¹ Bulus, kadam ta Yesua al Mesih, nadi huwo ashan bi kun rosul, Kutu huwo khas le injil ta Allah, ² al huwo waadu min bediri be wasat ta anbiya al fi kitab al mukadas, ³ an jena tou al huwo kan min usra ta Daud hasab jisim. ⁴ Be wasat Roho ta kadasa, kan alinu huwo be guwa ashan bi kun jena ta Allah be wasat giyama min amuwat, Yesua al Mesih Rabuna ta nina. ⁵ Al bi wasat tou nina ligo neima ta rosuliya ta ihteram ta iman fi nus ta nas, min ajli isim tou. ⁶ Fi nus ta umam, nadi intum kaman ashan bi kun le Yesua al Mesih. ⁷ Resala de le kulu nas al fi Roma, nas al Allah bi hibu, al nadi umon ashan bi kun nas tou al mukadisin, keli neima kun le intum, wa salam min Allah Abu ta nina wa Rabuna Yesua al Mesih. ⁸ Awelan, ana bi shukuru Allah bi wasat Yesua al Mesih min ajil intum kulu, ashan iman takum gi wonusu fi alam kulu. ⁹ Allah yau shuhud tai, al ana bi khadimu le huwo be Roho tai fi injil ta jena tou, al ana gi zekiru intum be istemrar. ¹⁰ Ana daiman gi talabu fi salawat bitai teriga ashan bi naja be irada ta Allah ashan bi ja le intum. ¹¹ Ana indu niya ashan bi aiynu intum, ashan ana bi agder wodi le intum baad min hadiya rohiya, ashan bi sheja intum. ¹² Au nina bi agder sheja fi beina intum, bi wasat iman ta nas tanin, takum wa tai. ¹³ Ana ma deir intum ashan bi nesitu yakwana tai, inu ana daiman gi hawil ashan bi ja le intum, (lakin ana ma agder lahadi hasa). Ashan ana bi indu samar fi intum, ze ma ana indu fi bagi nas tanin al umon umamiin. ¹⁴ Deinu ana le Yonaniin wa le Ajanib, le nas al negitin wa nas al belitin. ¹⁵ Biga haja al fi le ana, inu ana jahiz ashan bi bashir al injil le intum al fi Roma. ¹⁶ Fadiya mafi le ana, ashan injil, leanu huwo guwa ta Allah le kulasa le kulu zol al amin, le Yahudiin awel, wa kaman le Yonaniin. ¹⁷ Leanu kadasa ta Allah zahir min iman le iman. ze ma kan katibu, "Zol al adil bi hai be iman." ¹⁸ Ashan zalan ta Allah zahir min sama did kulu nas ta fujur wa al ma adil, al umon bi wasat katiya bi gofulu hak ta Allah. ¹⁹ De ashan marafa ta Allah zahir le umon, Allah wori le umon. ²⁰ Ashan shikil tou al ma gi aiynu, guwa tou al badiya wa tebiya tou al ilahiya, al aiynu wade, min zaman kalagu Alam, be wasat hajat al huwo khalagu. biga umon ma bi indu uzur. ²¹ De ashan ze ma umon arufu Allah, umon ma mejidu huwo ze Allah, wele umon ma wodi shukuran le huwo , lakin umon tala belitin fi afkar tomon, wa kaman gulub tomon al duluma al ma bi fahim. ²² Umon bi fekir gal umon negitin, lakin umon belitin. ²³ Umon geiru mejid ta Allah al ma bi karabu, le shikil wa sura ta insan al bi karabu, wa kaman ta tiyur wa haiwan al bi oduru ma arba kura, wa al bi doura be batna. ²⁴ Ashan kida Allah selimu umon le shahwat ta gulub tomon le najasa, ashan umon bi karabu jisim tomon fi beina tomon. ²⁵ De umon al bi geiru hagiga ta Allah le kizib, wa le nas al gi abidu kaliga min kan al bi abidu Allah, al bi shukuru lel abad, Amin. ²⁶ Ashan kida, Allah selimu umon le hajat ta duniya, wa nuswan tomon geiru elakat al tebiya le al ma tebiya. ²⁷ Wa bi nefs teriga kaman rujal tomon sibu elakat al tebiya ma nuswan, wa umon dakalu fi shahwat ma baad. Del kan rujal al bi amulu elaka al rajil ma rajil wa umon ligo ekab ashan haja al umon geni amulu. ²⁸ Ashan umon ma kutu Allah fi marafa tomon, Allah wodi le umon fekira al batal ashan keli umon amulu hajat al ma kwes. ²⁹ umon kan mala bi adam kadasa, katiya, taama, kizib, umon maliyan ma hasada, katulu, ingisamat wa afkar sheitaniya, umon ta suwata. ³⁰ Kerehiya le Allah, kebriya wa turuk ketir ta amulu katiya, umon ma gi ihterimu Abuhat tomon. ³¹ umon ma gi fahim, ma indum iman, ma indum geliba, wa ma indum rahma. ³² Umon fahim gawanin ta Allah al inu le nas al bi amulu hajat al batal umon bi mutu, lakin umon ma bes bi amulu hajat del, lakin kaman umon mokosutin ma nas al gi amulu.