¹ Ana bi wodi wosiya le intum be kalam ta ukut ta nina Fibi, al kadam fi kenisa ta Kankhariya. ² Ashan intum bi gabilu huwo fi Rabuna, ze ta kedisin. Wa saudu takum huwo be ai musada al kan huwo deir, lianu huwo saudu nas kutar, wa kaman huwo saudu ana. ³ Selim takum le Priskila wa Aquila al nina al nina ishtakal ma umon sawa fi Yesua al Mesih. ⁴ Al umon kutu haya tomon fi khatar ashan haya tai. ana wodi shukuran le umon, wa ma bes ana barau, lakin kaman kulu kanais ta nas umam. ⁵ Selimu le kenisa al fi bet tomon, selimu le Epaenetus sabi tai al huwo yau awel samar ta Asia te Mesih. ⁶ Selimu takum Mariyam, al kaman huwo ishtakal shedid ashan intum. ⁷ Selimu takum le Andronikus wa Yuniyas nesib tai, kan sijinu huwo ma ana. Rusul kulu bi aruf umon tamam, umon gidam min ana fi Mesih. ⁸ Selimu Ampialitus sabi tai fi Rabuna. ⁹ Selimu le Urbanus al bi ishtakalsawa ma nina fi al Mesih, wa Istakiyos sabi tai. ¹⁰ Selimu Apelles al sedeku huwo fi al Meshi. Selimu takum le nas kulu al fi bet Aristobulus. ¹¹ Selimu Herodion nesib tai, selimu nas bet ta Narkisus, al umon fi Rabuna. ¹² Selimu Tryphina wa Tryphosa, al umon ishtakal shedid fi Rabuna, selimu Bersis al huwo sabi tai al huwo ishtakal shedid fi Rabuna. ¹³ Selimu Rufas al Rabuna ikhtar, wa uma tou al kaman uma tai. ¹⁴ Selimu Asinkritus, Filigun, Harmas, Patrobas, Harmis, wa akwana al ma umon. ¹⁵ Selimu Filologus wa Julia, wa Nereus ma ukut tou, wa Olimpas wa kulu al mominin al fi ma umon. ¹⁶ Selimu takum baad takum ma baad be gubla al mukadas, kulu Kanais ta al Mesih bi selimu intakum. ¹⁷ Hasa biga ana bi asalu intum ya akwana, ashan bi fekir kalam ta nas al bi jibu tefriga wa bi gofulu sika, umon bi tala bara min taalim al intum alimu, tala takum bara min umon. ¹⁸ Leanu shikil nas del umon ma bi akhdim Rabuna ta nina al Mesih, lakin batna tomon. be batna tomon wa kalam al kwes, umon kabasu gulub ta nas al abriya. ¹⁹ Lakin shokol ihteram takum wa kabar takum wosulu le ai zol.ashan kida ana mokosut, min intakum, lakin ana deir intum bi kun negitin fi haja al kwes, wa intum bi kun nedif min hajat al ta kaiya. ²⁰ Wa be sura Allah ta salam bi kasuru shitan tehet kurein takum, Kede neima ta Rabuna ta nina Yesua al Mesih kun ma intum. ²¹ Timatayo al nina bi istakal sawa ma huwo bi selimu intum wa Lokiyos, Yason, wa Sosibatres nesib tai. ²² Ana Tertius yau katibu risala de ana bi selimu intakum kulufi Rabuna. ²³ Gaius, al fadalu ana wa kaman fadalu kenisa kulu, bi selimu le intum, Arastus amin maliya ta medina kaman bi selimu le intum, sawa ma aku ta nina ma Kuwatus. ²⁴ Kede neima ta Rabuna Yesua al Mesih geni ma intum kulu. Amin ²⁵ Wa hasa le huwo al agder ashan bi sabitu intum, hasab Injil tai, wa tebshir ta Yesua al Mesih asab sir al beinu wa al kan hafizu min bediri. ²⁶ Lakin beinu wa amulu biga maruf hasa le kulu nas hasab kitabat ta nobuwa, be awamir ta Allah al abadiya, ashan ihteram ta iman. ²⁷ Le Allah al hakim al waid, be wasat Yesua al Mesih, al mejid le huwo lel abad. Amin