¹ To hitahunihi no holoŋ, owuon ifa hiyama ta Kana no Galilea, ojo ifa hotonye Yesu owuon dia. ² Ellilloŋo ifa hiyyo Yesu iko heyiyanak illohonyie to hiyama nyia. ³ Nafa enyie balu, ejio hotonye Yesu te inyia, "Enyie balu tara hosie." ⁴ Etiraŋ Yesu, tuŋani innaŋ, Nyo hidofe hiram nanaŋ iko nia? Holobe holoŋ nanaŋ awoŋ" ⁵ Ejio hotonye honyie to hegiamak , "Lejio inyia ta hatai igiama, anyar egiem itai." ⁶ Ati owuon ifa mocio inno moru ile dia innafa oduleri Yudea ellillari lo owuana karamat innohosie, oremik ciama sofiyaha arik iko hunik. ⁷ Ejio Yesu to hosie, " Itufutak hifioŋ tohosie." Ati etifutak isia mocio nia bel bel. ⁸ Teyya atta inyia elimak hegiamak, " Itiwuohu inak ade iyyania iyiari to hegiamani lia hittok." Atta isia higiem. ⁹ Eniŋ hegiamani lia hitok hifioŋ ino edualaŋa ati obe inyia oyyen hijo edoŋ balu nia tai? (ati oyyen hegiamak illafa owohok wati hifioŋ nia). Atta inyia hillilloŋ hiito oliawa hayamani. ¹⁰ Atta hijo to honyie, ititek balu nia odua wan doo ati ta halu ho rumai nohosie isiara nia ofiak wuan. Ati anyar etunak iyye lia odua wan man iyania." ¹¹ Etiara ifa duaran nohonyie ta Kana no Galilea ojo ifa ara hitierita inno hituhututa ino iduariti, innafa egiem Yesu, hetuhutahini lohuo nohonyie, man eruk heyiyanak illohonyie to honyie. ¹² Tahalu teyya eno Yesu, a Kapernaum, iko hotonye honyie, halasirak honyie, ojo heyiyanak illohonyie, ojo teyya atta isia hittole holoŋitek kai. ¹³ Nafa awoŋ holoŋ no laŋan no hituduara ilo Yudea, atta Yesu enno a Yerusalem. ¹⁴ Orumek inyia hiyyo etinyaŋa tamoti illo husuŋ, kioro ojo hohoron to omojori. Ettole ifa hidofe hetittobok ha arobia dia. ¹⁵ Teyya adumu inyia hali atta hibak isia ojo efuhai isia adde ta haji imojit, daŋ iko kioro ojo tamoti illo husuŋ. Atta inyia asulai adde arobia inno hiyyo illo eloito arobiya, terefejeha innohosie ta fau. ¹⁶ To hetinyaŋak ho hohoron, ejio inyia, "Iyari hirro hunna daŋ adde teni. Ibaŋa emak haji no Monye hanaŋ etinyaŋari nahatai." ¹⁷ Egigilu efahat illohonyie hijo egioro ifa nia, "Hitihi no haji nahatai iso esok nayya." ¹⁸ Teyya atta hekumok ilo Yudea hitiraŋ tohonyie hijo, "Nari hituhuti iso nia etihutek iyye iyyohoi to nyo egiama iyye hirro hunna? " ¹⁹ Etiraŋ Yesu, "Esiaha omojori nia, ati to holoŋitek hunik attohok iso nayya." ²⁰ Teyya ejio hekumok illo Yudea, "Eyari te iyyohoi ŋasi tomwuana aŋwan he ile, ati etidietik iso iyye inyia ahide to holoŋitek hunik?" ²¹ Ati ero ifa inyia omojori no wuan nohonyie. ²² Ati teyya tahalu, nafa owuarini inyia to ye, egigilu heyiyanak illohonyie hijo ejio inyia nia, ati eruk isia to higierita ojo to hirorita innafa ero Yesu. ²³ Nafa owuanari inyia to Yerusalem to holoŋ no laŋan no hitudwuara, to holoŋ no karama, eruk arria to fure nohonyie, nyo egonyu isia hituhututa inno iduariti innafa egiem inyia. ²⁴ Ati, obe Yesu eruk wan nohonyie tohosie nyo oyyen inyia hiyyo daŋ ²⁵ ojo obe awak lobo tuŋani hetuhutek hirro inno fau daŋ. Oyyen inyia to wan nohonyie nyo ifa owuon to hirro inno fau daŋ.