¹ Ta luŋasirik ko kobaba, yiŋge ta waset logon nan wawaddi kasu i komor lo. ² A na yiŋge se lepeŋ i jambu ko se ko kutuk nase na Sura nu, a se yiŋani taliŋ adi lii bia parik. A lepeŋ kulyani adi, Nan a Yudayakityo yuŋwe Taruseu na Kilikia. Nan a ’duŋö i ŋina köji i könin lo Gamaliele. ³ Lepeŋ lo todinikiŋdyö nan saresi ti merenyejin kaŋ go, a nan gwe ko pusök i kitakiŋdya na Ŋun gwoso na gwoŋdi ta liŋ i lo lor na. ⁴ Nan köju a sasaŋdu ŋutu logon kebbu lo Kiko kulo ma ’di i tatuja na se, a nan toŋi ŋutu lyan ko wate, a gubakiŋdye se i kadi rereket. ⁵ Koane duma se ko momoret na temejik liŋ deden adi kulya kwe a gwak, kogwon lepeŋat a tiŋdu nan waragalan nagon wuröki luŋasirik kaŋ Yudayaki lo gwon Damaseke yu kulu, nyena a nan köju jölöni nyu köti i momorga na kulu ŋutu anyen nyökun se bot Yerusalema a rereka anyen ko ririŋa. ⁶ A gwe sona na jölöri nan nu, a nan ’dure nyona ko Damaseke, a nagon gwe nyona ko tuparan kiden nu, ’de ’de a parara na po ki pararakiŋdye köyö i swötön liŋ. ⁷ a nan ’dorone kak, a yiŋge gworo pija nan adi, Saula, Saula, ko nyo nagon do sasaŋdu nan sona? ⁸ A nan waddi pija adi, Do a pa pon Matat? A gworo lo waddi nan adi, Nan a Yesu lo Najareta logon do sasan lo. ⁹ A ŋutu lo gwon ko nan kulo iŋge met parara ama a gwe a ko yiŋ gworo lo ŋuto lo jambu ko nan lo. ¹⁰ A nan pije adi, A nan de koŋdi nyo pon Matat? A Matat waddi nan adi, Ŋine ki, ko luŋöni Damaseke, a do mo takine nyu ŋo liŋ nagon a wulöki do i koŋdya kune. ¹¹ A nagon nan tine bulö meddya kogwon ŋinu parara kokobbu parik nu, a ŋutu lo gwon ko nan kulo jiŋge nan ko könin, a joŋgi nan Damaseke yu. ¹² A lele ŋuto gwe kata nyu, karin kanyit a Anania. Lepeŋ a katwöyönit lo Ŋun, a ’debbi Saresi ti Mose, a Yudayaki liŋ lo gwon nyu kulu jambi kulya kanyit adi nye a lo ’but. ¹³ A nye poŋdi köyö ni, a gwo ’de köyö nyona, a kulyani adi, Saula luŋaser, meddi meddya köti. A i ŋinu saa gwak a nan köti meddi meddya a diŋe lepeŋ. ¹⁴ A nye kulyani adi, Ŋun lo merenyejin kaŋ a wuluŋdyö do anyen deden ’dekesi kanyit, ko anyen meddya Ŋuto lonyit Lorigwo se ko i yiŋga na lepeŋ i jambu ko gworo lonyit; ¹⁵ kogwon do mo tukökiŋdyö ŋutu liŋ ŋo na met do ko na yiŋ do kune, ¹⁶ Nyena do möŋdu nyo? Ŋine ki, ko batisani batisa, lalane toronjin kunök, ’di ’diŋdya karin ti Matat. ¹⁷ A gwe sona, a nan yitöni Yerusalema, a nagon nan gwon i kwakwaddu i Kadi na Ŋun nu, a nan gwe gwoso lo rurudwe. ¹⁸ A nan meddi Matat i jambu ko nan adi, Nyoŋgi nyoŋga i kö ’yu na Yerusalema ’de ’de, kogwon ŋutu mo ti wu kulya na jam do kune i kulya kwe. ¹⁹ A nan waddi adi, Pon Matat, lepeŋat ko ’börik deden ’bura adi nan köju a tu i kadijik momoresi liŋ i totoroja ko i ’bi ’bitijö na ŋutu logon a yubbö do kilo. ²⁰ A i diŋit na tatuarikin Setepano katwöyönit lo kulya kunök nu, a nan ko mugun nio köti gwe nyu gwo ’dan nyona, a ruggö tatua nanyit, a nan tiji boŋgwat ti ŋutu lo tatuja lepeŋ kulo. ²¹ A Matat takiŋdye nan adi, Iti tu, kogwon nan soŋdu do pajo i ŋutu ti jurön. ²² A ŋutu yiŋaddi Paulo i jambu tojo ko a ’diŋdya tu nanyit i ŋutu ti jurön; a kirut lepeŋat woŋoro ki ko gworolo lobot adi, Tatune ŋuto gwoso lo kaŋo i na kak, kogwon nye ti jukin i gwolor jörun! ²³ a lepeŋat woŋe woŋon, nanaju boŋgwat kase ko raddu ŋutut ki. ²⁴ A liwa saŋi ŋutu kanyit i joŋga na Paulo i pirit nagon kamörök si ’da kata nu, adi ti lepeŋ ’bitöni ’bitö anyen tuggö kulya nagon kilo ŋutu woŋgi ko nye kune. ²⁵ a nagon se aje toŋa lepeŋ anyen ’bi ’bitö nu, a Paulo pije duma lo kamörök mia geleŋ lo gwo ’dan nyona lo adi, Saret ŋona kata i ’biddyö na Romatyo logon a ko ’duŋöki putet le? ²⁶ a ŋilo duma ko yiŋge kine kulya, a lepeŋ iti ko liwa yu, a pije lepeŋ adi, Do yöŋö koŋdya nyo? Ŋilo ŋuto a Romatyo, ²⁷ a kirut liwa iti ko Paulo yu, a pije lepeŋ adi, Taki nan, do a Romatyo le? A Paulo waddi adi, lye. ²⁸ a liwa kulyani adi, Nan a gwörun ŋina luŋu nio a Romatyo ko gurut jore parik. Ama a Paulo waddi adi, Ama nan a yuŋwe sona. ²⁹ Nyena a ŋutu logon gwe nyona ko ’biddyö Paulo kulo kukutörö bot ’de ’de; a ŋilo liwa köti iŋge kujönö na deŋdi nye adi Paulo a Romatyo ko köti adi nye a reregga lepeŋ nu. ³⁰ A ko ’bure a liwa laggi lepeŋ, a saŋi koanejin temejik se ko momoret na temejik liŋ anyen momora, kogwon nye ’dek denuŋdya kaŋo ko toron a nyo nagon Yudayaki a ryö ko lepeŋ. A nye joŋdi Paulo a tiŋdi lepeŋ i gwo ’dan kase i komor.