¹ Iyania ifa ojo iluluŋ no hiyo okudak Yesu ata hitira hiram no Hollum, oweta ifa inya to oger ha hari netok na ara fure Genesaret. ² Egonyu inya togolisien arik to oko oger ha hari netok. Esuru ifa heririahak adde to togolisien inohosie ata hilila hiyafohita inohosie. ³ Ata Yesu esurok to nobo togoli nafa ho Simone, ata hifi inya hotosulak adia a hotwaihari. Ata inya ahunyai ta fau ata hitiyana hiyo to hotwaiho togoli. ⁴ Ifa atohu inya hiro, ejo inya to Simone, "Iyari togoli a hiji ha hari ade no owudo ata iye ebirok higalita inohoi anyar erietu ham." ⁵ Ata Simone hitiraŋ hijo, "Etok, egiema iyohoi bi no harie daŋ, obe erietu inak hiro, ati iya ejo iye, awu naya ebirok higalia nanaŋ ahifioŋ." ⁶ Ifa egiem isia, ata isia erirehu iluluŋ naham, ata higalita inohosie fufuto. ⁷ Ata isia hililoŋ oriahat ilohosie ta hani a togoli nobo anyar afanu hiluak isia. Ata isia afanu efutak togolisien niya, man etek togolisien adiori ahari. ⁸ Ati nafa ewolo Simone Peturu inya, ata inya rigoŋi to huŋuta to Yesu, hijo, “Ino teni tara hanaŋ, ara naya heyani, Habu." ⁹ Eliliha ifa inya, ho liya Ilafa owon ikonye, ta ham inafa enefu isia ata eyari. ¹⁰ Ara ifa isia Yakobo iko Yoani, onyirok ho Sebede, Ilafa ara oriahat ilo Simone. Ata Yesu hijo to Simone, "Idek he ebaŋ, nyo ta far te ina ahosiere era iso iye heririahani ho hiyo." ¹¹ Nafa eyani isia togolisen oger, ebusak isia hiro daŋ ata isia ejufari Yesu. ¹² Owuon Yesu ifa to bore gala nobo, ati dia, owon lobo tuŋani dia lo oŋwai ha talulu. Nafa egonyu inya Yesu, ata inya ahuyik to homom ho Yesu afau ata hilalia to honye hijo, "Ai! Habu, kuya ewak iye, hitilibo naya." ¹³ Ata Yesu etibisak hani no honye ata hitir inya hijo, "Awak naŋ. Tolibe." Teya ojo talulu kuak ata ebusak inya. ¹⁴ Ata inya hitito tuŋani lia hijo hotobiaŋa inya elimak lobo tuŋani, ati elimak inya hijo, "Ino hikoi nohoi ata iye etuhutek wan no hoi ta fadiri anyar ebuluc inya iye, iya hifahita ino Muse hijo anyar ara hituhuti to hosie." ¹⁵ Ati esarik ifa igiem nohonye arasa ahosiere, ata iluluŋ no hiyo eduduhuni anyar afanu hitira hitiyana anyar etilibo iŋweti inohosie. ¹⁶ Ati odule inya eno amai no odwa omojori. ¹⁷ Ifa to holoŋitek nyya etiyanari Yesu, owon ifa ilak Farisei iko hejufutak ho hifahita ile etole dia, Ilafa afanu ta masik inak a fau ha Galilea iko Yudea, ojo hido to bore gala no Yerusalem. owon ifa inya ho golon na Habu ne etilibori iŋweti. ¹⁸ Nia afanu ilak hiyo, ila akafita tuŋani loloŋura to biris, ata siaha hikoi ne eyari inya ahotwai haji anyar etiferik inya ta fau to hosiere ho Yesu. ¹⁹ Obe isia oruma hei ne eyari inya a hotwai hijo obolo iluluŋ no hiyo, ata ati isia arek ahide ha haji. Ata isia eliliefu inya to hofi to biris tohonye to hiji ho hiyo to hosiere ho Yesu. ²⁰ Ifa ewolo inya hiruk nohosie, ata Yesu hijo. "Ila, ebusahini hiyata inohoi." ²¹ Ati efia hejufutak ho hifahita he Farisei inia hijo, "ŋai lia eramitari fure no Hollum? ŋai lia ebusak hiyata, arace Hollum hamai?" ²² AtaYesu hiyen higigilita inohosie ata hitiraŋ, "Nyo efia itai inia ta tajia hatai? ²³ Nari ofiak, to hijo, 'Ebusahini hiyata inohoi iye? 'Tete, toloto' ²⁴ Ati anyar eyen itai hijo owon onyi tuŋani ho golon ta fau to hebusak hiyata, ajo naŋ tohoi, 'Tete a hide, todumu biris nohoi, ino ahaji hoi.'" ²⁵ Teya odiote tuŋani lia a hide to hiji hosie ata adumu biris nohonye nafa ofirie inya, ata acahari ahaŋ honye le etihabuo Hollum. ²⁶ Eliliha ifa hiyo bi daŋ ata isia hitihabuo Hollum. Efut isia he baŋi, ata hijo, "egonyu iyohoi hiro ino agalik enia." ²⁷ Ta halu ho hiro ino, eno Yesu Teya ata egonyu heduduhani ho musuru la ara fure no honye Lefi letole ta mai he eduduhari no musuru. Ata inya hijo to honye, "Ijufuni naya." ²⁸ Niya ebusak Lefi hiro bidaŋ, odiote ata ejufari Yesu. ²⁹ Ata Lefi ehuhumak karama netok to Yesu ta haŋ honye, owon ifa he he duduhak ho musuru ile ariai dia, ojo ilak hiyo ile owon to terefeja ila adaha iko isia. ³⁰ Ati eŋuŋunita Farisei he hejufutak ho hifahita to hejufutak hijo, "Jai edaha itai ojo hidofe emata he heduduhak ho musuru ojo hiyo he iyak?" ³¹ Ata Yesu hitiraŋ isia, "Obe hiyo ile olibo osiaha diktor, ati hiyo ilo oŋwai osiaha. ³² Abe naya atu eliloŋori hiyo ile obis anyar eloito, ati attu naya eliloŋu heyak hotoyite." ³³ Ata isia hijo to Yesu, "Eya ifa hejufutak ilo Yoani hiya ojo omojo gagaga. Ojo hejufutak ilo Farisei ehuma daŋ ania. Ati adaha hejufutak ilohoi ojo amata." ³⁴ Ojo Yesu tohosie, "oremik iso oriahat ilo hejufutak hiya holowon hayamani to hiji hosie? ³⁵ Ati afanu iso holoŋi ino leyari hayamani to hiji hosie, ata ati isia hiya to holoŋi niya." ³⁶ Ata Yesu hijo hiro to hosie hitiriami hijo, "Obe tuŋani lo oritu boŋo nohonye letiŋ tara boŋo ŋejuk ata arifak to boŋo maruani. Egiem inya ania, eremik hirit boŋo nara ŋejuk. ³⁷ Obe tuŋani oremik eturak fino ŋejuk ahotwai rokwo maruani, legem inya ania, ata fino ŋejuk hirit rokwo nia, ata fino nia ejuhori, ata rokwo nia guasa. ³⁸ Anyar ejuhohini fino ŋejuk a hotwai ho rokwo ŋejuk. ³⁹ Obe tuŋani ta halu ho himat nohonye fino maruani, hiwak fino ŋejuk, ojo iso inyi hijo, 'Olibo maruani.'"