¹ A koane duma pije Setepano adi, Kine kulya ’diri gwon sona le? ² A nye waddi adi, Ta luŋasirik ko ta kobaba, yiŋge ta nan. Ŋun lo minyo köju a pukökin ko merenye likaŋ Abarayama na gwoŋdi nye Mesopotamia, i ŋerot nagon nye a ko nyuŋ tu i si ’da Aran nu. ³ A nye takiŋdye lepeŋ adi, Ŋiörö kaŋo i jur ilot ko i karu kulök tojo i jur logon nan mo kwekwekin do lu. ⁴ Nyena a nye kölökiŋdye jur lo ŋutu ti Kaledea a iti i si ’da Aran. A i mukök nagon monye aje twan nu, a Ŋun joŋdi Abarayama i lo jur logon ta soŋinana si ’da kata lo; ⁵ nyena a nye gwe a ko tikin lepeŋ lele swöt a lomore lonyit, ’bayin ma ’di a na ’dit nagon ŋuto tanyakiŋdye moköt nyin, ama nye a milyekin tiŋdu lepeŋ lo jur anyen gwon a lonyit se ko nyakwariat kanyit lo po kanyit i mukök kulo, ma ’di nagon nye ’bak ŋuro i nu diŋit. ⁶ Kune a kulya nagon Ŋun a takin lepeŋ adi, Nyakwariat kulök mo si ’da a Lwaka i jur logon a leŋe lose lu, a ŋutu ti ŋilo jur mo tokitaji lepeŋat a ’dupi, a konakiŋdye lepeŋat arabat kipajin miajin iŋwan. ⁷ A Ŋun köti kulyani adi, Nan mo ’du ’dupökin putet i jur logon se mo kita kata a ’dupi lu, a i mukök a se mo poŋdi kaŋo i ŋilu jur a mo kitakiŋdye nan i na pirit. ⁸ A kirut Ŋun tiŋdi Abarayama tomoret nagon kweyet nanyit a tawero na, a Abarayama yupundye Yisaka, a taweŋi nye i lor tobudök lonyit; a Yisaka yupundye Yakobo, a Yakobo yupundye merenyejin kaŋ puök wot murek kulo. ⁹ A merenyejin kaŋ yule yulön ko Yosepa, a se tugwöŋi lepeŋ anyen jopa Ejipeto a ’dupiet; ama a Ŋun gwe ko lepeŋ, ¹⁰ a lwöggi lepeŋ i sasanyesi kanyit liŋ, a tiŋdi Paro mor lo Ejipeto i nyaŋu na lepeŋ kogwon nye a lokoŋ. A Paro tiŋdi lepeŋ a mödir lo Ejipeto ko a duma lo mede nanyit ’bukuluŋ. ¹¹ A kirut dyap lo ’duki i jur lo Ejipeto ko lo Kanana ’bukuluŋ, a ŋutu iŋge dara parik, a merenyejin kaŋ tine ryo kinyo. ¹² A Yakobo ko yiŋge adi ’bolot kata Ejipeto, a lepeŋ soŋdi merenyejin kaŋ nyu. Ŋina a daŋ togeleŋ. ¹³ A i tu nase daŋ tomurek, a Yosepa kwekiŋdye mugun i dena ko luŋasirik, a Paro iŋge den kotumit nase Yosepa. ¹⁴ A Yosepa soŋdi se i luŋgu na Yakobo monye lose ko mede nase liŋ anyen po Ejipeto. Lepeŋat liŋ a ŋutu merya buryo wot mukanat. ¹⁵ A kirut Yakobo iti i jur lo Ejipeto; a lepeŋ se ko merenyejin kaŋ twatwaki nyu, ¹⁶ a öpuö kase iŋge nyököji Sekeme, a nukani i gulom nagon Abarayama koju a gwörun ko pödö ko ŋwajik ti Amor i konisi Sekeme yu nu. ¹⁷ A nagon diŋit nagon Ŋun a milyekin Abatayama gwe nyona nu, a ŋutu kaŋ iŋge ŋoi jore Ejipeto yu, ¹⁸ tojo ko lele mor a pukun i tumatyan ko Ejipeto ŋilo mor a ko den Yosepa. ¹⁹ A lepeŋ iŋge mumulugga ŋutu kaŋ a iŋge konakin merenyejin kaŋ arabat, a ri ’dikiŋdye se i gubaddu na luŋudiet kase mu ’diŋ anyen twatwa. ²⁰ A i ŋinu diŋit a Mose iŋge yuŋwe a ŋuro logon kwekwelen ko nyanyara ko ŋun. Lepeŋ a wowoa ko monye midi yapala musala, ²¹ a na gubajine nye mu ’diŋ nu, a ŋuro na Paro ’dumuŋdye lepeŋ, a wowoji lepeŋ gwoso ŋuro lonyit. ²² A Mose iŋge todiniki koŋon liŋ na ŋutu ti Ejipeto, a nye gwe ko riŋit i kulyaesi kanyit ko i Sura kanyit. ²³ A nagon Mose gwe ko kiŋajin gwoso merya iŋwan nu, a lepeŋ yeyeji ’yö ’yu luŋasirik kanyit logon a ŋutu ti Yisaraele kulo. ²⁴ a lepeŋ iŋge meddya lele lose i konaki arabat, a nye iti i juŋdyo na lepeŋ, a tatuje ŋilo Ejipetotyo ropakiŋdya ŋuto lo sasanya lo. ²⁵ Lepeŋ yeyeju adi luŋasirik ŋona a kurun adi Ŋun gwon i lwöggu na se kogwon könin lonyit, ama a se gwe a ko kurun. ²⁶ Ko ’bure nanyit a nye ’bunyö kiŋdye ŋutu murek ti Yisaraele momorö, a nye yöŋöni tomor a lepeŋat, a nye suŋge adi, Yakulo, ta a luŋasirik, ko nyo nagon ta konakiŋdya ’börik arabat sona? ²⁷ a kölumbö lele lo konakiŋdya marate lonyit arabat lo, dukaddi lepeŋ kaŋo a pije lepeŋ adi, ŋa lo tiŋdu do a kasaranit ko a ka ’duponit lo kulya kaŋ? ²⁸ Do yöŋö tatuja nan gwoso na tatuje do Ejipetotyo kaje nu le? ²⁹ A na yiŋge Mose kulo kulyaesi nu, a nye wöki i jur lo Midiyan a si ’dani nyu, a lepeŋ iŋge yupuŋdyö ŋwajik murek nyu. ³⁰ A ko kipajin merya iŋwan aje lwöŋgu, a malaikatat puköki ko lepeŋ i yöbu na mere Sinai, i rudu lo tutule. ³¹ A na meddi Mose nu, a lepeŋ iŋge soŋu, a mijörö nyona i meddya, a nye yiŋge gworo lo Matat kulya adi, ³² Nan a Ŋun lo merenyejin kulök, nan a Ŋun lo Abarayama, ko a Ŋun lo Yisaka, ko a Ŋun lo Yakobo. A Mose boŋdi böŋdu, a kujönöni kujönö meddya. ³³ a Matat takiŋdye lepeŋ adi, Rusu kamuka kulök kaŋo, kogwon pirit na gwo ’di ’e do ŋina a kak nake na rurwan. ³⁴ Nan ’diri aje met sasanya na ŋutu kwe Ejipeto yu, a nan iŋge yiŋ ’du ’duesi kase, a nan aje po kak ni i lwöggu na se, nyena po, a nan de soŋdi do Ejipeto yu. ³⁵ Ŋilo Mose a nye logon ŋutu ti Yisaraele aje renyari lo adi, Ŋa lo tiŋdu do a kasaranit ko a ka ’duŋönit lo kulya kaŋ? Ŋun a yökijö lepeŋ a kasaranit ko a kalwokönit, ko paret na malaikatat logon a pukökin kanyit i rudu lo tutule lo. ³⁶ a ŋilo Mose nyömoddi ŋutu kaŋ kaŋo i Ejipeto, a koŋdi sörösi ko kweyesi i Ejipeto ko i Tör Nator se ko i yobu ko kipajin merya iŋwan. ³⁷ Ŋilo a Mose logon a takiŋdya ŋutu ti Yisaraele adi, Ŋun mo totopukökin ta lele nebi gwoso na topuköki ’e nan i kiden na kötumit nasu nu. ³⁸ Lepeŋ a nye lo gwon i pirit na geleŋ ko ŋutu lo momora i yöbu, ko malaikatat lo jambu ko nye i mere Sinai lo, mora ko merenyejin kaŋ; a lepeŋ iŋge wuju kulyaesi lo yeyeŋon ti Ŋun, anyen nyönyökökin yi. ³⁹ Ama a merenyejin kaŋ koju tine ’bon twoju lepeŋ, a iŋge dukara lepeŋ a swot, a lepeŋat yeyeji kase i toilyet adi bia se kodyo gwon Ejipeto yu, ⁴⁰ a se takiŋdye Arona adi, Tetenaki yi ŋunyen logon nyombu yi. Kogwon Ŋilo Mose lo Joŋdya yi kaŋo i jur lo Ejipeto lo yi ti den ko nyo nagon a pokin ko lepeŋ. ⁴¹ A lepeŋat teteŋdi nene ŋo gwoso tagwok i kilu perok, a wukiŋdye ŋina nyomue rubaŋga, a se lyöŋi lyöŋön ko Ŋo na teten se na. ⁴² Ama a Ŋun lopukuŋdye kaŋo kase, a tiŋdi se i kitakiŋdya na kaset ti ki, gwoso na wurorikin i buk na nebijin nu adi, Ta kotumit na Yisaraele, ta ŋona a ’duŋökiŋdyö nan toro ’bo a wukiŋdye a rubaŋgajin i yöbu yu kiŋajin merya iŋwan le? ⁴³ A ta koju yeyeggi kemia na Molok, se ko kaserokoti logon a ŋun Repan, lepeŋat a nyomuejin logon ta a tetenanyen kwakwaddu se.Nyena nan mo jojoŋ ta pajo i lu swot lo Babela. ⁴⁴ Merenyejin kaŋ koju gwon ko kemia i yobu yu nagon tokororikin adi Ŋun gwon ko se. Ŋina kemia koju a tetena gwoso nagon Ŋun a sarakiŋdya Mose i teteŋdya, gwoso i miret nagon nye a met nu. ⁴⁵ a merenyejin kaŋ logon a nyakwariat kase logon koju gwon ko Yosua i pirit na geleŋ kulo yeyekaddi ŋina kemia, i diŋit na morgi se jur logon Ŋun a riköro gweyajin ti ŋutu kaŋo kase i komor lu. A ŋina kemia iŋge si ’da nyu tojo ko perok ti Dawidi. ⁴⁶ A Dawidi iŋge ryeju ’busan ko Ŋun i komor, a pije lepeŋ anyen nye tetenakiŋdya nye ŋun lo Yakobo pirit si ’daet. ⁴⁷ Kolumbo a Solomona lo ’dukokiŋdye lepeŋ kadi. ⁴⁸ Ama Katoŋanit lo ki liŋ ti si ’da i kadijik nagon ŋutu lo ’duggo kune, gwoso na kulyari nebi nu adi, Matat lo kulya sona adi, ⁴⁹ ’Diko a si ’daet nio, a kak gwe a tokit nio na mokosi, a kadi gwe a nyo nagon ta ’dukökin nan? iŋkoi, pirit a nyo nagon nan yukan kata? ⁵⁰ Konisi kwe ŋona ’bayin lo gweja kine ŋo liŋ le? ⁵¹ Nyena ta ŋutu logon ko muruto a nawo ’duŋak, logon toilyet se ko swo kasu gwon gwoso ti ŋutu logon ti yubbö ŋun, ta ŋupi renya Mulökötyo Loke. Ta kelaji ko merenyejin kasu. ⁵² Lele lo nebijin ŋona kata logon merenyejin kasu koju a ko sasan le? Lepeŋat a tatuja ŋutu logon tuggo adi ŋilo Lorigwo mo popo, logon ta soŋinana aje tiŋdu lepeŋ ko merok i konisi, a tatuje lepeŋ. ⁵³ Ta a utu logon a wiriju Saresi ti Ŋun ko malaikajin i konisi, a ta kolumbo tine ’debba se. ⁵⁴ A na yiŋge se kine kulya nu, a toilyet kase iŋge mien parik, a se pije kala kogwon lepeŋ. ⁵⁵ Ama a Setepano iŋge jore ko Mulokotyo Loke, a diŋe ki go, a meddi minyo lo Ŋun se ko Yesu gwogwo ’dan i konin lutaten lo Ŋun. ⁵⁶ A lepeŋ kulyani adi, Mete ta, nan a meddya ki a ŋai, a Ŋuro lo ŋuto gwo ’de i konin lutaten lo Ŋun. ⁵⁷ A se kolumbo worie wogon ko gworolo lobot, a ’dije swo kase, a se liŋ woki kanyit yu, ⁵⁸ a lepeŋat gubaddi nye kaŋo köji kata, a gugubuje nye ko ŋurupo. A ŋutu lo tökoŋu kulya ti lepeŋ kulo peddi boŋgwat kase ko lele titinti i komor karin kanyit a Saula anyen memet. ⁵⁹ a nagon se gwon i gugubuja na Setepano nu, a nye kwakwaddi adi, Matat Yesu, wuji kodudwo nio. ⁶⁰ A nye ’dorone kak ko kuŋwat, a kulyajine ki ko gworo lobot adi, Matat, ko tikin lepeŋat ŋina toron. A na kulyari nye sona nu, a nye twane twan.