¹ Hassa, ana gi katibu le itakum, mahbubin, risala nimra itenin de ze zakira ashan bi tuwurumuk takum alnedif, ² ashan itakum bi zekiru kelimat al wonusu bediri be wasat anbiya al kudusin wa wasiya ta Rabuna Mukalis ta nina al wedi be wasat rusul takum. ³ Aruf takum de awel, inu nas ta talis bi ja fi ayamat al akir. Umon bi aliso wa bi ruwa hasab niyat tomon. ⁴ Umon bi kelim, `Wenu wad ta rija tuo? Min zaman Abuhat ta inna mutu, hajat kulu gi fadulu sawa sawa, min bidaya ta kaliga. ⁵ Umon bi nesitu be irada tomon inu samawat wa ard ja min moyo wa be wasat moyo, min bediri be amr ta Allah, ⁶ be wasat hajat de, demiru alam ta zaman dak, katiso be moyo. ⁷ Lakin hassa samawat wa ard gi hafiso umon le nar be nefsu amr. Gi hafisu umon le yom ta hukum wa damar ta nas al ma ta Allah. ⁸ Kede ma tala min fikra takum, mahbubin ,enu yom wahid le Rabuna uwo ze alif senawad, wa alif senawad ze wahid yom. ⁹ Rabuna ma gi ishtakal bira fi waad bitou, ze tanin gi fekir shukul bira. Lakin, uwo gi subur le itakum. Uwo ma indu niya le ayi zol ashan bi mutu, lakin le ayi zol ashan bi tub. ¹⁰ Lakin, yom ta Rabuna bi ja ze harami: Samawat be wuduru be sot kebir. Bi haragu hajat be nar, wa alard wa amail biuto bi bainu. ¹¹ Kan biga hajat de kulu gi ruwav demiru be teriga de, itakum bi kun yato shikil ta nas? Itakum bi ish haya ta kadasa wa makafa. ¹² Itakum bi itwaka wa gi istajil le ja ta yom ta Allah. Fi yom dak, samawat bi demiru be nar, wa hajat kulu bi siih be harara shedid. ¹³ Lakin be hasab waad bitou, inna gi istena samawat wa ard jedid, al abrar bi geni fugu. ¹⁴ Ashan kida, mahbubin, ze itakum gi itwaka hajat de, amulu takum al afdal ashan bi ligu itakum nedif wa budun luom gidam tou, fi salam. ¹⁵ Kaman, kele itakum shilu Intizar ta Rabuna ta nina ashan be kun kulasa, bes ze aku ta inna al mahbub bulus katibu le itakum, be hasab hikma al kan wedi le uwo. ¹⁶ Bulus wonusu an hajat de fi rasail tou kulu,al fugu hajat al saab bi fahimu. Nas al jahil wa ma sabit gi karabu hajat de, ze umon kaman gi amulu fi bagi kutub tanin, le damar tomon. ¹⁷ Ashan kida, mahbubin, ze ma itakum aruf hajat de, harisu nefus takum ashan kede ma wuduru itakum be kabasa ta nas al ma gi ish hasab ganun wa itakum bi fagidu amana takum. ¹⁸ Lakin kede itakum raba fi naima wa marifa ta Rabana wa mukalis ta nina Yesua al Messih. Kele mejid rija le uwo min hassa wa ilel aba. Amen!