¹ Ana ainu Koruf wagif ras Jebel Sahiun. Kan fi ma huwo 144,000 al indu isim tou ma isim ta Abu tou muktub fi usa tumon. ² Ana asuma sot min sama geni ze sot ta moyo ketir wa raad. Sot al ana asuma de ze nas al bi dogu gitarat. ³ Umon bi renim ternima jedid gidam ta kuris wa gidam arba haiwanat wa shuyuk. Mafi zol ageder aruf ternima de ile 144,000 al biu umon min wata. ⁴ De delin al ma waskanu nufus tumon ma nusuwan, leano umon hafisu nufus tumon nedif jinsiyan. Del umon al kan kalisu min nus ta nas ze simar al awel le Allah wa le Koruf. ⁵ Mafi kidib tala min kasma tumon; umon bedun laom. ⁶ Ana ainu malika tani bi tiri fi sama, huwo indu kabara al kues ta injil ashan bi beshiru le del al bi geni fi ard- le kulu umam, gebila, luga, wa nas. ⁷ Huwo nadi be sot kebir, ''Kafu takum Allah wa wedi le huwo mejid. Leano saa ta hukum tou ja. Abidu huwo, de al kalagu Sama, ard, bihar wa yanabi ta moyo.'' ⁸ Malaika tani, nimra itenin ruwa wara tumon, bi wonuso, ''Waga, waga Babil al azim, al wedi nas kulu ashrabu min merisa ta zalan ta zina tou.'' ⁹ Malaika tani nimra talata ruwa wara tumun, bi wonuso bi sot fok, ''Kan fi zol abidu wahsh de wa sura tou wa ligu alama fi usa tou aw fi iden tou, ¹⁰ huwo kaman bi ashrabu juzu min khamr ta zalan ta Allah, al kubu tekin fi kubaya ta zalan tou. Zol al bi ashurubu bi aragu huwo be nar wa kibrit gidam malaikat ta Allah al kadisin wa gidam ta Koruf. ¹¹ Dukhan ta azab tumon bi ruwa fok lel abad al abidin, wa umon ma indu raha bilele wa nahar delin al bi abidu sura ta wahsh, wa kulu zol al kutu le huwo alama ta isim tou. ¹² Hini yao subur ta Kadisin ta Allah, delin al bi hafiso wasaya ta Allah wa Iman tumon fi Yesua.'' ¹³ Ana asuma sot min sama kelimo, ''Katibu kalam de: Baraka le delin al mutu fi Rabuna.'' ''Nam,''Roho bi kelimo, ''ashan umon bi ligu raha min taab tumon, leano amail tumon bi ruwa wara tumon.'' ¹⁴ Ana ainu,wa kan fi sihab abiyad. Al bi geni fi sihab de ze jena ta insan. Huwo indu Taj min dahab fi ras tou wa menjel senin fi iden tou. ¹⁵ Yala malaika tani tala min jua haikal wa nadi be sot fok le de al bi geni fi sihab : ''Shilu menjel taki de wa bada hasad. Leano zaman ta hasad ja, ze ma zira ta wata biga nigito.'' ¹⁶ Yala de al kan bi geni sihab de jada menjel tou fi wata, wa hasidu wata kulu. ¹⁷ Malaika tani tala min haikal fi sama; huwo bardu indu menjel senin. ¹⁸ Wa kaman malaika tani tala min mazbah, huwo indu sultan fugo nar. Huwo nadi de al indu menjel senin be sot fok, ''Shilu menjel taki al senin de wa gata gata idenat ta enap ta wata de leano umon nigitu.'' ¹⁹ Malaika de jada manjel tou fi wata wa limu enap ta rad kulu. Huwo kubu kulu fi masara ta zalan ta Allah. ²⁰ Yala masara de asuru enap de bara min medina, wa dom kubu ketir lahadi wusulu fi kasuma ta husan, le musafa ta 1,600 galuwa.