¹ Baad dak Yesua bada alimu umon bi amsal. Huwo kelimu, " Fii zol zara karma, huwo amulu hosh hawili karma de, wa huwo abinu burj yala huwo selimu le muzariin del. wa huwo safar. ² Fi zaman al kwes, huwo rasulu kadam le muzariin ashan bi jibu samar ta karma de. ³ Lakin umon amsuku huwo, wa dugu huwo wa turudu huwo bidun haja. ⁴ Tanimara huwo rasulu kadam tani le umon, wa kaman umon awugu huwo fi ras wa amulu huwo batal. ⁵ Huwo lisa rasulu kadam tani, wa umon biga katulu kadam de. umon azibu nas ketir bi nefsa teriga, dugu bagiin , wa katulu taniin. ⁶ Huwo lisa indu zol wahid tani ashan bi rasulu, weled al huwo gi hibu. De yau akiir weled al huwo rasulu le umon. Huwo kelimu, umon bi ihterim weled tai de. ' ⁷ " Lakin al karamiin kelim le baad tomon,' De yau al warisa. taal takum, keli nina katulu huwo ashan warisa de bi kun le nina.' ⁸ Umon gubudu huwo, wa umon katulu huwo, wa jada huwo bara min mahal zara de. ⁹ Biga, sidu mahal zara de bi amulu shunu? huwo bi ja wa bi demiru karamiin del wa bi wodi mahal zara de le nas taniin. ¹⁰ Hal intum am agara kalam al moktub de? 'Hajer al Binaiin aba yau biga hajer al zawiya. ¹¹ De kan min Rabuna, wa ajeib fi uyon ta nina .'" ¹² Baad kida nas al kubar ta yahud katitu ashan bi gubudu Yesua leanu umon fahim inu huwo kelimu bi amsal did umon. Lakin umon kan gi kafu min nas al kan ketir de. Umon sibu huwo wa umon ruwa. ¹³ Baad dak umon rasulu le huwo baad min Phariseen wa Herodiin ashan bi jeribu huwo be kelimat. ¹⁴ Zaman umon ja, umon kelim le huwo, "Ya Mualim, nina arufu inu inta zol al adi, wa inta ma kutu bala fi kalam ta ai zol, wa inta ma gi ferigu nas. Inta gi alimu sika ta Allah al hak. Hal huwo ganuni ashan nina bi dafa deriba le Caesar au la? keli nina dafa wala ma dafa?" ¹⁵ Lakin Yesua arufu shokol kebra tomon wa kelim le umon, " Lee intum gi jeribu ana? Wodi takum le ana denar ashan ana bi aiynu." ¹⁶ Umon jibu wahid denar le Yesua. Huwo asalu umon " Sura wa kitaba de ta munu?" Umon juwabu, " Ta Caesar." ¹⁷ Yesua kelim , " Wodi le Caesar hajat ta Caesar, wa le Allah hajat ta Allah." umon kan istagarab min Yesua. ¹⁸ Baad dak al Sadduceen, al gi kelimu inu mafi giyama, ja le huwo. umon asalu huwo, gal, ¹⁹ " Ya Mualim, Musa katibu le nina inu, 'Iza kan zol indu Aku mutu wa huwo sibu mara, lakin mara de ma indu jena, Aku tou kede shilu mara de, wa bi weledu ma hiya iyal le Aku tou.' ²⁰ Kan fii saba Akwana; Al awel zouju mara wa huwo mutu, ma weledu jena. ²¹ Baad dak nimira itniin geni ma mara de wa mutu, ma weledu jena, wa nimira talata bardu. ²² Nimira saba ma weledu ma mara de. akir tou, mara de kaman mutu. ²³ Fi yom ta giyama, kan umon ja gum, mara de bi kun ta munu? ashan saba akwana del geni ma mara de ze tomon " ²⁴ Yesua kelimu, " De yau teriga al intum bi woduru, ashan intum ma arufu Injil, wele guwa ta Allah? ²⁵ Kan umon ja gum min mutu, umon wele bi jouzu wele bi jouzu umon, lakin umon bi kun ze malaikat fi samah. ²⁶ Lakin fi kalam ta nas al mutu wa goumu, hal intum ma agara fi kitab ta Musa, al kan nar wala fi gaba, Allah kan kelim le huwo kef, wa gal, ' Ana huwo Allah ta Ibrahim wa Allah ta Isaaka wa Allah ta Yacobo'? ²⁷ Intum nas al woduru huwo ma Allah ta nas al meitiin, lakin huwo Allah ta nas al hayiin. Intum nas al galtaniin." ²⁸ Fi wahid min kataba ja wa asuma munakasa tomon; huwo aiynu Yesua gi juwabu umon tamam. huwo asalu Yesua, " De yatu wosiya yau muhim al futu kulu?" ²⁹ Yesua juwabu, " Al mohim khalis yau, 'Asuma, Ya Israel, Rabuna ta nina Allah, huwo wahid. ³⁰ Inta lazim keli hibu Allah taki ma kulu geliba taki, ma kulu nefsa taki, ma kulu fekira taki, wa ma kulu guwa taki.' ³¹ Wosiya al tani yau ze de, ' Inta lazim keli hibu jeran taki ze nefsa taki,' mafi wosiya tani al akbar min wasaya del." ³² Wahid min kataba de kelimu le huwo, " De tamam, Ya Mualim! Hagiga inta kelimu inu Allah wahid, wa mafi Allah tani ila huwo barau. ³³ Ashan inta bi hibu huwo bi kulu geliba wa kulu fekira, wa ma kulu guwa, wa ashan inta bi hibu jeran ze nefsa taki huwo aksan min haragu zabiha wa tegedim." ³⁴ Zaman Yesua aiynu inu huwo juwabu be hikma, huwo kelim le huwo, " Inta ma beyid min molokut ta Allah." baad dak mafi zol deiru asalu huwo tanimara. ³⁵ Zaman Yesua gi derisu fi haikal, huwo kelimu, " Kef kataba bi kelim gali Mesih huwo weled ta Daud? ³⁶ Daud bi nefsa tou, fi Roho al Kudus, Kelim gal, Rabuna kelim le Rabuna tai, " Geni fi iden yemin tai lahadi ana bi kutu adu taki tehet kuraiin taki.'" ³⁷ Daud bi nefsa tou gi nadi huwo 'Rabuna; yala kef al Mesih bi kun weled ta Daud?" nas kutar al limu kan asuma huwo bi farah. ³⁸ Fii dirasa tou Yesua kelim, " Amulu hisab takum min kataba, al umon gi hibu ashan bi dowru ma jalalib al tuwaliin wa gi selimu umon fi mahalat ta aswak, ³⁹ Wa gi kutu umon fi karasi al gidam fi mujama wa fi mahalat al muhtaram fi ihtefalat. ⁴⁰ Wa umon kaman gi akulu fi biyut ta aramil, wa gi seli salawat al towil ashan nas keli aiynu umon. Nas del bi ligo hukum al shedid." ⁴¹ Baad dak Yesua geni tehet jambu sanduk ta ataya fi haikal; Huwo kan gi aiynu nas zaman umon gi jada gurush tomon fi sanduk ta ataya. Nas ketir al ganiyaniin jada gurush ketir. ⁴² Baad dak fii mara armala meskin ja wa jada itniin girish, al indu faida kebir. ⁴³ Huwo nadi talamiz tou wa kelim le umon, "Ana gi kelim le intum hagiga, Mara al armala al meskin de jada fi sanduk ta ataya de aktar min nas kulu al jada. ⁴⁴ Nas del kulu wodi min gurush tomon al ketir. Lakin Mara al armala de ma shokol meskin ta hiya de, ".wodi kulu min gurush al kan hiya gi ish min fogo