¹ Paulo ni, mabusigo Kristu Yesu dii a’I adozii ni Timateo to, Pilimona ni, ama i'bu rezi pi ama rozi ama lele ndo rii, ² Ungu Apphia ama ambazi ni, ongu Arkipus ni ama askeri rezi ni, ongu eklezia remuka nyidi 'boru ri ni. ³ Kiza, i'bwe to engare Rubanga ni ama Ata di pi ama Opi Yesu Kristu to ri kolu anyito. ⁴ Malongwi anjo Rubanga ni o'du tuwadu si de malungwe anya ru maa elegi ni ga na'i. ⁵ Meri nga nyaa le, ungu a'i nyidi Opi Yesu ni aga rini dilega ra, ungu a’I 'ba 'borodu rini ri to. ⁶ Melegi ausi du anya a'i ni lamika kolu du okpo; dudu anyini nga loso ama esule Kristu ni 'aga rii. ⁷ Mari olure anjo to pi asi okpo to nyaa le si, a'dusiku 'ba Rubanga di okole ri ni asi evo okpo nyi si, maa adozi. ⁸ Disi du, de mani okpo Kristu ni aga kolu aa cara kezo anyi ni nga lele anyede ri ni edezo saa. ⁹ Ki lesi, ma i anyi dubasi- ma, Paulo ni Jaligo, ungu mabusi go Kristu Yesu di. ¹⁰ Ma'inyi maa ngwaa Onesimo ni maa ezile Yesu di maa olure mabusige rii. ¹¹ Anda ri olure konyi ako nyi ni, ki diadu andaa ni konyi to nyini ungu mani saa to. ¹² Mazwe andaa ni nyidid vule, andaa ni maa asidi gba ri i. ¹³ Esu kani male ama mda andaa ta mato, ausi kede du ibu mani nya’a kare ga, saa ma nyori aga ofu ole rini le'jo si.. ¹⁴ Ki male amede ngazi nyi ni nika ako ni ku. Male ibu loso nyidid rii kenga nyini epikaa si ku, ki nyaa le asiga ri si. ¹⁵ Nosi anyalanjuru andaa to zi saa ra, ausi andaa ni kungwi du nyidi 'bo'bodu. ¹⁶ Andaa ni mu olure opigo du idi ku, ki zwa opigoo ra ecoru, adozi lele ndo rii. Andaa ni lele ndo rii, gba na ndolee mani, ungu nza- go-du ri nyini, rugei ungu Opi ni aga. ¹⁷ 'Disi du de ma nyaa rezi’i, a'i andaa ni maa ani. ¹⁸ De kesu ede nyini nga inzwi ra, kusaa mori nyidi andaa di a’a saa, la kwici mani dige. ¹⁹ Ma Paulo si macwii nga 'di maa disi. Ma maa ngasi, malokwe’e nyini vule- jo ka ako, maa mori nyidi ri, nyi 'i nyaa nga si. ²⁰ Oo, maa adozii, ede mani kiza Opi ni aga, E'bwe mani asi Kristu ni aga. ²¹ Maa asi okpo nyaa lejo erikaa si, ma cwi nga di nyi ni. Mani 'ja, nyedee loso kuzwa maa a'i le nyidid si ri ra. ²² Saa alu-alua ri si, ede mani omu ni zo baba , a'dusiku megenia nya’a ilegi si alongwi ma vule nyidi idi. ²³ Maa mabusi rezi Kristu Yesu niaga, Epaphras zi nyi laka. ²⁴ Maa i'bu ede'baazi, Mariko i, Aristakus i, Demas i, ungu Luka pi saa zi kii nyi laka. ²⁵ Kiza ama Opi Yesu Kristu di kolu nyaa endi to. Amen.