¹ Alama kebir aino fi sama: mara lebisu shamish, ma gamara tehet kura tou wa fi ras ta tou taj fugu itnashar nujum. ² Heya kan hamilan, heya kan bi kore be waja ta weleda, fi azab ta weledo jena. ³ Kaman alama tani aino fi sama: fi tineen ahmar keber indu saba ras wa ashara gurun, wa kulu ras fugu taj. ⁴ Danaba tou juru telit ta nujum al fi sama wa jadaw fi ard. Tineen de wogif gidam ta mara al dear weledo de, ashan kan heya weledo, huwo be abula jena ta heya. ⁵ Heya kan weledo weled, huwo yao be ja hukumo umam kulu be asaya min hadid. Jena de kan arfao beit fi gidam ta Allah wa le kursi tou, ⁶ wa mara de kan jere le sahra, fi mahal al Allah yao jahezu le heya ashan be geni fugu le fatra ta 1,260 yom. ⁷ Harib kan fi sama. Mekhail wa malaikat tou shakila ma tineen, wa tineen ma malaikt tou kan shakila kaman. ⁸ Laken tineen wa malaikat tou kan ma agder gilibo. Biga huwo wa malaikat tou ma indo mahal fi sama. ⁹ Tineen al keber huwo yao debiba ta zaman al bi nadi huwo ibiles aw shetan, huwo yao kabasu alam kulu, jadao fi ard, wa malaikat tou jadao ma huwo sawa. ¹⁰ Bad dak ana asuma sot fok fi sama:" Hasa kalasa timo wa guwa wa molk le Allah ta nina, wa sulta ta Massih. Leano al mushteki al kan bi ishteki akwana ta nina bilel wa nahar gedam ta Allah jadaw tihed. ¹¹ Umon gelibo huwo be dom ta koruf wa be kelima ta shihada tumon, leano humon ma hibo haya tumon hata fi mutu. ¹² Ashan keda afrah, samawat wa kulu del al bi geni fugu! Laken taab le nas al fi ard wa bahar, ashan ibiles nenzil tihed le intum! Huwo zalan shedid wa huwo arofu ino zaman tou bega guser! ¹³ Zaman tineen arofu gali jadao huwo tihed fi ard, huwo bada turugu wara mara al weledo jena weled de. ¹⁴ Lakin mara de wodi le heya itneen jenah ta sagur al keber ashan heya be jere le mahal al jahizo le heya fi beriya. Hinak Allah yao be hafizu heya le fatra ta talata sena wa nus, beyed min debiba. ¹⁵ Debib de kan rushu moya min kasuma tuo ze nahar(bahar), ashan bi shelo heya bayed. ¹⁶ Lakin ard kan saido mara de. Ard kan fata kasuma tou wa abula nahar al tineen de kan rushu min kasuma tou. ¹⁷ Tineen de bega zalan min mara de wa huwo ruwa ashan be shakila ma bagi iyal ta heya, delin al bi asuma le wasaya ta Allah wa hafizu shihada an Yesua. ¹⁸ Bad dak tineen de kan wogif fi romola al fi taraf bahar.