¹ Yom tani Naomi kelim le Raus,"Biniya ta, sai ana ma bi fetishu le ita rajil ashan bi kutu bala le ita, ashan kulu haja bi ruwa kuwas ma ita? ² Buaz, zol al ita ishtakal ma banat ta shokol tou sawa, huwo ma yao gerib tanna? Asoma kuwas, alela huwo bi ferigo shaer tou min wasaka tou fi makan al bi nedifo fugu. ³ Ashan keda, beredo, kutu riha, wa libiso ahse gumash, wa ruwa fi mahal ta nedifo sanabil. Lakin mata zahir nefsa taki le huwo lahadi ma huwo akulu wa ashrab. ⁴ Kan huwo bi num, aino makan ta num tou ashan ita bi ruwa le huwo, shilo gumash min kura tou, wa num hinak. Yala huwo bi wori kede ita amulo shuno." ⁵ Raus kelim le Naomi, "Ana bi amulo kulu haja al ita kelim de." ⁶ Fa heya kan ruwa le mahal ta dugu sanabi, wa heya ka amulo ze ma hamati tou kelim le huwo. ⁷ Zaman Buaz akulu wa ashrab wa mazaj tou biga tamam, huwo ruwa num fi taraf kum ta gesh ta shaer. Raus gum ruwa berah, wa arofa gumash min kura tou, wa num tehet. ⁸ Fi nus bilel tou, huwo kala min num. Huwo aino jambo tou, fi mara bi num jambo kura tou! ⁹ Huwo asalo," ita muno?" Heya juwabo, "Ana Raus, khadima taki. Mido taraf ta gumash taki fugu ana, ashan ita yao gerib ta tai." ¹⁰ Buaz gali," Biniya tai, kede Yahwa bariko ita. Haja kuwas al ita amulo hasa huwo ahsen min al fat, ashan ita ma ruwa wara rujal, kan meskin wala ganiyan. ¹¹ Hasa biniya tai, mata kafo! ana bi amulo kulu haja al ita wonuso, leano nas ta medina kulu arufu ino ita mara kwes. ¹² Huwo hagiga ino ana gerib takum, lakin fi tani huwo yao gerib shedid min ana. ¹³ Geni belel de, wa fi sabah, kan huwo rudu gum be wajib ta gerib , tamam. Lakin kan huwo ma rudu gum be wajib tou tijah taki, biga ana bi amolo, de hagiga ze ma Yahuwa hagiga. Num lahadi sabah." ¹⁴ Fa heya num jambo kura tou lahaedi sabah. Lakin heya kan gum bedri fi zaman al mafi zol bi akeder arufu zol al tani. Ashan Buaz kelimo," Kede ma arufu gali fi mara ja wa num fi makan de." ¹⁵ Baad dak Buaz kelim, " Jibo tarha taki de wa amsuko." Zaman heya amulo, huwo kubo fugu seta akyal ta shaer (seta wa talateen litir) wa arufa fi dahar ta heya. Baad dak huwo ruwa le medina. ¹⁶ Zama Raus rija le nesib tou, heya kan asalo, "Fi suno hasil, ya biti?" Raus gum haki kulu haja al raji de amulo le heya. ¹⁷ Heya kelim, "Huwo wodi le ana seta akyal ta shaer, leani huwo gali, 'Mata ruwa iden fadi le nesiba taki." ¹⁸ Naomi gum kelim le, "Geni hini, ya biti, hahadi ma ita bi aino netija ta kalm de, shan rajil de ma bi irtah lahadi huwo bi kalaso kalam de alela."