋ puök wot murek le? ⁵⁴ Ama ko sona, a kulya ti ŋun na wurö kune mo temakindye ada adi agu ködyö kokona? ⁵⁵ A i ŋinu diŋit a Yesu pije lodir lo ŋutu adi, Ta po ko baŋdujin ko turya lobot i morga na nan, gwoso nagon nan a karyakanit le? Perok liŋ nan si ’da i Kadi na Ŋun totodiŋdyö, a ta gwe a ko mok nan. ⁵⁶ Ama kine ŋo liŋ a kona anyen temakiŋdya i ŋo na wur nebijin köju kunu. A kirut ŋutu kanyit liŋ kajujumuk kulo kö ’yi lepeŋ, a se wöki wökön. ⁵⁷ Nyena a ŋutu lo morga Yesu kulo nyömöddi lepeŋ ko Kayapa medelogon a kijane duma, i pirit nagon katodinök ti Saresi ti Mose se ko temejik aje momorakiŋdya kata nu. ⁵⁸ Ama a Petero kepoddi lepeŋ wörö pajo, tojo ko kijane duma i ’baŋ, a lupöni lukata. a nye si ’dani ko köliŋönök i pirit na geleŋ i meddya na ’dutet na kulya. ⁵⁹ a kiŋanejin temejik se ko momoret liŋ na ŋutu temejik möŋi galuŋdya ŋo na ŋöki ’e Yesu anyentatatua, ⁶⁰ ama a se tine ryö, ma ’di ködyö katökorok ’burönök jore a po. A i ’dutet, a kulye murek lo poŋdi, ⁶¹ a kulyani adi, Lo ŋuto a kulya adi, Nan bubulö dukakiŋdya Kadi na ŋun kak, a i perok musala a nan mo nyöggi ’duggö. ⁶² a kijane duma ŋine ki, a pije Yesu adi, Do ti waddu nene ŋo? ŋo a nyo nagon kulo ŋutu ŋökiŋdye do? ⁶³ Ama a Yesu yiŋani taliŋ. Köti a kijane duma kulyani ko lepeŋ adi, Nan tiŋdu do i milyeju i ’diŋdya na Ŋun lo gwon jörun lo adi, tuköki yi ko do a Masia ŋuro lo ŋun. ⁶⁴ A yesu waddi lepeŋ adi, Do aje tuk. Ama nan takiŋdya ta adi, Suluja i na diŋit tojo ko ŋerot, ta mo memet nan ŋuro lo ŋuto sisi ’da i könin lutaten lo Loriŋit, po i ’dikolo ti ki. ⁶⁵ A kirut kijane duma kekereŋdi boŋgwat kanyit kune, a kulyani adi, Lepeŋ aje lauŋdya Ŋun. Nyo yi ’dek kulye ŋutu logon tökoŋu kulya ti lepeŋ? Ta soŋinana aje yiŋ lepeŋ i lauŋdya na Ŋun. ⁶⁶ Ta ŋona yeyeju ada? A se waddi adi, Lepeŋ jujukin i tatua. ⁶⁷ Nyena a se yakakiŋdye kamulak ko lepeŋ i komor, a jojoköji lepeŋ, a kulye nanaŋaji lepeŋ, ⁶⁸ kulya adi, Do Masia, kiki yi koi! Ŋa lo gwuddyö do? ⁶⁹ Nyena a Petero si ’dani kaŋo i lukata na ’baŋ, a nene köliŋönit ’diet poŋdi ko lepeŋ. ni, a kulyani adi, Do köti gwon ko Yesu ŋuto lo Galilaya. ⁷⁰ Ama a Petero renyani renya kase i komor liŋ adi, Nan ti den ko do jambu nyo. ⁷¹ A nye iti i kötumit, a nene ŋuro meddi lepeŋ, a takiŋdye ŋutu lo gwo ’dan nyona kulo adi, ŋilo ŋuto gwon ko Yesu lo Najareta. ⁷² Köti a nye renyani renya, a milyeji milyeju adi, ’Diri ’diri nan a ko den ŋilo ŋuto. ⁷³ A i mukök na diŋit a na ’dit, a ŋutu lo gwo ’dan nyona kulo lo poŋdi, a kulyani ko Petero adi, ’Diri do köti a lele lose, kogwon jamesi kulök lo kwekiŋdya. ⁷⁴ A kirut nye suluje milyeju ko mugun adi, ’Diri ’diri ti Ŋun konakiŋdye nan nene po ko nan jambu ’burönö; nan ti den lo ŋuto. A ’de ’de a sukuri lo sirani. ⁷⁵ A Petero iŋge yeyeoro kulya na jam Yesu kune adi, A kokwe nagon sukuri a ko nyuŋ sira nu, do de rerenya nan daŋin musala adi do a ko den nan. A Petero lupöni kaŋo, a gwine gwien parik.