¹ Ejio hidofe Yesu to heyiyanak illo honyie, “Owuon ifa lobo hasamani lo lowuon iko hatunani, atta ifa hiyyo etisiahak hijo obe ifa hatunani ille loyyen higiema igiem nohonyie. ² Niyya ellilloŋ hasamani inyia atta hijo to honyie, 'hara nyo nia etira naŋ te iyye? Isiara naŋ gagar nafa egiorori iyye hirro innafa etunari iyye, iyyania ebe iyye enyiak hira hatunani.' ³ Eijo hatunani to wan to nohonyie hijo, ‘Hegiem iso mahu naŋ nyo, iyyania adumu lettok igem no tuna ade tara hanaŋ? Abe naŋ lawuon ho golon laromori, eloriri naŋ himimojo. ⁴ Ayyen naŋ egiem iso naŋ nyo, etiwet lettok naŋ te igem to no tunai, elilloŋu iso hiyyo nayya ahaŋitek hosie.‘ ⁵ Atta hatunani ellilloŋu lobo lia lowuon horos no tuŋani lettok to honyie, ⁶ atta hifi lia lara hitieri hijo, ‘Hawak lettok la hanaŋ jai lohoi?‘ Ejio lia ‘Icemiti hisihi nobotie inno hiyali.‘ Atta inyia hijo to honyie, ‘Todumu waraga nohoi tohunye ta fau kuak igiorok tomwana miet.‘ ⁷ Atta hatunani hijo to lobo, ‘Ara innohoi jai?’ Ejio lia, ‘hisihai nobotie inno geme,‘ Ejio inyia hijo, ‘Todumu waraga nohoi, igiorok tomwana hotohunik.‘ ⁸ Atta ettok elimak to tuŋani lo orru lia nyo egiem inyia no orru. Orru durre inno fau inna binno agalik, le egiama isia iko hiyyo illohosie agalik durrre inno cialai. ⁹ Ajo nayya ta hatai, iturumu motiarak hatai ta arobiyaha inno lorru, lo olite, anyar ellilloŋu isia iyye ta amanya no osio fur. ¹⁰ Lia le eniefita hirro illo oduhucio na anyar, enief iso hidofe hirro inno obore, ojio tuŋani lo obe eniefita hirro hullo oduhucio, obe iso hidofe oremik hinief hirro inno hittaha. ¹¹ Lobe iyye egiamari arobiyaha inno orru to hikoi no olibo, ŋai iso oremik hisio to hoi ibariti inno olibo? ¹² Lobe iyye egiamari arobiyaha inno lobo tuŋani na lanyar, ŋai iso oremik hisio tohoi arobiyaha innohoi? ¹³ Obe lobo hegiemani oremik higiama te ettaha lohorik, nyo oremik inyia aliwari lobotie atta mune lobotie, oremik inyia higiama to lobotie hame atta miasa to lobotie. Ettalik iyye higiama to Hollum iko te ibariti.” ¹⁴ Etiru Farisei illafa lara hamunok ha arobiya hirro daŋ, atta isia elohitari Yesu. ¹⁵ Atta inyia hijo to hosie, “Itilibo itai wati inna hatai to hosiere ho hiyyo, ati oyyen Hollum tajia innahatai. Hirro inno olibo to hosiere ho hiyyo, orru to hosiere ho Hollum. ¹⁶ Arasa ifa hifahi iko hekilak man ottuni Yoani. Man to nyia etiyanahini hiram no obie no Hollum, ojio hiyyo away daŋ efudari to hikoi nohosie ade. ¹⁷ Ati ofiak iso te ido iko fau halitari agalik to higieri no hifahi hotolite. ¹⁸ Lopiaha lobo ho noŋoruo honyie atta ŋayemu nobo hame eyyau inyia hiyyau no roto, ojo lia layamu noŋoru no lopiaha ho hiito lolewa, eyau hiyyau no roto. ¹⁹ Owuon ifa lobo tuŋani lara hasamani le leciefita boŋojin inno logol to hinyiaŋa atta hidofe inyia mune ibariti inno honyie motie motie. ²⁰ Owuon ifa hidofe lobo lolociaŋ lara fure Lasaru, lo lowuon iko horroŋon to wan honyie lo ofer te ikat na bali ha hasamani. ²¹ Awak ifa inyia hihuhuro ŋiria no lodou te teremefa ha hasamani - ojo ŋohe afanu hididala horroŋon inno honyie. ²² Nafa loye lolociaŋ lia, atta anjilohien ahafari inyia aŋati ha Abramo. Atta hidofe hasamani ye atta hiyyo anuhak, ²³ Ta mai nyie ho hiyyo illo lobe leruk to Hollum, etaban ifa inyia bi no, atta hihaf honyehite innohonyie atta egonyu Abramo alamarai iko Lasaru to suhe honyie. ²⁴ Oyio inyia binno atta hijo, ‘Abramo Monye, tomehini nayya, ifahu Lasaru, hawoŋ helumok hafialai lo honyie to hifioŋ hetiliha ŋadief hanaŋ, awuon naŋ ta mai no lowulo binno.’ ²⁵ Ati eijo Abramo, ‘Hiito, ihuma higigil tamanyai ta nafa hoi, efwotu ifa iyye hirro inno olibo, ojo Lasaru efwotu hirro inno lepal. Ati iyyania elobia inyia ejo iyye ewuon to hitigiama. ²⁶ Ati, owuon iwure no lowudo ojo hido alat to hiji, hijo hotobiaŋa hiyyo lalaŋu tenni ta hatai, ejo iyyohoi ebe ellaŋu tenni ta hatai.‘ ²⁷ Atta hasamani hijo, ‘Attana naŋ iyye, Baba Abramo, ifahak inyia ahaji ho monye hanaŋ. ²⁸ Awuon naŋ he ilasira miet - anyar lohu inyia hisor isia, tabaŋi hijo hotobiaŋa isia afanu amai no norru.’ ²⁹ Atta Abramo hijo, ‘Owuon isia ho Musa iko hekilak; isiara isia hetira to hosie.’ ³⁰ Atta hasamani hitiraŋ, ‘Obe, baba Abramo, nohu lobo tuŋani to hosie tara hayok, oremik iso isia hilloit.’ ³¹ Atta Abramo hijo to honyie, ‘Lobe isia etira to Musa iko hekilak, obe isia eruk ohu ida hido lobo tuŋani tara hayok.'''