¹ Bulus, rusul ta Yesua al Mesih bi wasat irada ta Allah, le nas ta Allah al kudusiin fi Ephesus, al umon amin fi Yesua al Mesih. ² Neima le intum wa salam min Allah Al ab wa Rabana Yesua al Mesih. ³ Keli shukuru Allah Abu Rabana Yesua al Mesih, al huwo bariku nina bi kulu barakat al rohiya fi al samawat fi al Mesih. ⁴ Min bidaya ta alam Allah Ikhtar nina le huwo. inu nina bi kun mukadisin wa bi la luom fi gidam tou. ⁵ Allah ihktar nina min bidaya le tabeni ze iyal bi wasat Yesua al Mesih, hasab irada ta farah tou al kwes. ⁶ Tabeni ta nina le Yesua al Mesih ja bi shukur ta mejid neima tou al huwo wodi majani le nina fi Yesua al Mesih al huwo hibu. ⁷ Fi Yesua al Mesih nina ligo kulasa bi wasat doom tou wa maghfra al kataya, Hasab sokol ganiyan ta neima tou. ⁸ Huwo wodi neima tou le nina ma kulu hikma wa fehim. ⁹ Allah wori le nina hadaf ta irada tou al kan fi siir, hasab hajat al bi keli huwo farhan, Wa al huwo amulu fi al Mesih, ¹⁰ Ashan bi katit le hajat al bi hasil fi mustagbal. Ashan bi jebu kulu hajat sawa, kulu hajat fi samawat wa al arid, tehit keyada wahid, hata al Mesih. ¹¹ Fi al Mesih aiynu nina ze murisiin. Gedimu nina min bedaya hasab kuta ta tou al huwo amulu kulu hajat hasab hadaf ta irada tou. ¹² Allah ikhtar nina ze murisiin ashan nina bi kun awel nas al indu raja al mudmon fi al Mesih, ashan nina bi shukuru huwo fi mejiid tou. ¹³ Kaman intum, fi al mesih, kan intum asuma kelima al hak, al injil ta kulasa takum, intum amin fi huwo wa khatimu bi waad ta Roho al Kudus, ¹⁴ Al huwo damana ta wurisa ta nina lahadi nina ligo, ashan bi shukuru mejid tou. ¹⁵ Le sabab de, kulu ma ana asuma an iman takum fi Rabana Yesua wa muhaba takum le kulu nas ta Allah al mukadisin, ¹⁶ Ana ma wogif shukuru Allah min ajil intum ze ma ana gi zekir intum fi salawat tai. ¹⁷ Ana gi seli inu Allah ta Rabuna ta nina Yesua al Mesih, Al Abu ta mejid, bi wodi le intum roho ta hikma wa ruaya ta arufu huwo. ¹⁸ Ana gi seli inu intum bi fahim, inu intum bi arufu raja al huwo nadi intum wa sokol ganiyan ta mejid tou al warisu wasat kulu nas ta Allah al mukadisin. ¹⁹ Fi salawat tai ana gi asalu intum ashan bi arufu guwa tou al azim al ma mahdud fi nina al amin, hasab shokol ta guwa tou al kebir. ²⁰ De yau nefsa guwa al Allah amulu fi al Mesih fi zaman al huwo guomu Yesua min amuwat wahid marra wa kutu huwo fi ida tou al yemin fi samawat. ²¹ Huwo kutu al Mesih fok kulu hukum wa sultat wa guwa wa seitara, wa kulu isim al zekiru.al Mesih bi hakimu, ma bis fi zaman de, lakin kaman fi zaman al gi ja. ²² Allah kutu kulu hajat teheit kura ta al Mesih wa wodi huwo le kenisa ze ras fok kulu hajat. ²³ Kenisa yau jisim tou, Huwo jisim kamil al bi mala kulu hajat.