¹ Bad dak malaika wori le ana bahar ta moyo ta haya, nedif ze kristal. Bi kubu min kursi ta Allah wa ta Koruf ² bi wasat mururu fi nus ta sika ta medina. Fi kulu taraf ta bahar de shejera ta haya, bi weledu itnasar shikil ta fawakeh, wa bi weledu fawakeh fi kulu shahar. Wa urshal ta shejera de ilaj le umam. ³ Laana tani ma bi kun fii. Kursi ta Allah wa ta Koruf bi kun fi juwa medina de, wa khudam tou bi wodi le huwo kadamat. ⁴ Umon bi ainu wusa tou, wa isim tou bi kun fi ras tumon. ⁵ Bilel bi kun mafi tani; nur ta lamba wele shemis ma bi kun mohim tani leanu Rabuna Allah yau bi kun nur le umon. Umon bi kun fi sulta lel abad al abadin. ⁶ Malaika kelim le ana, ''Kilmat de sah wa hagiga. Rabuna, Allah ta aruah ta anbiya, rasulu malaika tou ashan bi wori le khudam tou haja al bi hasil gerib.'' ⁷ ''Ainu! Ana gerib bi ja! Baraka le zol al bi asuma kelimat ta nubuwa ta kitab de.'' ⁸ Ana Yohana, ana yau asuma wa ainu hajat del. Fi wokit ana asuma wa ainu umon, ana waga tehet fi kura ta malaika ashan bi abidu huwo al kan bi wori le ana hajat del. ⁹ Huwo kelimu le ana, ''Mata amulu kalam de! Ana khadam ze inta, ma akwana taki al anbiya, wa be del al bi asuma kilmat al fi kitab de. Abidu Allah!'' ¹⁰ Biga huwo kelimu le ana, ''Mata khatimu kilmat ta nubuwa ta kitab de, zaman biga gerib. ¹¹ Zol al bi amulu hajat batal keli huwo istermir be amulu hajat al batal. Zol al bi amulu najasa , keli huwo istemir be najasa tou. Zol al bi amulu hajat al kwes, keli istemir be amulu hajat al kwes , Zol al kudus, keli istemir fi kadasa.'' ¹² Ainu! Ana gerib bi ja. Mukafa fi ma ana, ashan bi dafa le ai zol hasab haja al huwo amulu. ¹³ Ana Alfa wa Omega, al awel wa al akir, bidaya wa nihaya, ¹⁴ Baraka le del al bi kasulu gumas tumon ashan umon bi indu hak ashan akulu min shejera ta haya wa bi dakalu fi medina min abuab. ¹⁵ Al be bara de kilab, kajajir, nas ta zina, nas al bi katulu nas, al abidu asnam, wa ai zol al bi hibu wonusu kizib. ¹⁶ Ana, Yesua, rasulu malaika tai ashan bi shad le intum ann hajat de le kanais. Ana juzur wa min usra ta Daud, Nijama ta sabah al bi lama.'' ¹⁷ Roho wa arusa bi kelimu ''Taal!" Keli zol al bi asuma kelimu ''Taal!" Ai zol al atshan, keli huwo ja, wa ai zol al indu niya, keli huwo ashrub moyo ta haya de majani. ¹⁸ Ana bi ashad le ai zol al bi asuma kilmat ta nubuwa ta kitab de: Iza kan ai wahid zidu kalam tani le kilmat de, Allah bi zidu le huwo min darbad al katibu anu fi kitab de. ¹⁹ Iza kan ai wahid shilu kilma tani bara min kitab ta nubuwa de, Allah bi shilu bara nisba tou min shejera ta haya wa fi medina al mukadas al katibu anu fi kitab de. ²⁰ Zol al bi ashad ann hajat del bi kelimu, ''Nam! Ana gerib bi ja.'' Amen Taal, Rabana Yesua! ²¹ Neima ta Rabana Yesua keli kun ma intum. Amen