¹ Nan temejiktyo roman ko do ŋuto duma nagon ŋun a wulun na, se ko ŋwajik kulok logon nan nyanyar i kulya ti to’diri kilo a gwon a nan ka’de ama koti se liŋ logon deden kulya ti to’diri kilo nyanyar ta. ² Yi nyanyar ta kogwon kulya ti to’diri nagon gwoŋ gwoŋ kayaŋ i mugunya na, a molu gwe ko yi ŋupi. ³ Na gwondi yi i kulya ti to’diri ko i nyarju kata na, a yi gwe ko ‘busan, ko yutet se ko taliŋ na po ko ŋun monye na po ko yesu kristo ŋiro lo ŋun monye. ⁴ Nan a lyoŋon parik i pujo na kule ŋwajik kulok logon gwon i kulya ti to’diri, gwoso nagon ŋun monye a sarakindi yin a. ⁵ Nyena, tiyanana nan mo’yu do pon ŋote nikaŋ, ‘ban gwoso nan wurokindo do saret loluduk, ama a saret logon yi kere pu i suluet lo, adi yi kodo tutunyar ko ‘borik. ⁶ Nyarju gwon tina adi, yi kodo gwon i saresi kayit. Yilo a saret logon ta kere yiŋ i suluet lo adi, gwe ta ko nyarju. ⁷ Kamomolukak jore kere rekin i na kak. Kilo ŋuto a ruggo adi yesu a mesia logon a po i na kak a ŋuto. Ŋuto lo kulya tina a kamomolukanit ko a lu miriku lo kristo. ⁸ Kunyar ta ko’borik anyen ta boŋo gwon a tolikindo ŋo liŋ nagon yi a kitani kine, anyen ta boŋo wuju ropet a duma. ⁹ Ŋuto logon a jeletaji ŋerot a gwe ‘bak ‘depakinda i todinesi ti kristo lo, lepeŋ ‘bakan na ŋun. Ama nye logon ‘depakinda go i todinesi ti kristo lo, lepeŋ kata ko ŋun monye se ko ŋiro loyit. ¹⁰ Ko lele ŋuto a tu kasu yini a gwe ‘bak ko jokinda ta kine todinesi, ko’ben ta ‘dok roroman ko lepeŋ. ¹¹ Kogwon ŋuto lo roma ko lepeŋ lo ŋarunda konesi kayit narok. ¹² Nan kata ko kulya jore nagon nan mindi wurokindo ta, ama nan ‘buon wurjo i waraga ko iŋka. Ama nan yendu tu i ‘yo’yu na ta anyen jambu ko ta lokomoŋ, anyen lyoŋon niyaŋ boŋo tetemakinda. ¹³ Ŋwajik ti sosur nagon ŋun a wulum na a roman ko do.