¹ Ashan keda, akwani tai al mahbubin wa al ana mushtak le humon, farah wa taj, be teriga de wogif takum gowi fi Rabana, sabi al mahbubin. ² Ana bi asalu min Afudiya, wa bi asalu min Santiche, keli fekira takum kun wahid fi Rabana. ³ Hagiga, ana bi asalu inta kaman ya sherik tai al muklis: saidu nuswan del al jahidu wa ishtakal ma ana fi basheriu injil, sawa ma Clement wa kaman bagi nas al ishtakal ma ana, al asma tomon fi Kitab ta Haya. ⁴ Afrah fi Rabana daiman, wa ana bi kelimu tani, afrah. ⁵ Keli tul baal takum arufu ma nas kulu. Rabuna huwo gerib. ⁶ Ma keli intum shilu ham ta ai haja. Wa lakin fi kulu haja bi salah wa daua, ma shukuru, keli telbat takum kun maruf le Allah, ⁷ wa salam ta Allah, al futu kulu fihim, hafisu gulub takum wa afkar takum fi al Mesih Yesu. ⁸ Akhir haja, ya akwani, kulu hajat al hak, kulu hajat al muhtaram, kulu hajat al adel, kulu hajat al tahir, kulu hajat al bi hibu, kulu hajat al ta suma tou kwes, kan fi ai haja al mumtaz, kan fi ai haja al bi shukuru, fekiru takum ann hajat del. ⁹ Hajat al intum alimu wa istelimu wa asuma wa ainu fi ana, keli intum amulu hajat del, wa Rabuna ta salam bi kun ma intum. ¹⁰ Ana farhan shedid fi Rabana ashan intum jedidu ihtimam takum le ana. Fi hagiga intum gubal keda kan bi ihtam le ana, lakin kan mafi fursa le intum ashan bi saidu. ¹¹ Ana ma bi kelim ashan ana muhtaj. Leano ana alimu kef ana bi afrah fi ai zuruf. ¹² Ana arufu kef ana geni meskiin wa kaman ana arufu geni ganian, fi kulu teriga wa fi kulu hajat ana alimu siir ta geni shaban aw geni jean, wa kef ana bi ish fi ketir aw fi ihtiaj. ¹³ Ana bi agder amulu ayi haja bi wasat huwo al bi gowi ana. ¹⁴ Ala kulu hal, intum amulu kwes ashan bi shariku subaat tai, ¹⁵ Ya Filibiin intum arufu kwes inu fi bidaya ta injil, zaman ana sibu Macedonia, mafi kenisa saidu ana fi kalam ta wodi wa istelimu ela intum baraw,, ¹⁶ Wa hata zaman ana fi Tessalonica, intum rasulu musaada le ihtiaj tai aktar min wahid mara. ¹⁷ Ma inu ana bi fetisu hadiya, lakin ana bi fetisu samar al bi zedu fi hesab takum ¹⁸ Ana istelim kulu hajat be malian, wa kaman aktar. Saido ana shedid hasa ana istelim min Epaphroditus hajat al intum rasulu. Hajat del kulu helu - Reha tou kwes, zebiha al gabilu wa kwes le Rabana. ¹⁹ Keli Rabana mala ihtiajat takum hasab ghanian ta mejid tou fi al Mesih Yesua. ²⁰ Hasa mejid le Allah wa Abu ta nina ile al abad al abadiin. Amen. ²¹ Selimu kulu muminin fi al Mesih Yesua. Akwan al ma ana bi selimu le intum. ²² Kulu al muminiin heni bi selimu le intum, khususi nas al fi bet ta Caesar. ²³ Keli neima ta Rabuna Yesua al Mesih kun ma rohu takum.