¹ Eno Yesu adoŋe Oliveto. ² Ifa to motie beren enyiak inyia aciohini omojori, ojo hiyyo bidaŋ atta afanu do honyie; atta ahunyie inyia ta fau atta hitiyana isia. ³ Ojo hidofe hegiorok iko Farisei atta eyyani hiito noŋorwo inna orrumu isia oroto iko lobo tuŋani, atta isia etiwejik inyia to hiji ho hiyyo. ⁴ Atta isia hijo to Yesu, "Hetiyanani, hiito noŋorwo inna eniefu iyyohoi oroto iko lobo tuŋani. ⁵ Iyyania ojio to hifahita inno Musa hijo anyar iyyohoi erwoŋ inyia to moru; ojo to hoi, ''Hejo iyye jai te inyia?" ⁶ Ojo isia iyyanyia hijo anyar elohu isia Yesu te innak hirro hunna errosok do honyie, ati origoŋi Yesu atta egiorok ta hafiala ta fau. ⁷ Nafa efudak isia hifia Yesu, odioto inyia ahide atta hijo do hosie. "Isiara lia lobe ara heyyani hitiara hipuda inyia." ⁸ Enyiak Yesu asodorrohini, atta egiorok ta hafialai honyie ta fau. ⁹ Ifa letiru isia hirro innia, etiara isia efie adde lobotie lobotie man edehini Yesu iko hiito noŋorwo nyia hamai. ¹⁰ Odioto Yesu atta hijo do honyie, "Tuŋani innaŋ, tahu harrosok hoi hullo? Obe da lobo oŋot hiram no hoi?" ¹¹ Ojo inyia, "Habu, obe da lobo." Ejo Yesu, "Abe iso hidofe naŋ aŋat hiram nohoi, Ino ikoi no hoi; man ena ahosiere baŋa enyiak eyyau.") ¹² Teyya enyiak Yesu hiro to hosie hijo, "Ara naŋ calai na fau; lia lejufuta naŋ, obe iso olot te idumele ati orrumo iso calai inna mak." ¹³ Ojo Farisei to honyie, "Era iyye sut to wan no hoi; obe suti illohoi eroita dede." ¹⁴ Etiraŋ Yesu to hosie, "Ara da hido naŋ a sut to wan hanaŋ, elosut naŋ dede. Ayyen naŋ mai na attuni naŋ iko hidofe mai na awuyie naŋ, ati ebe itai liyyen mai na attuni naŋ kuya hidofe mai na lawuyie naŋ. ¹⁵ Eŋoto itai hipalita inno hiyyo ajo naŋ abe aŋot lobo tuŋani. ¹⁶ Ati leŋot naŋ, ara ŋoto nanaŋ dede, nyo abe naŋ awuon hame, ati awuon naŋ iko Monye lia efahu naŋ. ¹⁷ Ati to hifahita inna hatai egiro hijo oso hiram no hiyyo illia ohorik dede. ¹⁸ Nayya ara a sut ta wan nanaŋ, iko Monye lia lefahu naŋ owuon asut hanaŋ." ¹⁹ Atta isia hijo to honyie, "Tahu monyo hoi?" Atta Yesu hitiraŋ, "Ibe itai eyyen nayya iko Monye hanaŋ; leyyen itai nayya, eyyen itai monye hanaŋ." ²⁰ Ero ifa inyia hirorita hunna aŋati ta mai no ottunari hiyyo arobiaha etiyana inyia ta haji imojit inna hittok, obe ifa lobo tuŋani eniefu inyia teyya nyo holobeŋ ifa holoŋ nohonyie awoŋ. ²¹ Enyiak Yesu hirro to hosie, "Leno naŋ teni; etufa iso itai naŋ man eye itai iko hiyyata inahatai. To mai nyia lawuye naŋ, ebe iso itai eba dia." ²² Nia etiraŋ Yudei hijo, "Hottohoi iso mahu inyia wan nohonyi? Inyia nia ojari inyia hijo, "Ta mai nyia lawuye naŋ, obe lobo tuŋani eba dia?" ²³ Ojo Yesu do hosie, "Era telle ŋolon, ajo naŋ telle to hide. Ara itai illo fau inna; ajo naŋ abe ara a lo fau ina. ²⁴ Inya nia ajiatari naŋ hijo eye iso itai iko hiyata hatai. Nyo lebe itai eruk hijo nayya Kristo lonyimoti lo Hollum, eyye iso itai iko hiyyata innahatai." ²⁵ Ejo isia to honyie, "Iyye ŋai?" Etiraŋ Yesu to hosie hijo, "Elimak ta naŋ itai to hitieri. ²⁶ Owuon hirro ariai ta hanaŋ herotari kuya haŋotori hiram na hatai. Lia efahu naŋ obis inyia; ojo hirro inia etiru naŋ tara honyie, elimak naŋ ta fau daŋ." ²⁷ Ati obe isia oyyen hijo erota ifa inyia to hosie to hiram no Monye. ²⁸ Ejio Yesu, "Lehaf itai Lonyi Tuŋani ahide, efanu iso itai hiyyen hijo naŋ lia, ejo iso itai eyyen hijo abe naŋ egiem nobo sihine to wan hanaŋ. Iyya etiyen Monye nayya, ero naŋ hirro hunna. ²⁹ Ati lia lefahu naŋ owuon ikannaŋ. Obe inyia ebusak naŋ hame, nyo holoŋitek daŋ ehuma naŋ hirro hunna etimuno inyia. ³⁰ Nafa ero Yesu hijo hirro hunna, eruk hiyyo aria to honyie. ³¹ Teyya ejo Yesu to Yudei illafa eruk to honyie hijo, "Legol itai to hirro hanaŋ, atta itai hira aheyiyanak illallaŋ dede; ³² Eyyen iso itai bisan, ojo iso bisan atta ahek itai." ³³ Etiraŋ isia to honyie, "Era iyyohoi to woyyo naba Abramo ati ifa holobe iyyohoi ipito to lobo tuŋani; nyo nia ejo iyye hijo, "Ehohini iso itai?" ³⁴ Etiraŋ Yesu isia hijo, "Dede, elimak naŋ itai hijo, tuŋani daŋ ille ara heyyani ara pit lo hiyyau. ³⁵ Obe pit arasa da haji mak, ati odule lonyi mak. ³⁶ Nia, lahek lonyi itai, aheni itai dede. ³⁷ Ayyen naŋ hijo era itai to woyyo na Abramo; etufa itai hijio ettohoi naŋ nyo obe hirorita innanaŋ ojiŋak ta hatai. ³⁸ Ero naŋ hirro hunna egonyu naŋ tara Monye hanaŋ, ejo hidofe itai etiru hirro inno etiru itai tara Monye hatai." ³⁹ Etiraŋ isia to Yesu hijo, "Ara Abramo monye hohoi?"Ejo Yesu to hosie hijo, "Lera itai durre illo Abramo, negiama itai higiemita inno Abramo. ⁴⁰ Ati, iyyania ejo itai ettohoi naŋ, ajo naŋ elimak itai hirro dede inno etiru naŋ tara Monye hanaŋ. Obe ifa Abramo ehuma iyya itai. ⁴¹ Ihuma hirro innafa egiama monye hatai." Atta isia hijo to Yesu, "Obe iyyohoi ifa esini to hirro inno somon; ewuon iyyohoi iko Monye lobotie, inyia Hollum." ⁴² Ejio Yesu to hosie, "Nara ida Hollum amonye hatai nemuno ida itai naŋ nyo ebusuni ifa naŋ Hollum attuni naŋ enni. Obe lara naŋ attu to wan hanaŋ ati Hollum efahu naŋ. Jai ebe itai etiru hirorita inanaŋ? ⁴³ Nyo ebe itai eremik hitira rori innanaŋ. ⁴⁴ Itai illia lonyirok ho sitan, ejo itai ewak higiama hiro ino monye hatai. Ara ifa inyia ahatohoni man to hitieri ati obe inak hirorita honyie inno lobis, nyo obe inyia ero hirro hunna dede. Lateleru inyia ara ateler no honyie, nyo ara inya a loteler hidofe ara monye lo telerok. ⁴⁵ Ati ebe itai eruk ta hanaŋ, nyo erota naŋ hunna dede. ⁴⁶ Ŋai to hiji hatai orrumu nayya ara a heyyani? Lerota naŋ dede, nyo lobe itai eruk ta hanaŋ? ⁴⁷ lia lara lo Hollum etira to Hollum; ebe itai etira isia nyo ebe itai era illo Hollum." ⁴⁸ Atta Yudei hitiraŋ to Yesu hijo, "Atienu ida iyyohoi hijo era iyye lo Samaria ebe iyye dede era lo Yudea, ojo hidofe miniaŋa owuon to hoi!" ⁴⁹ Etiraŋ Yesu hijo, "Abe naŋ awuon iko miniaŋa! Etihabwo nayya Monye hanaŋ, ejo itai emoro naŋ! ⁵⁰ Abe naŋ etufa hijo hetihabwe hiyyo naŋ; owuon lia etufa huan hidofe owuon ahaŋotoni. ⁵¹ Dede elimak naŋ itai lotoŋ lobo hiram hanaŋ, obe iso inyia oye." ⁵² Ejo isia to Yesu, "Iyyania eyyen iyyohoi hijo ewuon iyye iko miniaŋa. Oye ifa Abramo iko hekilak; ati ejo iyye, 'Letoŋ lobo hirorita hanaŋ obe iso oye.' ⁵³ Egalik iyye hohonyi hohoi Abramo lafa oye? ojo hidofe hekilak illafa oye. Egigilo iyye hijio era iyye ŋai?" ⁵⁴ Etiraŋ Yesu hijo, "Letihabwuo naŋ wan nanaŋ ara hitihabwo hanaŋ assai. Monye hanaŋ hamai lia etahwo naŋ lia ejo itai ara a Hollum hatai. ⁵⁵ Holobe itai eyyen inyia, ati ayyen naŋ inyia. Lejio naŋ abe naŋ ayyen, ara naŋ ahenyabani lo huan hanaŋ. Ati ayyen naŋ inyia hidofe naŋ agocie hirorita honyie. ⁵⁶ Omuno ifa monye hatai Abramo hegonyuni holoŋ na attuni naŋ; le gonyu inyia holoŋ hanaŋ atta inyia mune binno." ⁵⁷ Ejo isia to Yesu, "Holobe ŋasi hoi hira tomwana miet, egonyu ifa iye Abramo jai?" ⁵⁸ Ejo Yesu to hosie, "Dede elimak naŋ itai, awuana ifa naŋ beren holobe Abramo esini." ⁵⁹ Ohurro isia moru hijo erwoŋo Yesu, ati eŋofak Yesu wan atta ajiŋu ade to hiji imojit.