¹ Ta halu ho hiro huna, ata Habu anyimu ilamuk tomwana hatarik ata efahak isia ohorik a hosiere honye amasik daŋ ino awak inya awuye. ² Ata hijo to hosie, “Odon mana, ati eduhuco hegiamak. Kokwak hitimoje ta Habu la mana, anyar efahak hegiamak ilohonye a mana odioŋori. ³ Ifeti hhei nahatai. Itiwolo, efahak naŋ itai iya huloho to hiji he ewuoho. ⁴ Ibaŋa eyari inamuk arobia, kulo, hamuha, ejo itai ibe efony lobo to hhei. ⁵ 5Ta masik ino ejiŋak itai hosiere Itijo, ⁶ ‘Hotowuana himwara ta haŋ ina,’ Owon tuŋani lo himwara dia, owon iso himwara to honye. Ojo lobe, ocohini iso ta hatai. ⁷ Itudule ta haŋ nya daha, itimat hiro ino esio isie ta hatai, nyo awak hegiamani idumuti inohonye. Ibaŋa ofwo ta haji ade nobo. ⁸ Itinya hiro ino eba to hosiere hatai ta masik ino efuye itai, ⁹ itilibo haŋwak ino owon dia. Ilimak to hosie hijo, 'Eliaha obie no Hollum ta hatai.' ¹⁰ Ati efie itai ajiŋak to nobo bore gala, ojo isia obe efotu itai, ifeti ahhei ata itai hijo, ¹¹ ‘Ara ida hido tuduha nahatai ediho ta hamuha ino hooi, etuturok iyohoi daŋ ta hatai! Anyar iyen hijo, eliaha obie no Hollum.' ¹² Iya ajo naŋ ta hatai hijo, ta far nya obolo iso ŋoto nahatai agalik no Sodoma ta far no ŋoto. ¹³ Oru iso ta hatai Korasin! Oru iso ta hatai Betasaida! Owon ifa hiro ino olibo ta Tiyre ho Sidona ta hatai, oyite ifa isia beren, ata ahunyai to siwali. ¹⁴ Ati eyyak iso to Tiyre he Sidona ta far no ŋoto, ata run ta hatai. ¹⁵ Itai Kapernauma, egigilo iso mahu itai hijo eba iso itai te ido? Obe, iso itai efwo ahima. ¹⁶ Lia le etira ta hatai, etira ta hanaŋ, ojo lia ebo itai, ebo naya, ojo lia ebo naya, ebo lia efahu naya.” ¹⁷ Ata liya tomwana hatarik harik acohini ho mune ata hijo, “Habu, origoŋo miniaŋa to hoi to fure nohoi.” ¹⁸ Ata Yesu hijo to hosie, "Ariŋa ida naŋ Sitan lohuyu te ido iya hila. ¹⁹ Itiwolo, esio naŋ ta hatai golon ne eriori itai munok, tosi, golon na agalik mioroni, obe iso nobo sihin eriafu itai. ²⁰ Hotobiaŋa itai emuno hijo origoŋo oyirihien ta hatai, ati itimune bi no hijo egioro fureta inahatai te ido.” ²¹ Ta far nya, omuno ifa inya to Oyiri lo Olibo, ata hijo, “Etihabwo naya iye, Monye, Habu la fau he ido, nyo eŋofok iye hiro huna tara leferejok, ata isia alieu to hiyo ilo obe elefere, iya iŋeyaha. Ee Monye, isiara hotowuana iya ewak iye.” ²² “Esio ifa Monye hanaŋ ta hanaŋ hiro, obe lobo tuŋani oyen onyi arace Monye, obe lobo tuŋani oyen Monye arace Onyi, ojo to tuŋani awak Onyi, etuhutek iso inya.” ²³ Ata inya hijo to hejufutak ilohonye kaikai, “Hotomune ilia egonyu hiro ino egonyu itai. ²⁴ Ajo naya ta hatai, hijo emonya hekilak ilo awak egonyu hiro ino egonyu itai, ati obe isia oremik egonyu, awak hidofe hitira hiro ino etira itai, ojo isia obe oremik hitiru isia.” ²⁵ Odioto ifa lobo lo Yudea hetiyanani lo ifahita ata hicem Yesu hijo, “Hetiyanani, hehum iso naya nyo hijo anyar arrumu wuaran no osio fur?” ²⁶ Ata Yesu hijo to honye, “hojo hifahita nyo? Ehiana iye isia jai?” ²⁷ Ata inya hitiraŋ hijo, “Tomune Hollum Habu lohoi ta taji nohoi daŋ, to Oholio nohoi daŋ, to golon nohoi daŋ, ojo to higigilo nohoi daŋ, iko onyihari lohoi iya wan nohoi.” ²⁸ Ata Yesu hijo to honye, “Etiraŋak iye no lobis. Igiama ino ojo iye Ata manya.” ²⁹ Ati awak ifa hetiyanani etibisak wan nohonye, ata hijo to Yesu, “ŋai ara Onyihari lalaŋ?” ³⁰ Ata Yesu hitiraŋ hijo, “Owu ifa lobo tuŋani aŋolon to Yerusalem a Yerhe. Ata inya ohuyik to hiji ho hahalak Ilafa esohu ahoru hiro inohonye, ata Hilum inya, ata ebusak inya to hikoi ahayoni. ³¹ Ojo lobo fadiri owu to hikoi nya, ati ifa egonyu inya haŋwani, ata hilaŋ to nobo hikoi. ³² Ata lobo hegiamani lo kelesia awoŋ. Ifa egonyu inya, ata hilaŋ to nobo hei. ³³ Ati owu ifa lobo Samaritani hikoi nohonye, ata awoŋ amai nya nafa owuanari inya. Ifa ewolo inya omehini ifa inya to honye. Ata ehutok to honye, ata hififit horoŋon inohonye, epot, ata ejuhok hiyali ho balu to hosie. ³⁴ Ata akafak inya ahide ho caŋ, ata eyani inya a hotwai kulub, ata ehuhumak inya. ³⁵ To hitarihi na far nohonye, ata adumu arobiya inohonye arik ata hisio isia to tuŋani lafa oriŋa inya ata hijo, 'Iyari ho toriŋai inya, owon inak hiro ino esio iye to honye, attu iso naya adumak iye acohini naya.' ³⁶ Lari tuŋani ara onyihari lo tuŋani ohuyik to hahalak ilia ohunik?” ³⁷ Ata hetiyanani hijo, “lara omehini to honye. “Ata Yesu hijo to honye, “Ino igiama ania.” ³⁸ niya, ofwo ifa isia hhei nohosie, ata ajiŋak anobo doŋe ojo nobo hito oŋorwo nara fure Marta hiŋa to hosie hikat nohonye to hosie. ³⁹ Owuon ifa inya he inasi nara fure Mariai nafa etole to hicuŋi no hejek ino Yesu ne etira hiram nohonye. ⁴⁰ Ata ti Marta nafa egigiama awoŋ to Yesu ata hijo, “Habu, ebe ati iye ewolo inasi hanaŋ ebusak naya hehuma igiem hame, “Tojo to honye woŋ hotolwak naya.” ⁴¹ Ata ti Habu hitiraŋ, ata hijo to honye, “Marta, Marta, helafuho iye hiro ariai, ⁴² Ati owon sihin nobotie nala galik. Anyimu Mariai no olibo to honye, nolobe iso eyari ade tara honye.”