¹ Ojiŋu Yesu atta inyia egonyu tuŋani lo oŋodo man te esiori honyie. ² Efia heyiyanak inyia hijio, "Hetiyenani, ŋai ifa eyyau, tuŋani ille, kuyya hesiok honyie, esiuni inyia oŋodo?" ³ Etirraŋ Yesu hijio, "Obe ara tuŋani ille iko hesiok honyie eyyau, edoŋ hirro hunna iyya ania anyar etuhutari igem no Hollum. ⁴ Anyar iyyohoi egiama igem no lia lehafu naŋ ojio holoŋ ara far. Ottu iso tari nobiaŋari tuŋani enyiak higiama. ⁵ Hawuon naŋ ta fau inna, ara naŋ cialai na fau." ⁶ Ta halu ho hirro nohonyie hirro inne, omitak inyia hamilak ta fau, atta inyia enutu modie, atta eyalak to honyehite ho oŋodo. ⁷ Eijo inyia do honyie, "Ino, illila ta tafar no Siloma ( no ojio 'ifahak'). " Niya eno oŋodo lia adde, atta hillila honyehite, atta acohini lo oriŋa. ⁸ Iyyania, ero onyihari illohonyie illafa egonyu hitilieŋita nafa honyie ho beren hijio, Obe ara tuŋani ille etilieŋita to holoŋitek daŋ, le ettole ojo hidofe emimojo?" ⁹ Atta illak hijio, "Inyia lia" ojio illak arasa hijio, "Obe, ati owuon iyya inyia." Ati odule loŋodo lia hiro hijio, "Nayya lia." ¹⁰ Atta isia hijio do honyie, "ŋai aŋa honyehite innohoi?" ¹¹ Etirraŋ inyia tohosie hijio, "Tuŋani ille ara Yesu enutu modie atta eyalak honyehite innanaŋ atta hijio ta hanaŋ, 'Ino a tafar ho Siloma atta iyye hillila.' Nia atta naŋ eno hillilla man arriŋari naŋ." ¹² Atta isia hijio to honyie, "Tahu ati inyia." Ojio loŋodo lia atta hijio, "Abe naŋ ayyen." ¹³ Teyya, eyyani isia tihoni lafa oŋodo do Farisei. ¹⁴ Ojio do holoŋ nia, ara ifa nia far na Sabato ne enutuni Yesu modie etinyarrari loŋodo lia. ¹⁵ Teyya etiara Farisei hifia tuŋani lia, "Jai errumek iyye riŋai no honyehite innohoi?" Atta inyia hitirraŋ do hosie hijio, "Efufusok inyia modie to honyehite hanaŋ, atta naŋ ellilau, man arriŋari naŋ." ¹⁶ Eijio hilak illo Farisei hijio, "Obe tuŋani ille ottu tara Hollum nyo obe inyia etiduara holoŋ no Sabato." Arasa hilak hijio, "No nyo ehuma tuŋani lara heyyani iduariti iyya hunna?" Owuon ifa bwanya do hiji hosie. ¹⁷ Enyiak isia hifia loŋodo lia hijio, "Hejio iso iyye nyo nia iyya etinyarari inyie honyehite innohoi?" Atta loŋodo hitirraŋ hijio, "Ara inyia hekilani." ¹⁸ Holobe ifa hiyyo illo Yudea eruhok hirro inno oŋodo lia hijio arrumek oŋodo lia riŋa atta isia elliloŋu hesiok inno oŋodo lia. ¹⁹ Atta isia hifi hesiok hijio, "Onyi hatai ille lafa eijio itai oŋodo man beren? Ati oriŋa inyie nyo iyyania?" ²⁰ Etirraŋ hesiok honye hijio, "Eyyen iyyohoi hijio lonyi hohoi illeŋ lafa esini lo oŋodo. ²¹ Ati ebe iyyohoi eyyen jai oriŋa inyia, eijio hidofe iyyohoi ebe eyyen hijio, ŋai lesio dohonyie riŋai. Ifia dohonyie. Obolo inyia. Oremik inyia hiro ta wan to nohonyie." ²² Ero hesiok innohonye annia nyo abaŋ isia hiyyo illo Yudei. Nyo eŋut ifa Yudei hijio lejio lobo hijio ara Yesu Kristo, efuhari iso inyia adde ta haji imojit. ²³ Inyia ne lojo hesiok honye hijio, "Obolo inyia, ifia inyia." ²⁴ Niya enyiak ofe Yudei illia hilliloŋ oŋodo lia atta hijio te inyia, "Isiara lohuo nohoi to Hollum nyo, eyyen iyyohoi hijio ara tuŋani lia a heyyani." ²⁵ Etirraŋ loŋodo lia hijio, "Obe naŋ ayyen hara inyia a heyyani. Ayyen naŋ sihin nobotie hijio: Aŋodo ifa naŋ, ati iyyania arriŋa naŋ." ²⁶ Eijio isia tohonyie hijio, "Hegiem inyie nyo to hoi? Haŋa inyie honyehite innohoi jai?" ²⁷ Atta inyia hitirraŋ hijio, "Elimak ida naŋ itai, ejio itai ebe etira hirro innanaŋ! Nyo ati nia ewak itai etiru? Ebe itai ewak hira heyiyanak illohonyie daŋ, ewak itai? ²⁸ Atta isia hijio do honyie, "Era iyye heyiyanak lohonyie, ati era iyyohoi heyiyanak illo Mose. ²⁹ Eyyen iyyohoi hijio ara Musa lefahati lo Hollum lottu hiro toohoi, ati da hallaŋ ille, ebe iyyohoi eyyen hottu inyie ta nari mai." ³⁰ Atta tuŋani lia hitirraŋ to hosie hijio, "Ebe ittai eyyen mai nottuni inyie, hiram no olibo inna, ebe itai eyyen mai nottuni inyia, inyia lia aŋa honyehite innanaŋ. ³¹ Eyyen iyyohoi hijio obe Hollum etira to heyyak, ati etira inyia to lia letihabuo Hollum ojio hidofe ehuma wahan honye, etira iso Hollum do honyie. ³² Man to hitieri na fau holobe ifa lobo tuŋani etinyar honyehite inno tuŋani lesiuni lo oŋodo. ³³ Lobe ida tuŋani lia ottu tara Hollum, nobe ida inyia egiem hirro inne." ³⁴ Etirraŋ isia to honyie atta hijio, "Esihini ifa iyye to hiyyata, ati ejio iyye etiyena iyyohoi? Atta Farisei efuhai inyia ade to haji imojit. ³⁵ Etiru ifa Yesu hijio efuhai ifa Farisei inyia ade ta haji ne imojit. Orrumek Yesu inyia atta hijio, "Heruk iyye to Onyi Hollum?" ³⁶ Atta tuŋani lia hitirraŋ hijio, "ŋai lia, Habu, anyar eruk naŋ to honye?" ³⁷ Atta Yesu hijio to honyie, "Egonyu iyye inyia, inyia lia lero iko hoi." ³⁸ Atta tuŋai hijio, "Habu, eruk naŋ." Niya atta inyia hitihabuo inyia. ³⁹ Atta Yesu hijio, "Attu naŋ afau oŋotori, anyar illo obe orriŋa, hotorriŋai, ojio hidofe etiŋodo illo ojio erriŋa isi." ⁴⁰ Atta hilak Farisei illafa owuon iko inyeja ojio hidofe etiru atta hifi inyia, "Eŋodo iyyohoi daŋ?" ⁴¹ Atta Yesu etirraŋak to hosie hijio, "Leŋo ida itai nobe ida itai ewuon iko hiyyata. Ati iyyania, ejio itai hijio, "Erriŋa itai, arasa hiyyata ta hatai.