¹ De yau bedaya ta injil ta yesua al mesih, Jena ta Allah. ² Ze ma katibu fi kitab ta nebi Isaiah, Aiynu. ana gi rasulu marasula tai gedam inta, al huwo bi jahizu sika taki. ³ Sot al gi nadi fi beriya. Jahizu sika ta Rabuna, sala sika tou adiil. ⁴ Yuhana ja, gi amidu fi beriya wa gi bashiru an mamudiya ta touba wa magfara ta katiya. ⁵ Kulu nas ta yahudiya wa kulu nas al fi Urselim ja le huwo. huwo amidu umon fi nahar Jordan. Umon bi eterif be katiya tomon. ⁶ Yuhana kan gi lebisu jilid ta jemel wa gi lebisu gash jilid fi sulba, wa huwo kan gi akulu jarat wa asel. ⁷ Huwo kan bi bashiru, fi zol tani bi ja bad ana al gowi min ana: ana ma bi agder ashan bi fiku hubal ta jisma tou. ⁸ Ana gi amidu intum bi moya, lakin huwo bi amidu intum bi Roho al Kudus. ⁹ Wa kan hasil fi ayam dak, Yesua ja min Nazaretta le Galileya, wa kan amidu howo ma Yuhana fi nahar Ordan. ¹⁰ Wa baad ma amidu Yesua, huwo aiynu samawat fata wa Roho ja le huwo fi shikil ta hamam. ¹¹ Wa sot ja min samawat, inta yau jena tai al mahbub al ana moksut ma inta. ¹² Baad dak Roho kelimu le huwo ashan bi ruwa fi beriya. ¹³ Wa huwo kan fi beriya le mudat arbeyiin yom, jeribu huwo be sitan, wa huwo kan ma haiwanat al mutawahish wa kan malaika gi khadimu huwo. ¹⁴ Wa baad ma kutu Yohana fi sejiin, Yesua ja fi Galileya wa gi bashiru injil ta Allah, ¹⁵ Wa gi kelimu inu," zaman ja kalas, wa molokut ta Allah biga gerib. tubu wa aminu fi injil." ¹⁶ Fi zaman huwo kan gi douru fi taraf bahar ta Galileya, huwo aiynu Samaan wa Andraus al huwo aku ta Samaan gi jada shabaka fi bahar, le anu umon kan sayadiin ta samak. ¹⁷ Yesua kelim le umon, "taalu warai, wa ana bi kutu intakum ashan bi gobudu nas. ¹⁸ Tawali umon sibu shabakat wa ruwa warau . ¹⁹ Ze ma Yesua kan gi ruwa le gidam, huwo aiynu Yakub weled ta Zebedayo wa aku tou Yuhana, umon kan fi murkab gi sala shabakat. ²⁰ Huwo nadi umon wa umon sibu abu tomon Zebedayo fi murkab ma nas ta shokol, wa umon ja warau. ²¹ Baad dak umon ja fi Capernaum, wa fi yom al sebit, Yesua ruwa fi mujama wa alimu. ²² Umon kan istagarab min taalim bi tou, le anu huwo kan gi alimu ze zol al indu sultan wa ma ze kataba. ²³ Biga kan fi zol fi mujama huwo indu roho al nejis huwo kore be sot fok. ²⁴ bi gul, "inta deer keli nina amulu sunu le inta, Yesua al Nasiri? Hal inta ja ashan bi demiru nina? ana arufu inta munu. inta zol kudus min Allah!" ²⁵ Yesua intehir al sitan wa kelim, " kun hadi wa amruk min huwo!" ²⁶ Wa al roho al nijis de jada huwo tehet wa gi kore be sot kebiir. ²⁷ v 27 Kulu nas kan istagarab, biga umon asalu baad tomon, " de sunu? Talim jedid ma sultan! Hata huwo agder amiru aruwah al nijis wa aruwah de bi ihterim huwo!" ²⁸ Wa akhbar an Yesua asmau fi kulu mahal fi Galileya. ²⁹ Baad ma huwo tala bara min mujama, umon ja fi bet ta Samaan wa Andraus, sawa ma Yakub wa Yuhana. ³⁰ Nesiba ta Samaan kan ayan be huma, wa umon wori kabara an hiya le Yesua. ³¹ Biga huwo ja, amsuku hiya be ida ta tou, wa goumu hiya fok; wa huma de fat, wa hiya bada khadimu umon. ³² Fi misah dak baad ma shemis waga, umon jibu le huwo nas kulu al kan ayanin au al moskunin bi aruwah al sherir. ³³ Nas ta medina kulu limu sawa fi bab. ³⁴ Huwo aliju nas ketiir al kan ayanin be ayanat barau barau wa turudu aruwah al sherir ketiir, lakin huwo ma wodi fursa siyatin del ashan bi wonusu leanu umon arufu huwo ³⁵ Huwo gam bedri shedid, ligo lesa wata duluma huwo ruwa fi mahal kas wa seli hinak. ³⁶ Samaan wa nas al kan ma huwo fetisu huwo. ³⁷ Umon ligo huwo wa umon kelimu gali, " Ai zol gi fetisu inta." ³⁸ Huwo kelimu, " keli nina ruwa fi mahal tani, bara hawli mudun, ashan ana bi agder bashiru hinak kaman. de yau sabab al ana ja fogo." ³⁹ Huwo ruwa fi hawli Galileya kulu, gi bashiru fi mujamaat tomon, wa gi turudu siyatin. ⁴⁰ Zol ta juzam ja le huwo, huwo gi asalu; huwo dengeri tehet wa kelimu le Huwo, " iza kan inta bi rudu, aliju ana." ⁴¹ Huwo hariku bi rahma, Yesua medu ida tou wa lemesu huwo, kelimu le huwo gali, "Ana rudu. keli inta tala nedif. ⁴² Tuwali juzam de sibu huwo wa zol de biga tala kwes. ⁴³ Yesua anziru huwo shedid wa rasulu huwo ashan bi ruwa. ⁴⁴ wa kelimu le howo, " keli inta ma wori kalam al hasil de le ai zol, lakin ruwa, wori nefsa taki le khahana, gedimu le nefsa taki khasil ze ma Musa kelimu, de, ze shuhuda le umon. ⁴⁵ Lakin huwo ruwa wa bada wa wazau kalam de fi ai mahal, sibu Yesua ma bi agder tanimara ashan bi dakalu fi medina lakin huwo geni beid min medina. Nas min kulu mahalat lisa bi ja le huwo.