¹ Zaman hajat delin kan amulu, al muazifin wajihu ana wa kelim, ''Al nas ta Israil, al kahana, wa al Lawien lisa ma fasilu nufus tomon min nas ta al aradi tanin wa sokol batal tomon: Kanaanien, Hittien, Perizzien, Jebusien, Ammonien, Moabien, Masirien, wa Amorien. ² Leanu umon kalas salu juzu ta banat tomon wa awulad, wa kalas lakabatu al nas kudusin ma al nas ta aradi tanin, wa al muwazifin wa kiadat kalas biga awel fi adam amana de.'' ³ Zaman Ana asuma zede, Ana seretu gumasat tai wa jelebia wa juru sar bara min ras tai, wa Ana geni tehet, moksur. ⁴ Kulu delin al bi rogus fi kalamat ta Allah ta Israel an adam amana de limu le ana ze am Ana kan geni fadia lahadi al tekdimat ta misah. ⁵ Lakin fi tekdimat ta misa Ana gum min makan tai ta ihana be gumasat tai mosurut wa jalabia, wa raka tehet wa midu idenat tai le Yahwa Allah tai. ⁶ Ana kelimu, ''Allah tai, Ana kajlan wa fadiya ashan arfa wusa tai le inta, leanu batal ta nina biga arfa be fok ras tanina, wa galat tanina raba le samawat. ⁷ Min ayam ta judud ta nina lahadi hasa nina lisa bi geni fi zam kebir. Fi galtat ta nina, wa muluk, wa khahana ta nina kan wodi fi al ida ta muluk ta dunia de, le sef, le abudiya, wa le karaba wa fadiya fi wusa, ze nina yau alela. ⁸ Lisa hasa le zaman guser, rahma min Yahwa Allah ta nina kalas ja le sibu nina besitin fadulu hai wa le wodi nina makan dusu kura fi makan tou kudu. De kan le Allah ta nina le fatau uyun ta nina wa le wodi nina raha suker fi abudiya ta nina. ⁹ Leanu nina biga abit, lakin Allah ta nina kan ma nesitu nina lakin kalas midu tifagia ta amana le nina. Huwo kan amulu de fi gidam ta melik ta Persia ashan le wodi nina guwa jedid, kida nina bi agder rijau abinu bet ta Allah ta nina wa arfau min damar tou. Huwo amal de ashan gali huwo biga wodi nina hos ta himaya fi Yahuzah wa Urselim. ¹⁰ Lakin hasa, Allah ta nina, sunu biga nina bi kelim baad de? Nina kalas nesitu awamir taki, ¹¹ al awamir al inta wodi le kadamin taki al ambiya, zaman inta kelimu, ''Ard de al intum bi dakalu ashan meliku huwo ma ard al nedif. Huwo biga waskan be nas ta al ard ma batal tomon. Umon kalas malau huwo min wahid akir le al tani ma adam nadafa tomon. ¹² Kida hasa, kede intum ma wodi banat le awulat tomom; mata kun silu banat tomon le awulat takum, wa intum kede ma fetisu salam mustemir tomon wa geni kwes, kida gali intum bi kun gowi wa akulu keirat ta ard, kida intum bi sibu iyal takum ashan meliku huwo le kulu zaman. ¹³ Lisa baad ai haja al ja fogo nina le amail ta nina al batal wa galat tanina kebir-mini inta, Allah ta nina, kan bi abusu wara sunu galtat ta nina bi istehik wa sibu nina hai- ¹⁴ kede nina tanimara kasuru awamir taki wa amulu zawaj mulakabat ma nas mokruhin delin? Inta ma bi kun zalan wa katulu nina ashan kede hinak ma bi kun wele wahid bi sibu, mafi wahid bi tefes? ¹⁵ Yahwa, Allah ta Israel, inta yau bar, leanu nina kalas fadulu bes besit fi yom de. Aiynu! Nina yau ini gidam taki be galat ta nina, leanu mafi wahid ini al bi agder wogif gidam inta ashan kalam de.