¹ Yahuwa kelimo le Musa," Ruwa le Faraun, ashan ana kutu geliba tou wa khudam tou gawi. Ana amolo zede ashan bi zahiro guwa tai le humon. ² Ashan ita bi wori le iyal taki wa iyal iyal taki hajat al gawi al ana amolo le Masrieen, wa ayat al ana amolo fi nus tumon. Itakom bi arufu gali ana Yahuwa." ³ Bega Musa wa Haron ruwa le Faraun wa kelimo le huwo, "Yahuwa, Allah ta Ebraneen, kelimo keda: ' Lahadi metain ita bi abba nenzil nefsa taki gidam tai? Sibo shaab tai kede ruwa ashan bi abido ana. ⁴ Lakin kan ita abba sibo shaab tai ruwa, asuma, bukura ana bi jibo jarad fi ard taki. ⁵ Humon bi kati watta wa mafi zol bi akider aino turab ta watta. Humon bi akulu hajat al naja nim berrid. Humon kaman bi akulu ai gum fi mazra taki. ⁶ Humon bi mala baet taki, wa ta khudam taki, wa ta Masrieen kulu- de haja la abuhat taki wele ajdad taki ma aino kulu kulu, haja de ma aino min zaman al humon kan fi lahadi yom ta alela."' Bega Musa tala min gidam ta Faraun. ⁷ Khudam ta Faraun wonoso le huwo," Lahadi metain zol de bi geni hadidio enna? Sibo Israeleen kede ruwa ashan humon bi abido Yahuwa Allah tumon. Ita ma gi lahizo gali Masir karabo? ⁸ Musa wa Haron nadi humon tani fi gidam ta Faraun, huwo kelimo le humon," ruwa takum abido Yahuwa Allah tamun. Lakin de nas munu yao bi ruwa?" ⁹ Musa gali," Enna bi ruwa ma shabab wa ajusin tanna, ma awlad wa banat tanna. Enna bi ruwa ma bagarat, galamayat, khurfan, wa kulu haiwanat tanna, ashan enna lazim bi amolo ihtifal le Yahuwa." ¹⁰ Faraun lekimo le humon," Be jed kede Yahuwa kun ma itakum, kan ana bi sibo itakum ruwa ma iyal takum. Aino, itakum indo haja batal fi rass takum. ¹¹ La! Ruwa, bess rujal, yao bi abido Yahuwa, ashan de haja al itakum daer." Gum Musa wa Haron min kasr ta Faraun. ¹² Baad dak Yahuwa kelimo le Musa," Mido iden taki fuk ard Masir ashan bi mala be jarad, humon bi hajimo ard ta Masir wa bi akulu kulu nabat al fugu, ai haja al berrid sibo." ¹³ Musa mido asaya tou fuk ard Masir, wa Yahuwa jebo hawa min sherig fi ard fi nahar ta yom daak lahadi bilel. Fi sabah ta tou, hawa de jibo ma huwo jarad ketir. ¹⁴ Jarad de kan inteshir fi Masir wa kati kulu makan. Mafi jarad be kemeia ze de kan zahir be teriga de wa ma bi zahir tani fi ard. Humon kati wata kulu naman wata biga aswed. ¹⁵ Humon akulu kulu nabat fi ard wa kulu simar ta shejera al berrid kan sibo. Mafi haja akhdar fadulo kan fi shejera wala fi mazra fi kulu ard Masir. ¹⁶ Faraun gum nadi Musa wa Haron be sura wa kelimo ," Ana amulo katiya did Yahuwa Allah takum wa did itakum. ¹⁷ Hasa, marra de affi takum katiya tai, wa seli takum le Yahuwa Allah takum ashan shelo mutu de bara min ana." ¹⁸ Musa gum tala min gidam ta Faraun wa seli le Yahuwa. ¹⁹ Yahuwa jibo hawa gawi min garb wa shelo jarad de kulu wa jadao humon fi bahar Al Ahmar; mafi jarad wahi fadulo fi ard Masir. ²⁰ Lakin Yahuwa kutu geliba ta Faraun gawi, wa huwo abba sibo kede Israeleen ruwa. ²¹ Yahuwa kelimo le Musa, "Mido iden taki fi sama, ashan bi kun dalam fi ard Masir, duluma al shedid bi sibo nas ma bi akider ain hajat al gidam tumon." ²² Musa mido iden tou fi sama, wa kan fi dalam shedid fi kulu mahal fi ard Masir le farta ta talata yom. ²³ Nas ma akider aino badon; mafi zol tala min baet tou fatra ta talata yom. Lakin, kan fi nur fi mahal al Israelieen gi geni fugu. ²⁴ Faraun gum nadi Musa wa kelimo le huwo," Ruwa abido Yahuwa. Hata osar takum, lakin agnam wa khurfan wa abgar bi faduloheni." ²⁵ Lakin Musa kelimo," Sibo kede enna dabau wa harago zebiha ashan bi gedimo le Yahuwa Allah tanina. ²⁶ Abogar tanna lazim bi ruwa ma enn; wele wahid bi sibo, enna lazim bi shelo humon le abido Yahuwa Allah ta nina. Leano enna ma arufu yato al bi ruwa gedimo le Yahuwa ele kan enna wosulo hinak." ²⁷ Lakin Yahuwa kutu geliba ta Faraun gawi, wa huwo abba sibo humon ruwa. ²⁸ Faraun kelimo la Musa," Ruwa min gidam tai,! Amolo hisab taki min haja wahid, be ino kede ita ma aino ana tani, ashan yom al ita bi aino wosa tai, ita bi mutu." ²⁹ Musa gali," Ita wonoso be nefsa taki. Ana ma bi aino wosa taki tani mara."