¹ Bad dak ana aino malaika tani keber bi nenzel min sama. Lefu huwo ma sehab, wa kos-kusah fugu ras tuo. Wusa tuo ze shemish wa kuren tuo ze amud ta nar. ² Huwo amsuku ketab suker, fi iden tuo kan fatao, wa huwo kutu kura tuo al yemen fi bahar wa al shamal fi ared. ³ Huwo bada kore be sot keber ze kore ta ased. Zaman huwo kore , saba saga kan wonosu. ⁴ Zaman saba saga wonosu, ana kan der katebu, laken ana asuma sot min sama bi kelimo," Dusu kalam al saba saga wonosu. Mata katebu tehed". ⁵ Bad dak malika al kan ana aino wogif fi bahar wa ared, gum arfa eden tou le sama. ⁶ Huwo halefu be al bi ish lel abad al- abeden, huwo al kalagu sama wa kulu hajat al fugu, ard wa kulu hajat al fugu, wa bahar wa kulu hajat al fugu, wa malika de kan wonosu," Mafi bi kon fi taakir tani ⁷ Lakin fi yom al malika nimra saba be afugu torombeta ta tou, Allah be kashefu sir ta tou, ze ma huwo wore le kadamen tou al anbeya." ⁸ Sot al ana asuma min sama wonosu le ana tani," Ruwa, shelo ketab al fatao fi iden ta malika al wogef fi bahar wa fi ard." ⁹ Ana bada ruwa le malika de wa kelemo le huwo kede wodi le ana ketab al suker de. Huwo kelemo le ana," Shelo ketab de wa akolu. Fi batna taki be kun murr, laken fi kasuma taki be kun helw ze asel." ¹⁰ Ana shelw ketab al suker de min iden ta malika wa akolu. Kan helw ze asel fi kasuma tai, laken baad ana akolu, bega murr fi batna tai. ¹¹ Kelimo le ana," Ita lazem kede itnabaa ann nas keter, umamm, lugat, wa muluk.