¹ A kulye ŋutu lo poŋdi Yudaya yu tojo Antlokia, a suluje todindyö luŋasirik lo yubbo kulo adi, Ko ta a ko tawero gwoso i keri lo Mose ta ti bulö lwökö kwöŋ. ² A ko Paulo ko Barnaba rerenyani ko se parik a iŋge pipi se ko kine kulya, nyena a Paulo ko Barnaba se ko kulye ŋutu ti Antlokia iŋge wulwe anyen tu tojo Yerusalema i meddya na luyökie se ko ŋutu temejik kogwon kine kulya. ³ A ŋutu ti kanisa nyömökindye lepeŋat i kiko, a se lwöpöddi Poinike ko Samaria, tutuköddu adi ŋutu ti kulye jurön aje löpuggö töilyet, a kine kulya tiŋdi luŋasirik lo yubbö kulu liŋ i lyöpön parik. ⁴ A na ’durökiŋdye se Yerusalema nu, a kanisa ko luyökie se ko ŋutu temejik wuji lepeŋat. A Paulo ko Barnaba nyönyökökiŋdye lepeŋat po liŋ nagon Ŋun a tikin se i koŋdya kune. ⁵ Ama a kulye ti lapet na Parusijin logon a kayupök pine ki a kulyani adi, Lepeŋat agu ködyö tatawero ko ti sarakine saraki anyen ’debba Saresi ti Mose. ⁶ A luyökie se ko temejik momori i pirit na geleŋ anyen yeyeju kine kulya. ⁷ A i mukök nagon se aje totopi ko diŋit a najo nu, a Petero ŋine ki a kulyani adi, Luŋasirik, ta deden adi Ŋun köju a wuluŋdyö nan kasu kiden anyen ŋutu ti jurön ködyö yiŋuŋdya kulyaesi ti Loŋe Lo ’but köyö i kutuk, anyen yuyubbö. ⁸ A Ŋun logon deden töilyet ti ŋutu lo iŋge kwekin lepeŋat adi nye a ruk se, kogwon nye a tiŋdu se Mulökötyo Loke, gwoso na tiŋdi nye yi köju nu. ⁹ Lepeŋ a ko tuka ’de ’yu yi ko lepeŋat, kogwon lepeŋ a toke ’ya töilyet kase kogwon se a yubbö. ¹⁰ Nyenagon ko nyo nagon ta möŋu Ŋun i sopakiŋdya na po na pöiyiöni ko kilo ŋutu kajujumuk i kidyö, nagon merenyejin kaŋ kode yi ti jukin ’doggu kune? ¹¹ Kölumbö yi yubbö adi yi lwölwökö kogwon ’busan na nyaŋu na Matat Yesu gwoso na lwököri se köti na. ¹² A momoret liŋ yiŋani taliŋ; a lepeŋat yiŋge ko Barnaba se ko Paulo i nyönyöggu na kweyesi ko sörösi nagon Ŋun a tikin se i koŋdya i kidenna ŋutu ti jurön kune. ¹³ A nagon se aje tutuŋgö jambu nu, a Yakobo kulyani adi, Luŋasirik, yiŋge ta nan. ¹⁴ Simeona aje nyönyöggu adi Ŋun a kokwe a ’yö ’yu ŋutu ti jurön a wuluŋdye kötumit na ŋutu kase kiden a na karin kanyit. ¹⁵ A kulyaesi ti nebijin gwe jojo ko kine kulya, gwoso na wurörikin nu adi, ¹⁶ A i mukök, a nan Matat mo yitwene yitwe, nan mo nyöggi ’duggö tumatyan na Dawidi nagon gwoso morogo nagon a ’doro kak na; a nan mo nyöggi ’duggö murwöki kanyit, a mo ’bilikiŋdye nye ki, ¹⁷ anyen pitönö ti ŋutu böŋö ga ’yu nan Matat, iŋkoi ŋutu ti jurön liŋ logon luŋu ko karin kwe kulo. ¹⁸ Kilo a kulyaesi kwe ti Matat logon a tiŋdu kine kulya i dena köju ’beron nu. ¹⁹ Nyenagon a Yakobo puputuru ŋerot i jambu adi, ’Duŋet nio na kine kulya ködyö gwon sona adi, ti yi gwe ti yöyöŋgu ŋutu ti kulye jurön logon aje löpukuŋdyö ko Ŋun ni kilo, ²⁰ ama ti yi kölumbö wurökiŋdye ta lepeŋat waraga, anyen se paju kinyojin logon wuki punyen logon a nyömuejin, kogwon a toluta; köti ti se teŋgi ’börik i towutön, ko i nyesu na ŋo nagon totolo, se ko i nyesu na rima. ²¹ Kogwon suluja köju nu, Mose gwon ko ŋutu logon tokujö Saresi kanyit, i keŋdya na se i kadijik momoresi temba i Sabata i köjinö liŋ. ²² Nyenaa gwe a na ’but ko luyökie, ko temejik se ko ŋutu liŋ lo momora a kanisa kulo i wuluŋdyö na ŋutu kase kiden, anyen soŋdu se Antlokia i pirit na geleŋ kase ko Paulo ko Barnaba. Ŋutu lo wulwe kulo a ko Yuda lo luŋu a Barsaba se ko Sila logon a ŋutu temejik ko luŋasirik lo yubbö kulo kiden. ²³ Waraga na son se na a wurö sona adi, Yi luyökie se ko temejik luŋösurök kasu roman ko ta luŋasirik kaŋ lo yubbö logon a ŋutu ti kulye jurön lo si ’da Antlokia, ko Suria se ko Kilikia kilo. ²⁴ yi a yiŋ adi kulye Ŋutu kaŋ a yöyoŋgu ta ko kulyaesi, a sopuggo yeyeesi kasu, ma ’di nagon yi a ko sarakin lepeŋat. ²⁵ a gwe a na ’but kayaŋ, nagon yeyeesi kaŋ a mora aŋo geleŋ, i wuluŋdyö na ŋutu anyen sonyo kasu ŋini. Lepeŋat moraddu ko Barnaba se ko Paulo ŋutu kaŋ lo nyanyara. ²⁶ Lepeŋat a pakiŋdya ’böriki karin ti Matat likaŋ Yesu Kristo. ²⁷ Ko ŋina kwe yi a sunyukin ta Yuda se ko Sila logon mo nyönyökökin ta kine kulya liŋ ko kutusen kase. ²⁸ a gwe a na ’but ko Mulökötyo Loke se koyi köti adi ti yi gwe ti sopakiŋdya ta ko ŋo na pömöni, ake kine ŋo nagon ködyö ’de ’dekarikin kine; ²⁹ adi ta ködyö paju kinyojin logon wuki ŋunyen logon a nyömuejin, a paji nyesu na rima, ko nyesu na ŋo nagon totolo, köti ta ködyö teŋgu ’börik i towutön. Ko ta a teŋgu ’börik i kine ŋo, a ta mo koŋdi ’bura. Ti Ŋun gwe ko ta. ³⁰ A na sonyoji ’e se nu a se iti Antlokia, a momori kayupök liŋ i pirit na geleŋ, a se tiŋdi lepeŋat ŋina waraga. ³¹ A nagon se aje keŋdya ŋina waraga nu, a se iŋge jore ko lyöŋön kogwon kine kulya aje togo ’yu se. ³² A ko Yuda se ko Sila logon köti a nebijin, iŋge jujuja luoasirik lo yubbö kulo ko kulyaesi jore, a togo ’yi se. ³³ A i mukök nagon se aje gwon nyu ko nene diŋit nu, a luoasirik lo yubbö kulo sonyoddi lepeŋat bot ko töilyet lo ’but i ŋutu lo soŋdu se köju kulo. ³⁴ Ama gwon a na ’but ko Sila i mönuŋdyö nyu. ³⁵ Ama a Paulo se ko Barnaba mönuŋdye Antlokia yu, a se todiŋdye ko a tokuje kulyaet lo Matat, mora ko kulye ŋutu jore. ³⁶ A i mukök na kulye perok, a Paulo takiŋdye Barnaba adi, Ti yi yitöni i ’yö ’yu na luŋasirik lo yubbö kulo i köjinö liŋ nagon yi köju a tokujö kulyaet lo Matat kata kunu, anyen deden ko lepeŋat gwon ada. ³⁷ A Barnaba ’deke baraddu Yoane logon köti luou a Marako ko lepeŋ se ko Paulo i pirit na geleŋ. ³⁸ Ama a Paulo yeyeji adi ’bayin a na ’but i joŋga na lepeŋ, kogwon lepeŋ a kölökin se Pampulia yu, a tine yeŋon ko se i na kita. ³⁹ A lepeŋat iŋge rerenya parik, a reki rekin. A Barnaba joŋgi Marako, a kije i ki ’bo a iti Kuprio; ⁴⁰ ama a Paulo wuluŋdye Sila, a luŋasirik lo yubbö kulo mo ’yi Matat ko ’busan nanyit i tiju na se, a kirut a se iti tu. ⁴¹ A Paulo tiri Suria se ko Kilikia, totŋgoloddu momoresi ti ŋutu lo momora a kanisa.